بعد وقت كبير من الإنكار والسخرية علي كل اللي بيتكلم عن الفضائيين والأطباق الطائرة

آقر الأمريكيون أخيراً برصدهم أجساماً غريبة معرفوش يحددوا أصلها…

فإيه هي قصة الأطباق الطائرة المجهولة؟

في الواقع مشاهدات الأطباق الطايرة بتحصل في كل حتة في العالم، وحصلت حتى عندنا هنا في مصر… وتاريخ وجودها على الكوكب ده بيمتد لآلاف السنين في الماضي، لدرجة انه في برديات مصرية قديمة بتوثق ظهورها في سماء مصر في القرن ال 19 قبل الميلاد، في عصر تحتمس التالت!!

تعالي نشوف الأحداث بدأت إزاي؟

الفضائيين وكرة القدم!

يوم 27 أكتوبر سنة 1954، في مدينة فلورنسا في إيطاليا…حصلت حاجة مرعبة قلبت العالم كله وفضلت متصدرة عناوين الصحف والأخبار لشهور بعدها..

في اليوم ده، كان في ماتش كورة قدم بيتلعب ما بين نادي فيورنتينا ونادي بيستواز في قلب إستاد وملعب أرتيميو فرانشي.. لكن فجأة وقدام عيون أكتر من 10 آلاف مشاهد من الجماهير واللعيبة، جت مجموعة من الأجسام الطائرة المجهولة اللي شكلها مختلف عن أي حاجة شفناها قبل كده على كوكب الأرض، ووقفت في السما فوق الإستاد بالضبط!!

الناس وقتها فضلوا بيبصوا للأجسام الغريبة دي وهما مرعوبين ومش عارفين يتصرفوا ازاي، ومحدش كان قادر حتى ينطق.. وشكلها على حسب وصفهم كان طويل ورفيع شبه أعقاب السجاير.. وبعد شوية صمت ومراقبة، الأجسام الغريبة دي طارت لبعيد في السما بسرعة مذهلة، لحد ما اختفت تمامًا، وسابت الناس وراها مش عارفين ينطقوا من كمية الذهول والرعب..

تخيل أنت بقي المشهد بخيالك كده…أكتر من 10 آلاف شخص مع بعض شافوها ف نفس اللحظة، والحادثة دي اتوثقت في الجرايد والأخبار بعدها!! والمذهل أكتر بقى إن دي مكنتش أول مرة…عشان المشهد والتجربة دي اتكررت مرات كتير أوي قبلها وبعدها بشكل غامض ومالوش تفسير.. ناس كتير أوي في أماكن مختلفة من العالم ومن مختلفة الثقافات والوظائف سواء المدنيين أو العسكريين قالوا انهم بيشوفوا الأجسام دي، وانها ليها أشكال كتير، وكلهم مختلفين عن أي شيء موجود عندنا هنا على الأرض..

بس أكتر شكل اتشهر فيهم هو الشكل اللي ارتبط بالإسم اللي اتعرفت بيه الظاهرة دي.. الأطباق الطايرة أو الـ UFOs، واللي اتغير اسمها في العصر الحديث للـ UAPs.. ودي بقى تاريخها بيرجع لقبلها ب 8 سنين بالظبط، في أشهر مشاهدة ليها في التاريخ، واللي بدأ معاها كل حاجة 

بالونة استطلاع!!

يوم 24 يونيو سنة 1947، الطيار الأمريكي كينيث أرنولد شاف تشكيلة من 9 أجسام غريبة شكلها دائري زي الأطباق، طايرة في السما فوق جبل ماونت رينر جنوب مدينة سياتل، في شكل حرف V، على سرعات خارقة بمقاييس العصر ده، قدرها بما لا يقل عن 1900 كيلومتر في الساعة.. يعني أكتر من ضعفين سرعة الصوت!!.. والمشاهدة دي بقى كانت هي البداية لمصطلح الأطباق الطايرة اللي انتشر في العالم كله بعدها..

وبعد الحادثة بكام يوم…حصلت أشهر حادثة في تاريخ الأطباق الطايرة على الإطلاق، اللي سموها حادثة روزويل…واللي حصل بالظبط هو إن في مزارع اسمه ويليام بريزيل William Brazel قدم بلاغ لجورج ويلكوكس اللي هو الشريف بتاع مدينة روزويل في نيو ميكسيكو في أمريكا، أنه شاف قطع من حطام ضخم واقع في مزرعة بره المدينة.. ولما القصة انتشرت، جت لجنة من قوات الطيران الأمريكية فحصت الحطام وخدت أجزاء كتير منه معاهم، وقفلوا المكان كله!!

