“أعلنت شركة نيورالينك أنها تبحث عن متطوعين  لإجراء أول تجربة لها علي البشر”…الكلام ده اتعلن عنه تقريباً من كام يوم بس محدش فاهم ايه اللي بيحصل بالظبط!!

مطلعش مجرد فيلم!

في الأيام الأخيرة سمعنا كلام كتيرعن شريحة هتتحط في دماغ الإنسان هيتخزن عليها كل بياناته، من تاريخه المرّضيٍ، لكل تفصيلة في حياته… حتى حساباته البنكية، هيتنقل بيها من بلد للتاني من غير ما يحتاج جواز سفر لأن الشريحة دي هتكون هي كل حياته، زي فيلم اللمبي8 جيجا بالظبط!!

مكُناش مصدقين وكلنا قولنا اكيد خيال علمي عمره ما هيتنفذ…لكن إيلون ماسك حول كل أحداث الفيلم لـ حقيقة!

شركة نيورالينك  

نيورالينك دي اصلا شركة أسسها الملياردير الأميركي إيلون ماسك 

نيورالينك هدفها كان أنها تطور الواجهة الدماغية الحاسوبية (BCI) ..ودي عبارة عن تقنية هتخلي البشر عندهم القدرة علي التواصل مع الآلات بمجرد التخاطر بس! انت متخيل!!

طب التقنية دي هتتنفذ أزاي؟

ايلون موسك قال انها هتبقي عبارة عن شريحة هيتم إدخالها في الدماغ والشريحة دي فيها مجموعة تقنيات وعلى حسب كلامه ان الشريحة هتساعد على شفاء كتير من الأمراض زي الشلل وألزهايمر والجلطات الدماغية ومشاكل الأعصاب!…الموضوع ولا في الخيال كأنك بتتفرج على فيلم خيال علمي!

ده كله جميل جداً، لكن لو بصيت للموضوع بشكل مختلف عن الأسباب الظاهرية دي هتكتشف كوارث!

كوارث شريحة نيورالينك

تعالي نسأل السؤال الأهم! مش ممكن اللي مخترع الشريحة دي يستغلها بشكل تاني! يعني ايه مش فاهم؟ يعني زي ما حطولك كل معلوماتك الشخصية في الشريحة دي ممكن جدا يسيطروا عليك من خلالها ويحركوك وكمان يموتوك بيها! 

في الآخر هنقول ده كله تخمينات…بس اللي جاي هيصدمك!!

تجارب علي القرود!!

في 2019 إيلون ماسك نزل فيديو عن قرود بتتعلم تتعود على استخدام شريحة نيورالينك

في 2020 لاقينا القرود بتلعب لعبة بونج على شاشة كمبيوتر عادية بمجرد التفكير!

في 2022 القرود بدأت تكتب بمجرد أنها تركز عينيها على زرار وكلمات على الكيبورد الظاهر علي الشاشة..!! 

حتي إن في مرة القرد كتبلهم “?Can I have Snacks”

فدخل موظف من الشركة بشاشة عليها أشكال Snacks كتير وطبعاً القرد.. اختار الموزة!

تفتكر بقي… هل يقدروا فعلاً يتحكموا في عقلك زي ما عملوا مع القرود؟؟!

حباً في مبدأ ” الأول ” الصين تقرر السيطرة على العالم بمشروع ” عقل المدينة ” أول مشروع صيني يحاكي العقل البشري لمراقبة أكثر من مليار شخص، تفتكروا إيه الحكاية ؟؟ 

السيطرة على العالم 

سنة 2016 الصين أعلنت بشكل رسمي هدفها في قيادة العالم في مجال الذكاء الاصطناعي، وكمان قالوا إنهم حددوا فريق متميز من علماء ومطورين صينين تحت إشراف حكومي لتحقيق هدفهم .. 

بعد فترة من إعلانهم اتكلموا عن مشروعهم اللي هيكون بمثابة دماغ صناعي يحاكي العقل البشري وآلية العين البشرية هدفه مراقبة الوضع والنظام في شوارع المدينة الواسعة والمدن الصغيرة .. ولكن ؟! 

