التنافس بين اديداس وبوما من زمان اوي مش حاجة جديدة علينا لدرجة ان فيه حروب تسويقية قامت بينهم وف الآخر توصلوا لـ معاهدة سلام….
بداية الحرب
في الستينيات وأوائل السبعينيات كده ابتدت فكرة رعاية السوبرستار من البراندات الكبيرة، وبالذات اديداس وبوما حتي انهم كانوا بيتسابقوا علي نجوم الرياضة في كاس العالم عشان تمضي معاهم وفي الوقت ده كان من ألمع نجوم الرياضة….نجم الكورة بيليه
وعشان الاتنين كانوا بيحاولوا كتير يمضوا مع بيليه في الآخر اتفقوا علي معاهدة بينهم اتسمت بـ “معاهدة بيليه“…
معاهدة بيليه 1960…
هي معاهدة بين شركة اديديس وبوما علي عدم استخدام اللاعب بيليه في اي حملات إعلانية لأي من الشركتين.
بس اللي حصل بعد كده مكنش متوقع!!!
خرق المعاهدة
في مونديال 1970 براند بوما استخدم خدعة التسويق الغير مباشر لما بعت مندوبه في السر لنجم الكورة بيليه واتفق معاه علي انه يلبس حذاء بوما في مباراة البرازيل وبيرو مقابل عقد قيمته 120 ألف دولار!!!
وكان الشرط الأساسي للاتفاقية بين مندوب بوما و بيليه هو “ان يتم الترويج للحذاء بطريقة غير مباشرة وغير واضحة”.
السيناريو كالآتي…
قبل بداية المبارة استأذن بيليه الحكم عشان يربط حذائه وساعتها ركز مخرج المباراة معاه وبالتالي الكاميرات…العالم كله شاف حذاء بيليه عليه شعار شركة “بوما”
( يٌقال أن شركة بوما دفعت فلوس للمخرجين والمصورين )
ووصلت مبيعات شركة بوما لـ300% ده غير العوائد الإقتصادية!!