وبعدها طلع تصريح منهم يوم 8 يوليو إنهم لقوا طبق طاير وقع على مزرعة جنب روزويل.. بس لما الخبر انتشر وبقى تريند وقلب الدنيا، رجعوا غيروا كلامهم وقالوا انه كان مجرد بالونة استطلاع للطقس!!

ولو أنت بتسأل جواك هي ليه الأحداث دي بتحصل في أمريكا بس، واشمعنا الدولة دي من باقى دول العالم، فخليني أقولك انك غلطان، عشان الأحداث دي مش بس بتحصل في أمريكا، بل في كل دول العالم تقريبًا وكتير جدًا بشكل مخيف فعلًا.. لكن سبب كون أمريكا أكتر بلد ظاهرة في الصورة، هو ان عندهم إعلام بيتكلم عن الموضوع فعلاً ومش بيخبيه، وعندهم كونجرس واخد الموضوع بجدية وبيناقشه فعلًا..

باقي البلاد يا إما بتعتم على المشاهدات دي اعلاميًا، يا إما بتضيق على اللي مر بيها وتعتبره مجنون أو تسجنه، يا إما في حالة البلاد العربية بيعتبروا الأشياء اللي زي دي ظواهر خارقة للطبيعة وبيربطوها بالجن والشياطين.. بس بتحصل كتير…هحكيلك…

خد عندك مثلا الأحداث اللي بدأت تحصل من أول شهر نوفمبر سنة 1989 في بلجيكا لما ناس كتير جدًا قدموا بلاغات انهم بيشوفوا أجسام غريبة في السما.. وفعلا الطيارين الحربيين طاردوا الأجسام الغريبة دي على مدار شهور طويلة استمرت لحد بداية سنة 90، ومقدروش يعترضوا ولا واحد منها..

وفي يوم 27 ديسمبر سنة 1980، دورية أمنية في بريطانيا في مدينة اسمها سوفولك، شافوا مجموعة من الأنوار الغريبة وهي بتهبط جوه غابة مشهورة هناك إسمها غابة رينديلشام.. وفي الأول كانوا فاكرينها شظايا مولعة من حطام طيارة.. ولما دخلوا عشان يستكشفوا اللي شافوه، اتفاجئوا بجسم معدني غريب بيطير على ارتفاع قريب جدا من الأرض فوق الأشجار، وبينور بألوان كتير..

لما قربوا منه، ابتدا الجسم يبعد ويتحرك وسط الشجر لحد ما اختفى، وفي نفس الوقت الحيوانات اللي كانت في مزرعة قريبة حصلها حالة هيجان ورعب.. والموضوع بعد كده اتطور أكتر وناس كتير شافوا أضواء وأجسام غريبة في السما اليومين اللي بعدها، بس محدش قدر يلحق أي واحد منها.. وعايز أقولك ان الحادثة دي اتشهرت جدًا لدرجة انهم سموها حادثة روزويل بتاعت بريطانيا…

ولو انت كنت فاكر ان الأحدث دي بدأت تحصل وتتشاف بس في العصر الحديث من ساعة موضوع الطيار الأمريكي كينيث أرنولد ده بس، فخليني أقولك المفاجأة…في تسجيلات ووثائق بتعود لأوقات قديمة جدًا بتتكلم عن الأجسام الغريبة دي وان الناس شافوها في عصر سبق وجود التكنولوجيا من الأساس!

تحتمس والفضائيين…!

في بردية مصرية مشهورة اسمها بردية توللي Tulli، يقال انها بترجع لعصر تحتمس الثالث، وكانت مع مدير متحف في الفاتيكان اسمه ألبيرتو توللي، ومكتوب فيها حسب ترجمته الغير مؤكدة إن الكُتّاب بتوع الملك تحتمس الثالث شافوا وسجلوا ظهور أجسام دائرية مشتعلة أشبه بالأطباق أو الديسكات بتطير فوق سماء مصر الفرعونية!!

ومش بس كده.. ده كمان عندك واحد من أشهر المؤرخين الرومانيين، اللي اسمه تيتيوس ليفيوس أو ليفي Levi قال في سجلاته إنه سنة 214 قبل الميلاد، شاف معجزات في السماء على حسب وصفه.. والمعجزات دي كانت عبارة عن عدد ضخم من السفن الشبحية بتطير فوق سماء روما القديمة بطريقة تنافي العقل والمنطق، وأقرب للسحر!!