مشروع “عقل المدينة “

في سباق مدن العالم في التفوق التكنولوجي الصين دخلت جون في العالم وقررت تخلد اسمها كأول دول العالم في إنتاج مشروع مستلهم من آلية عمل العين والعقل البشري، 

منظومة تقنية عبارة عن مجموعة من أجهزة الكمبيوتر تستخدم الذكاء الاصطناعي في عمليات مراقبة النظام الحاكم في الصين للشعب، وفقاً لكلام المطورين إن الدماغ الجديدة هتكون مجهزة بقدرات المراقبة والمعالجة البصرية المصممة بنفس آلية العين البشرية. 

غير إنهم اشتغلوا على إنه يكون موفر في استهلاك الطاقة عشان يقدر يستوعب كم الانتشار اللي بيخططوا ليه في جمع ومعالجة مليارات المعلومات الخاصة من حركة المرور والوجوه البشرية والأصوات وكل حاجة بتم في الدولة. 

قنبلة ذرية معلوماتية 

في تصريح للعالم الصيني تشو سونغ تشون، إن الذكاء الصناعي هو القنبلة الذرية للعالم والحديث، وإن اللعبة بين الولايات المتحدة والصين ستحسم مين هيقود العالم في مجال الذكاء الاصطناعي 

تفتكروا الصين ناوية تسيطر على العالم كله مش بس مدنها وشوارعها الصغيرة؟؟ 

تخيل انك تشتغل على حملة تسويقية يكون كل هدفها “Brand Awareness”…

بس العملا هما اللي ينجحوا الحملة ويخلوها من أقوي الحملات التسويقية الي عملتها من فترة طويلة. 

كوكاكولا في أستراليا

سنة 2011 وتحديداً في أستراليا شركة كوكاكولا بدأت كامبين بعنوان “Share a Coke” 

الحملة دي كان كل هدفها انها تعمل Emotional Connection بين العملا، طب عملوا ده ازاي؟

خلوا مكان اللوجو بتاعم أسامي الناس…وساعتها الناس بدأت فعلا تـ share الكوكاكولا مع بعض

نتائج حملة استراليا كانت 71% زيادة فى الاستهلاك من الشباب

دا غير ان المبيعات زادت 3%

وده اللي خلي أمريكا تسخدم نفس الفكرة في إعلاناتها وفضلت تنشرها حوالين العالم كله..ا

فكرة بسيطة نتائجها تصدمك!

سنة 2014 شركة كوكاكولا طبقت نفس الحملة بس في مصر بقي

الفكرة بتاعت الحملة كانت إنهم بيشجعوا الناس يشاركوا اللحظات الحلوة مع أصحابهم وأحبابهم ويعملوا ذكريات مع كوكاكولا…

بس اللي حصل ان الحملة التسويقية نجحت نجاح جبار ونتائجها كانت مبهرة…

– حجم المبيعات زادت 2% لأول مرة من عشرات السنين.

– نزلت 500 الف صورة عن طريق هاشتاج ShareaCoke#.

– اتباعت 6 مليون عبوة.

– صفحة الشركة في الفيسبوك كسبت 25 مليون Followers.

الفكرة للحملة كانت بسيطة لكنها ربطت العميل بشيء بسيط (مجرد اسم) وده اللي ساعدهم في نشر الحملة بشكل غير متوقع!!

الخلاصة أنك لو ركزت علي عميلك أكتر مانت مركز علي المنتج وإزاي تبيعه…صدقني هتنبهر من النتايج!

لو عايز العميل هو اللي يسوقلك المنتج هتعمل ايه؟

تعرف إنك تقدر تسافر لمدة 6 شهور مجاناً لأي مكان في العالم  ومن غير ما تدفع ولا دولار واحد … ؟؟ 

ده بالظبط اللي قررته منظمة wwoof لو عايز تعرف إزاي كمل الموضوع للأخر .. 

السفر لأي مكان في العالم 

لو إنت من عشاق السفر وبتحب تتعرف على الثقافات المختلفة والسفر بالنسبة لك أكثر من مجرد متعة،  عايز أقولك منظمة wwoof عبارة عن تجمع لأصحاب المزارع العالمية بيقدموا فرص سفر لأي شخص من كل دول العالم وتوفر لهم الأكل والشرب وكل احتياجاتهم بشكل مجاني بالكامل .. 

ولكن بشرط …. !! 

إنك تساعدهم في أعمال الزراعة وإدارة المزرعة وكل الأمور المتعلقة بها، وعمرك أكثر من 18 سنة ليتم قبولك ، أما بالنسبة لعدد ساعات شغلك هتكون ما بين 3 لـ 6 ساعات في اليوم يعنى قدامك أكتر من نص اليوم تقدر تتفسح فيه في البلد وتتعرف عليها أكتر ..

إزاي تسافر بالتطوع ؟! 

تقدر تتفق مع صاحب المزرعة في البلد اللى عايز تسافر ليها من خلال التواصل أون لاين على موقع المنظمة وتتفقوا سوا على كل الشروط الي بينكم على طبيعة المساعدة وطريقة السفر والتقديم وكل الأوراق المستحقة منك هما بيوفروا عنك عناءها تماماً، كل اللى عليك إنك تفتح الموقع وتختار المزرعة أو البلد اللى نفسك تسافر لها 

أعمال هتقوم بيها 

وللمصداقية هتلاقي على الموقع الأعمال المطلوبة منك في كل مزرعة عشان تقدر تختار من بينهم المناسب ليك، يعنى مثلاً في مزارع هتساعد فيها بقطع الأخشاب هتقوم باعمال الزراعة فيها ­،هتعتني بالحيوانات، بص مفيش حاجة تقدر تشتغلها هناك مش هتعملها.. 

السفر متعة وفيه فوائد كتير، ولكن لو قدامك فرصة إنك تسافر بطريقة التطوع هتعمل كدة ولا هتفكر ألف مرة قبل ما تقدم وتاخد الخطوة ؟؟ 

مين فينا مش فاكر شعار شركة “بريل” المشهور “استرجل”؟!

في نفس الوقت ده نزلت شركة “شويبس” حملة تحت شعار “كل غابة وليها ملك.. الفرق واضح”

وكأنهم بيوصلوا رسالة بتقول إن “استرجل” موجه إلى الراجل اللي مش حاسس برجولته، في حين الرجالة بجد هما اللي بيشربوا “شويبس بولد”.

اللي عملته شركة “شويبس”  في شركة بريل بنسميه Brand Attack

الـBrand Attack…قصف الجبهات في البيزنس!!

في وسط المنافسة الشديدة بين البراندات الكبيرة…أوقات كتير فيه برندات بتقصف جبهات براندات تانية وكل واحد فيهم بيحاول يثبت قوته وسيطرته على السوق وبيحاول يقلل من القيمة التسويقية للبراند المنافس وده هو الـBrand Attack…

وطبعا ده بيشد فئات كبيرة من الجمهور وغير كده البراند هيستفيد إن حملته التسويقية هتنجح وبتكلفة قليلة لأن الجمهور هو اللي بيبدء يتكلم عن الحملة التسويقية وينشرها في كل مكان ويتعامل معاها على أنها تريند.

“وحرفياً لو استغلت الشركة المنافسة نقطة ضعف للبراند بتاعك هتبقى قادرة تهد اللي اتبني من سنين في يوم واحد.”

هو ده بيحصل بين البرندات الكبيرة بس؟

 لا طبعا ممكن يحصل للشركات المتوسطة وحتي الصغيرة  طالما كنت ناجح في السوق وبتمشي بخطوات كبيرة وسابق منافسيك فاعرف أنك تحت عيون منافسيك وأي خطأ ممكن يصدر منك هينتشر بشكل يدمر سمعتك ويخسرك عملائك.

الـBrand Attack..صدفة!!

البراند أتاك ممكن يكون صدفة أو منظم…

صدفة زي موقف كريستيانو رونالدو في المؤتمر الصحافي لمنافسات “يورو 2020”.. لما وصل كرستيانو وبدأ يجهز نفسه لبداية المؤتمر كان محطوط قدامه زجاجتين من الكوكاكولا وبكل عفوية قام شايلهم من قدامه وحط المياه وقال “Drink Water”…الحركة دي أثرت بالسلب علي شركة كوكاكولا!!!