الحاج حنفي!

في مصر بقي… فيه حادثة من أشهر حوادث الأطباق الطايرة على الاطلاق، حصلت في قرية (كولة أبو ليلة) في الصعيد، واتكلم عنها د. نبيل فاروق قبل كده…

اللي حصل بالظبط هو انه في الخمسينات من القرن الماضي، وأثناء الحروب ما بيننا مصر وبين إسرائيل…أهل القرية دي صحيوا في يوم على صوت هدير عالي شبه المحركات، ولما خرجوا يشوفوا إيه سببه اتفاجئوا بالمشهد اللي قدامهم!!

طيارة غريبة شكلها دائري ومش شبه أي حاجة كانت موجودة في الوقت ده زمان، بتهبط على أرض القرية وبيخرج منها كائنين تركيبهم التشريحي شبيه بالبشر لكنهم أطول قليلًا، وباين عليهم انهم راجل وست، ولبسهم عبارة عن قطعة واحدة لامعة زي بدل الفضاء، ولابسين خوذ لامعة..

حسب الحكاية المعروفة لأي حد في الصعيد، ف الناس هجموا عليهم وقتلوهم وفككوا الطيارة الغريبة بتاعتهم دي وخدوا منها أجزاء اتوزعت على العائلات الكبيرة هناك.. ولحد يومنا هذا يظل في اجزاء منها موجودة معاهم، ود. نبيل فاروق نفسه شاف واحدة منهم وحكى عنها وقال انها قطعة من مركبة غير أرضية ولا تشبه أي تكنولوجيا أرضية.. والقطعة دي حسب كلامه كانت مع شخص اسمه (الحاج حنفي)!

ده غير ان القرية دي اصلا فيها ظواهر غريبة وأحجار غريبة موجودة هناك، بردو مرتبطة بالحوادث المجهولة دي، وبيقولوا انهم بيشوفوا فيها كتير أنوار غريبة في السما وأحداث مالهاش تفسير..

المعظم من الناس البسيطة هيربطوها بالجن والشياطين..انت بقى إيه رأيك؟!..

تخيل معايا لو أنت واقف في وسط مجموعة من الناس وفجأة وبدون أي مقدمات لقيت ان رجليهم مش شبه رجل البشر! لا وكمان ملامحهم بدأت تتغير للأسوأ! هتحس بإيه؟!

مين كان يتخيل إن السبب في إعتزال الفنانة نورا الطقاقة حادث مُرعب ليه علاقة بالجن والعفاريت؟!

خليني في البداية أقولك مين هيّ نورا الطقاقة..؟!

الموضوع بدأ في التسعينات لما ظهرت مطربة شعبية خليجية من الكويت اسمها نورا أو زي مكانوا بيقولوا لها نورا الطقاقة…

نورا كانت بتتميز بصوتها القوي والجو المفرح اللي كانت بتعمله في حفلاتها..ده غير أنها هي إللي كانت بتألف أغانيها…وأوقات كتير بتلحنها…

ولأن الوقت ده كانت الافراح كلها بتقوم علي حس الفرق الموسيقية واللي غالباً كانت بتبقي فرقة نورا الطقاقة..!

نورا وفرقتها سافروا بلاد خليجية كتير جدا وغنوا في أفراح إمراء وملوك وناس عادية، وكان الوطن العربي كله يعرف نورا الطقاقة..!

الأمور لحد هنا كانت طبيعية ومفيش حاجة مريبة..!

لحد ما في يوم نورا وفرقتها أعتزلوا الغنا ولغوا كل جدولهم وأفراحهم الجاية واختفوا…تفتكر ايه السبب؟

مكالمة غريبة…

في يوم نورا كانت قاعدة في بيتها في يوم الأجازة بتاعها واللي كانت بتريح فيه من تعب الشغل طول الأسبوع، بس في اليوم ده نورا جالها مكالمة تليفونية…ولما نورا رفعت السماعة عشان تشوف مين اللي بيرن لقت صوت واحدة بتقولها انها نفسها تيجي عشان تحيي فرح بنتها..بس نورا رفضت بحكم انها مشغولة وعندها أفراح كتير وخصوصًا ان اليوم ده كان أجازتها…وبعد إلحاح كبير من الست دي بإن بنتها قلبها هيتكسر لو نورا مراحتش الفرح، نورا وافقت وسألتها عن العنوان وعن ميعاد الفرح، وعرفت ان الفرح في نفس اليوم الساعة ١٠ بليل!