بعدها نشرت صحيفة “ماركا” الإسبانية، تقرير قالت فيه أنه بعد حوالي نصف ساعة من بداية المؤتمر اللي حصلت فيه اللقطة، انخفض سهم الشركة بنسبة 1.6% في سوق الأسهم، وخلت اسهم كوكاكولا تنزل من 242 مليار دولار إلى 238، ووصلت الخساير إلى 4 مليارات دولار!!!

هل ممكن يكونوا بيتفقوا علي الـBrand Attack؟

99% من حملات الـBrand Attack بتكون مدبرة بين البراندات عشان الكل يستفيد منها وفيه 1% بتكون بتحصل صدفة

أخر مرة شفت فيها إعلان Brand Attack امتي؟ وهل حسيت انهم متفقين؟

من أيام تم اطلاق iPhone 15 و اللي عشاقه تسابقوا عشان يحجزوه رغم سعره، في الـ Blog دا هنعرف ايه Features iPhone 15 و هل فعلاً في تطور ملحوظ و يستحق السعر و لالا ؟

الموبايل أطلق بإسم The titanium iPhone 15 Pro 

شركة Apple اعتبرته أقوى iPhone تم تصنيعه على الإطلاق، الموبايل اتعمل بتصميم جديد من التيتانيوم المستخدم في صناعة الطائرات يعني أخف طراز أتعمل، ووصفوا معدنة بإنه” وزنة خفيف لدرجة تكفي إنه يطلع الفضاء و متين لدرجة تكفي العودة من الفضاء للأرض ” 

مميزاتiPhone 15

من أهم المميزات اللي بدأوا بيها الـ Launching انهم اهتموا جداً يرفعوا من Performance الـ iPhone 15 Pro من الـ A17 Pro chip، مع وحدة معالجة رسومات جديدة سداسية النواة ومحرك عصبي أسرع.

الموبايل USB – C Connector و سرعة الشحن Super fast.  

الـ Action Button بقي دلوقتي متعدد الاستخدامات و بقي Customized action button عشان يكون أسهل و أسرع انك توصل للـ Feature اللي تحددها من ما تبدأ أول تشغل الكاميرا لحد Shortcut activation.

أما بالنسبة للكاميرا فوصفوها بوجود سبع عدسات احترافية جاهزة للقطة،يتراوح الطول البؤري من 13 ملم في الكاميرا في Ultra Wide lenses.

إلى 120 ملم في الكاميرا المقربة 5x الجديدة على ايفون 15 برو ماكس. 

الكاميرا بلنس كبيرة  – huge telephoto lens 

و الجامد بقى إنها 48-megapixel في الكاميرا الرئيسية يعني بتحقق super-high resolution للصور.

وكمان دلوقتي تقدر تعمل الصورة Portrait بعد التصوير 

ولو جينا في جزء تصوير الفيديو وصناعة الأفلام هنلاقي إن هتقدر دلوقتي تسجيل مباشرة على محرك أقراص خارجي – external drive و كمان iPhone 15 Pro فيه إمكانية التصوير بدقة ProRes 4K بمعدل 60 Frame في الثانية.

اه،  نسيت أقولك إن iPhone 15 , iPhone 15 Plus متوفر بخمس ألوان و iPhone 15 Pro , iPhone 15 Pro Max متوفر بأربع ألوان 

iPhone 15 Pro هو موبايل فعلا ذكي و متميز جداً بيقدم الأفضل من كل الجوانب: معالج قوي، ونظام كاميرا متعدد الاستخدامات، وتصميم متين. 

من رأي دا الموبايل المثالي و لكنة هيفيد فئة محدودة زي البلوجرز و الإنفلوسرز اللاعبين والمصورين والمخرجين السينمائيين. 

بعد كل اللي قولناه قدرت تحدد السعر فعلاً اللي هو بيترواح بين 799$ الي 1199$ مناسب مع الإمكانيات و الـ Value اللي بيقدمة ولالا Overrated ؟ 

ازاي ريدبول قدرت تنافس الشركات الكبيرة زي كوكاكولا وبيبسي ونزلت بمنتج الناس عمرها ماسمعت عنه ولا عمرها شافته وكمان تبيعه بخمس او ست اضعاف سعر المنافس وتبقي ملهمة لكل رجال الاعمال بسبب تفكيرهم اللي عدي بمنتجهم فعلا وبقت قصتهم بتدرس في كتب التسويق وريادة الاعمال. هل الكذب مبرر للتسويق ؟

تفكير برة الصندوق

في تمانينات القرن ال فات، أول ما دخل ريدبول السوق في لندن. كان تفكيرهم في البداية انهم يستخدموا الأساليب التقليدية في التسويق زي الجرايد والمجلات والراديو والتليفزيون.. إلا ان فريق التسويق كان عنده بعد نظر وكان عنده رأي مختلف انهم يجربوا حاجة جديدة محدش عملها ولا متوقع ان حد يعملها عشان من خلالها يقدروا يقنعوا الناس انهم يجربوا المنتج الجديد دا لأن دايما الطبيعة البشرية بيحبوا يعرفوا ايه اللي بيعمله غيره فلو حصل ان مجموعة من الناس بدأت تشرب مشروب معين دا هيثير الفضول في الناس التانية انهم يجربوهه طالما عددهم كبير.

اي اللي ممكن يحصلك لو وانت ماشي في الشارع في يوم ولقيت ان كل ركن مليان بعلب فاضية لمنتج معين طبعا دا هيثير فضولك وهيخلي عندك رغبة انك عايز تجرب المنتج دا أو انك تناقش الموضوع مع صحابك . دا اللي حصل في لندن وقتها فريق التسويق عمل حملة ضخمة في كل مناطق العاصمة في لندن اللي بيتجمع فيها الشباب لإن بالنسبالهم هي افضل فئة مستهلكة لمشروب الطاقة ريدبول.

وقتها استهدفت خطة التسويق الاماكن القريبة من ال Night clubs والجامعات وأماكن الشغل… وملوا كل ركن فيها بعلب فاضية من الريدبول ومش بس كدا دول عملوا عينات مجانية للناس اللي بتشتغل في ال Night clubs وخاصة اللي شغالين علي ال دي جي لانهم طول الحفلة الشباب باصينلهم وبيرقصوا فطبيعي ان يكون عندهم فضول هي الناس دي بتشرب اي وتاني يوم لقوا كميات كبيرة من العلب الفاضية في النفايات ومن هنا حققوا هدفهم وبدأ الناس يشتروا المنتج ويجربوه وخاصة الشباب وابتدت النوادي الليلة تعتمده من بعد عدد النفايات اللي لاقوها.

وبعد وقت كبير جدا من الخدعة التسويقية دي ريدبول وصلت مبيعاته في انجلترا 3 مليار دولار في السنوات الاخيرة والكتير بينقل قصة نجاح ريدبول علي انها عبقرية تسويق بالرغم من انه تصرف خبيث من وجهة نظري لانه اعتمد علي الكذب.

المبدأ اللي قامت عليه ريدبول !

ريدبول قامت علي مبدا الكذب والخداع لانها قالت ان الناس كلها تستعمل منتجي فعلا – ودي كانت الرسالة اللي عايزين ينقلوها للناس، ونجحوا فيها، لكن هيفضل  السؤال بقى،  هي فعلا رسالة صادقة؟

في الوقت دا لا. لان لما براند كبيرة تكذب في شئ ايه ال هيمنعها انها تكذب في حاجات كتير بعد كدا ؟ لنفترض ان دا امر طبيعي وكتير من البراندات الكبيرة والمشهورة بتعمل كدا.

تخيل انك صحيت يوم لقيت ان كل شوارع مدينتك فيها عبوات فاضية من مشروب معين وانا ولا كلمتك عن فوايده ولا حتي اضراره انه بيسبب مشاكل في القلب او ادمان وكمان قلتلك ان في اطباء بتنصح بيه ؟ هل الكذب في الحالة دي مقبول؟

وفي النهاية,  الكذب عمره ما كان مبرر للتسويق حتي لو كلهم بيكدبوا حتي لو شركة كبيرة ومشهورة خدعت جمهورها وكذبت عليهم عشان تقنعهم بمنتجها لان دايما الكذب عواقبه سيئة. في 2009 هيئة الحفاظ علي البيئة في لندن فرضت علي ريدبول غرامة وصلت ل نص مليون دولار بسبب فشل ريدبول في انها تجمع وتعيد تدوير بقايا منتجها في الشوارع لمدة سنوات كتيرة.