قفلت نورا مع الست دي وكلمت فرقتها وقالتلهم انهم هيروحوا يغنوا في حفلة النهارده وانها عارفه انهم في أجازتهم لكن الست اللي كلمتها اتحايلت عليها ونورا وافقت، ولأن نورا كانت مشهورة جدًا في التوقيت ده قررت انها تلتزم بكلمتها وتروح الفرح!

وجمعت نورا الفرقة بتاعتها عشان تروح الحفل ده، وفي الطريق نورا كانت حاسه انها مش مرتاحة وقلبها مقبوض جدًا، والساعة ٩ بالدقيقة كانت وصلت نورا والفرقة للمكان اللي الست قالتلها عليه، كانت مبهورة أوي…لقت انه مكان راقي جدًا عبارة عن قصر مكون من ٣ أدوار، ومُحاط بالزينة من كُل مكان! ولما وصلوا لقوا راجل واقف مستنيهم، والراجل ده كان والد العروسة، واللي أخدهم ودخلوا جوا القصر واللي بمُجرد ما اتفتح لقوا ناس كتير أوي جوا! 

دخول الفخ!!

دخلت نورا والفرقة للمكان ولقت ان البيت مليان آكل وولايم ، والناس اللي موجودين شكلهم راقي، لكن نورا كانت لسه قلقانة برغم ان كل حاجة طبيعية، ومن الواضح انهم ناس أغنياء جدًا، وبعد دخولهم للمكان لقت نورا ست ضخمة ولابسه أسود جايه ناحيتهم، وشها شكلها مُريب وشاحب، ولما سلمت عليها لقت ان ايديها خشنة وناشفة جدًا، وكمان لقت ان ملمس وشها كمان خشن زي ايديها بالظبط!

وبعد ما سلمت الست دي عليهم دخلتهم أوضة في الدور الأرضي عشان يجهزوا، وبعد ما جهزوا لقوا مجموعة من البنات داخلين الأوضة على انهم مُعجبين عشان يسلموا عليهم، ولما خرجوا من الأوضة…بدأت “شمس” واللي كانت واحدة من الفريق تبص بخوف ورعب لـ باقي الفرقة وهي بتقول: “انها خايفة من الناس دي وقلبها مقبوض، وان البنات دي كانت ايديهم وملمس وشهم خشن جدًا، لا وكمان بمُجرد ما دخلوا الأوضة الحرارة بدأت تزيد بشكل مُبالغ فيه! وان البيت ده فيه حاجة مش طبيعية!”

فـ نورا ردت عليها وقالتلها ان كل دي تخاريف وهلاوس وانهم جايين هيعملوا شُغلهم وهيمشوا على طول، لكن اللي محدش يعرفه ان نورا بردو كان قلبها مقبوض!

عرسان شكلهم مرعب!

وخرجوا عشان يبدؤا شغلهم واتفاجئت نورا بعدد والناس وقالت ان ده أكبر حفل غنائي عملته، لكن الغريب انها شافت العريس بلبس مُختلف تمامًا وكأنه من العصر العُثماني، والعروسة لابسه فُستان أسود ومليان بالألماظ والدهب! وواقف وراهم تمثال على شكل انسان بيصرخ! والأغرب من ده كله ان العريس والعروسة ثابتين مكانهم مبيتحركوش، ولا حتى كانوا بيبصوا لبعض، وكأنهم تماثيل!!

فضلت الفقرة الأولى مستمرة والناس بترقص ومبسوطة، وبعد ما الفقرة خلصت، قررت نورا تطلع ترتاح ولأن من الصعب انها ترتاح في الدور الأرضي فَ طلعت الدور التاني، عشان تتفاجئ لما طلعت ان الدور التاني كله مهجور!!

وان التراب مغطي كل حاجة فيه، لا وكمان الجدران مشقوقة وخيوط العنكبوت مغطياها!!

وفي وسط ذهولها باللي بيحصل وبالمكان ده، لقت اوضة مفتوحة، ولما دخلت لقت ان فيها سرير شكله قديم جدًا، ولأن النوم غلبها وكمان كانت تعبانة بحكم انها نزلت في يوم راحتها، نامت على السرير وكأنها منمتش من شهور!

كابوس…

المشهد اتغير عشان لقت ست ضخمة شكلها بشع بتجري وراها وبتصرخ! بعدها لقت نفسها بتصحى من النوم وانها كانت بتحلم، عشان تتفاجئ ان باب الأوضة بيتقفل عليها، ولما قامت عشان تفتحه اكتشفت انه اتقفل عليها من برا!!

وبعد محاولات اتفتح الباب بالقوة، الباب اتفتح لوحده! أيوة زي ما بقولك كدا

وأول ما اتفتح لقت نورا نفس الست اللي حلمت بيها واقفه قُدام الباب، واختفت فجأة وكأنها مكنتش موجودة!

وأول ما طلعت نورا وفي طريقها عشان تنزل للدور الأرضي، سمعت صوت طفل بينادي عليها! ولما بصت ناحية مصدر الصوت، لقت الطفل ده واقف في زاوية من زوايا الطُرقة، وبدأ يقرب منها لكن في لحظة وقف وبدأ يطلع للدور التالت، فَ نورا قلقت يكون الطفل ده من أولاد المعازيم ويحصله حاجة، فَ طلعت وراه عشان تشوفه، ولما طلعت لقت ان الدور التالت أبشع من منظر الدور التاني! الأرض متهالكة تمامًا والجدران كذلك، وكأن محدش قرب ناحية الدور ده من أكتر من ١٠٠ سنة!

ولما نورا طلعت لقت الطفل ده بيضحك وواقف بعيد ولما بدأت تقرب ناحيته، دخل في أوضة وقفل على نفسه من جوا، ولما نورا قربت من الأوضة دي، لقت ان مفيش اي صوت جوا، فَ بدأت تفتح الباب وتخبط عليه، لكن الباب مفتحش، ولما قررت تنزل لقت ان حد مسك رجلها ومثبتها في الأرض!

ولما حاولت تقاوم وقعت على الأرض وسمعت صوت همس في ودنها بيقول: “غني! أنا بحب صوتك وغُناكي، غني!” ولما سألته أنت مين…قال نفس الجملة لكن بصوت بشع! ولما قالت انها خايفة، اتكلم بنفس الصوت وقالها: “متخافيش، محدش بيموت ناقص عُمر” فكررت سؤالها وقالتله أنت مين، فَ رد عليها وقال: “أنا صديق مُخلص ووفي!“

بعدها نورا تقدر تتمالك نفسها وتجري وتنزل للدور الأرضي! ولما نزلت ودخلت الأوضة اللي غيروا فيها في الدور الأرضي، لقت شمس بتعيط بشكل هستيري وحواليها باقي الفرقة، ولما سألتها ايه اللي حصل، ردت شمس وقالت:

“ان الناس بدؤا يسألوا على نورا، ولما لقتها اتأخرت طلعت شمس للدور التاني عشان تدور عليها، لكنها لما طلعت، اتفاجئت ان الدور التاني كله مهجور، وان الجُدران شكلها قديم وكل حاجة حواليها مُرعبة، وانها حاسه انها مش لوحدها في المكان! ولما بدأت تمشي في الدور التاني شوية، لقت على الجدران وشوش بشرية مرسومة لكن شكلها بشع ومُرعب!

وبعدها بدأت تسمع صوت غريب جاي من اوضة معينة، ولما قربت منها وفتحتها لقت ان مفيش حاجة جوا، ولما طلعت لقت كائن غريب بدأ يظهر من العدم في ركن من أركان الطُرقة!!…بس الكائن ده مكنش له ملامح نهائي، ومفيش غير عينه بس اللي بتنور وباينه، ولقت نفسها بتقرب منه وهي مسلوبة الارادة! ولما قربت منه اتكلم وقال: “غني، أنا بحب صوتك وغُناكي!” لكن بعدها صرخت بأعلى صوت عندها، فَ ضربها!

عشان بعدها تطلع تجري عشان تنزل تحت، وفي طريقها ظهر لها شخص ضخم جدًا من العدم، وسألها ايه اللي جابك هنا! فَ قالتله انها بتدور على نورا! فَ زعقلها وحذرها وقالها متطلعش المكان ده تاني وتنزل بسرعة!!”

فَ بدأت نورا تهديها، وتقولها انها شافت أبشع من كدا، فَ شمس قالتلها انهم لازم يمشوا من المكان، لكن نورا ردت وقالت انهم ممكن يؤذوهم لو حسوا ان نورا وفرقتها عرفوا حاجة! عشان كدا لازم يخرجوا ويكملوا الفقرة التانية وبعدها يمشوا من المكان! فخرجوا تاني وبدؤا في الغُنى!!

صدمة من شكل رجليهم؟!

ولما الساعة جات ١٢ بعد منتصف الليل بدؤا يحسوا بطاقة رهيبة اتملكت من المعازيم، والناس زادت بشكل ملحوظ لأضعاف كبيرة، وبدؤا يرقصوا بشكل هستيري ويغنوا مع الفرقة! وبدأ صوت الناس دي يعلى لدرجة انه غطى على صوت الفرقة!

وكانت كل ما الفرقة تسكت الناس تصقفلهم ويطلبوا انهم يغنوا تاني! وفي وسط اندماجهم ده والطاقة الزايدة دي بدأت الفرقة يتملكها الخوف والفزع المُبالغ فيه!

عشان بعد كدا يتصدموا ان فساتين المعازيم بدأت تترفع ورجولهم مكنتش ارجل بشرية نهائي!!

رجولهم كانت رجول معيز وحيوانات حوافرها طويلة! ووقتها بدأت الفرقة تبص لبعضها بخوف، وبدؤا يغلطوا في الكلام وهما بيغنوا! لكن نورا كانت بتبصلهم وتغمزلهم عشان يكملوا وميوقفوش غُنى!!

وفي وسط الأحداث دي شمس أُغمى عليها، فَـ نورها خدتها الأوضة وبدأت تفوقها، ولما شمس فاقت قالت لنورا انهم لازم يمشوا لأنهم وسط فصائل وعشائر كتير من الجن! فَ نورا قالتلها انها عارفه ده لكن لازم يكملوا وميوقفوش، ولو عايزين يخرجوا سالمين لازم يستنوا لغاية آذان الفجر!

فَ خرجوا تاني وكملوا غُنى وكل دقيقة يبصوا في الساعة اللي الدقيقة فيها كانت بتعدي ببطئ شديد، وفي وسط الغُنى لقوا ست من اللي بترقص بتمسك شعرها وبتشده بقوة شديدة، واللي الشعر اتخلع في ايديها بسهولة، فَ ظنوا ان دي باروكه، لكنهم لقوا الشعر اللي وقع ده مليان دم!

وبدؤا يجيبوا آلات عزف من بتاعهم على شكل كفوف مكتوب عليها رموز وكلمات ورسومات غريبة، وبدؤا يطبلوا بيها ويعزفوا وهما بيرددوا طَلاسم وكلمات مش مفهومة، عشان بعدها أشكالهم تبدأ تتغير لأشكال مُرعبة ومُخيفة! وبدأ العدد يزيد أكتر لحد ما عملوا دايرة حوالين نورا وفرقتها! لكن في اللحظة دي آذان الفجر بدأ يآذن ويعلى، عشان الفرقة تلاقي ان الكائنات دي اتجمدت وبيبصوا ليهم بغضب وبنظرات مُرعبة! وبعدها النور قطع واختفوا نهائي!

بعدها نورا قالت محدش يصرخ وفي هدوء ياخدوا بعضهم ويمشوا، ولما خرجوا من المكان لقوا راجل كبير جي ناحيتهم والغريب ان الراجل ده خايف منهم وهما كمان خايفين منه!

ولما سألهم انتو مين، قالوله انهم فرقة أفراح وجايه تحيي الفرح اللي موجود في البيت ده، ولما بصوا على البيت لقوه مهجور تمامًا، مفيهوش زينة ولا النور شغال!!

فَـرد عليهم الراجل وقال ان المنطقة دي مهجورة، وخصوصًا البيت ده مهجور بقاله اكتر من ١٠ سنين، وانه كمان مسكون، والراجل وأصحاب المنطقة أكدوا لنورا ان البيت فاضي تمامًا وأصحابه مبيقربوش منه، ومستحيل يحصل فيه فرح!

وكمان اكدوا انهم بيسمعوا بليل اصوات غريبة وصُراخات خارجه من البيت! لكن محدش منهم شاف حاجة لأن محدش بيقرب من المنطقة دي بليل!

ودي كانت اخر حاجة حكتها نورا في الليلة دي لصحفي كان مصمم يعرف ايه حكاية اعتزالها بسبب انها كانت رافضه انها تتكلم عن السبب!

إعتزالها للفن

قالت نورا ان بعد قرار الاعتزال بفترة شمس رنت عليها وقالتلها انها لسه بتشوف نفس الشخص اللي وشه من غير ملامح وعينيه بتنور وهو بيقولها: “غني، أنا بحب صوتك وغُناكي!”

لكن بعد فترة شمس ماتت في ظروف غامضة وفي يوم الدفنة نورا شافت الشخص اللي كان بيطلب منها تغني لما كانوا في البيت لما كان ماسك رجلها، وكان بيقولها جملة واحدة هي سمعتها منه قبل كدا: “محدش بيموت ناقص عُمر!”

ومن بعد انتشار حكاية نورا بدأت الناس تخاف تروح الأفراح الشعبية اعتقادًا منهم ان فيها جن متجسد خصوصًا ان العزف عندهم كان على الدُف فَ الحفلات كانت بتبقى اشبه بالزار!

وبعدها بفترة كلام نورا اللي الصحفي ده سجله اختفى ومحدش يعرف راح فين!…والمُرعب ان الصحفي ده مات في ظروف غامضة بعد التسجيل ده بفترة قصيرة جدًا، وقبل موته قال ان نورا لما راحلها كان وشها شاحب جدًا، وان البخور كان مالي بيتها ووزنها كان خاسس بطريقة فظيعة!

عشان حكاية نورا تنتشر وتتعرف بعد التسجيل ده، ولحد دلوقت الحكاية دي منتشرة في دول الخليج وخصوصًا في الكويت في بلد نورا!!

وفي كلام انتشر ان جماعة الجن اللي الفرقة راحت ليهم كانوا مراهنين جماعة تانية من الجن على مين هيقدر يجيب نورا لحد عنده عشان تغني لهم!

مين اللي كلم نورا عشان تروح الحفلة؟

اتقال ان اللي كلم نورا هو ساحر كبير قِدر انه يقدم الخدمة دي لعشائر الجن واللي هم أساسًا من نسل شيطاني عشان يحصل على خدمات الشياطين دول، وانهم كانوا هما اللي مشترطين ان نورا تعملهم حفلة ليهم لوحدهم!!

يوم 5 ديسمبر سنة 1945 جت رسالة استغاثة غريبة جداً!…بيقولهم فيها الطيار ان البوصلة فيها مشكلة، وقالهم بالحرف كدا “فيه حاجة مش طبيعية بتحصل، احنا مش عارفين نحدد موقعنا، ومش قادرين نتحكم في أي حاجة في الطيارة، في شيء بيشدنا لمكان مجهول، ارجوكم تلحقونا!”…صوت صريخ! بعدها الصوت اختفي!!!

ايه اللي وداهم هناك وايه سر اختفائهم؟!

الرحلة 19

الرحلة 19 كانت عبارة عن سرب من خمس طيارات تابعة للبحرية الأمريكية، عليها 14 طيار وكانوا رايحين في مهمة تدريبية عادية فوق جزر البهاما…الرحلة المفروض مكنتش هتاخد اكتر من 4 ساعات بس الغريب انها فضلت كتير ومرجعتش، لحد ما وصلت لـ أبراج المراقبة رسايل استغاثة من سرب الطيارات وبعدها اتقطع الاتصال ومرجعتش لحد دلوقتي!!

طبعاً البحرية الأمريكية بعتت طيارات إنقاذ عشان تدور عليهم…بس حصلت حاجة غريبة أثناء البحث عن الطيارات المفقودة؟ واحدة من الطيارات اللي كانت رايحة تنقذهم انفجرت في الجو!من غير أي سبب!!

مثلث برمودا؟!

مكان موجود في منطقة اسمها ” برمودا “ في الجزء الغربي من المحيط الأطلسي المجاور للساحل الجنوبي لولاية فلوريدا، وبيشمل المثلث فلوريدا وجزر برمودا وجزر البهاما. 

ليه اتسمي مثلث برمودا؟!

اتسمي بـ مثلث برمودا نسبة للـ جزر برمودا اللي بتتكون من 300 جزيرة، بس مش كل الجزر دي مأهولة للسكن، هما ٣٠ جزيرة صالحة للسكن و عاصمتها ” هاملتون ” وموجودة في الجزيرة الأم..

أشهر حوادث الإختفاء في مثلث برمودا ؟!

سنة 1812 اختفت سفينة كان فيها “ثيودوسيا بور ألستن” بنت نائب الرئيس الأمريكي السابق “آرون بور ألستن”

السفينة كانت مسافرة من شارلستون لـ نيويورك لكن فجأة السفينة اختفت وانقلبت الدنيا في وقتها وبرده محدش لقي السفينة لحد دلوقتي!

إلين أوستين..السفينة دي كان فيها طاقم فاز بالسفينة دي كجايزة يعني…وفي سنة 1881 حاولوا يبحروا بيها بس السفينة اختفت، وظهرت مرة تانية بس كانت فاضية!.. بعدها فاز بيها طاقم تاني وابحر بيها واختفت مرة تاني !.. والكلام ده إتثبت في تحقيقات لسجلات لويدز لندن…والغريب كمان ان مفيش اي قوائم بأسماء ضحايا السفينة!!!

دييرنغ…ودي بقي كانت مركبة شراعية اتبنت سنة 1919. وابتدت تبحر في 20 مارس 1920 في مهمة لنقل الفحم. وكانت آخر مرة ظهرت فيها السفينة في 28 يناير سنة 1921 لما شافتها سفينة ضوئية في كارولاينا الشمالية. وكان بيقود السفينة الضوئية دي القائد “جاكويسون” وقال إن كان في رجل شعره احمر قاله بلكنة أجنبية ان السفينة فقدت مراسيها!!

سجل جاكوبسون الملحوظة وحاول انه يبعت اشارة راديو لكنه فشل. ولاحظ ان طاقم السفينة موجود في المنطقة الأمامية للسفينة، ودي كانت منطقة ممنوعة انهم يكونوا فيها، وبعدها اختفت السفينة ، ولقوها مهجورة في 31 يناير سنة 1921 في دياموند شولز قرب كيب هاتيراس في كارولاينا الشمالية… وكان فيه اشاعات ان ” دييرنغ ” كانت ضحية القرصنة، بس الغريب انهم لقوا اكل جاهز لتاني يوم!

دوغلاس دي سي…في 28 ديسمبر 1948، اختفت طائرة لما كانت في رحلة من سان خوان ، بورتوريكو لـ ميامي. ومكنش فيه أثر للطيارة ولا لـ32 شخص اللي كانوا عليها!!

بس كان في مستندات اتجمعت من مجلس التحقيق الطيراني، اتذكر فيها أن سبب اختفاء الطائرة أنها لمست أطراف المثلث، وان بطاريات الطائرة كان شحنها منخفض…واللي اتقال وقتها أن فيه قوة غامضة سحبتها واختفت!

كي سي 135…في سنة 1963 حصلت حادثة غامضة جداً…فيه طائرتين امركيتين اختفوا فوق مثلث برمودا. وبعد كذا يوم لقوا حطامها في منطقة قديمة، ومحدش قدر يفسر سبب الحادثة..

بعد الحادثة دي بالذات بدأت تظهر نظريات كتير حوالين مثلث برمودا، ومن النظريات دي أن في طاقة مجهولة ناتجة من أهرامات ضخمة من الكريستال، بيستخدمها سكان جزر برمودا في توليد الطاقة…

 كمان فيه نظرية بتقول ان في مثلث برمودا فيه بوابات زمنية عبر السحب الموجودة في النقطة دي، بتنقل السفن والطيارات لـعالم تاني مختلف عن عالمنا!..

بيختفوا فين بالظبط!

الاختفاء بيحصل في مثلث برمودا في منطقة اسمها “بحر سارجاسو” في شمال غرب المحيط الأطلنطي…

الملاحين اللي شغالين في بحر سارجوس شافوا حاجات مرعبة أثناء رحلتهم ، حتى انهم اطلقوا عليه اكتر من اسم منها اسم ” بحر الرعب ” و”مقبرة الأطلنطي ” ، فهو بحر ميت تماما وهادي جدا ، مفهوش اي حركة، ولا تيارات هوائية ولا رياح وحتى مش بيعيش عليه أي نوع من الأسماك!..

تفسيرات كتير…

غاز الميثان

غاز الميثان من التفسيرات اللي اتقالت في حوادث الاختفاء في مثلث برمودا، اتقال ان في كميات كبيرة من هيدرات الميثان، وده شكل من أشكال الغاز الطبيعي في المنطقة..

وتم اثبات في أحد التجارب أن فقاعات الميثان تقدر انها تغرق سفينة كاملة ومن عملية خفض كثافة المياه، وان انفجارات غاز الميثان الدورية واللي بتتسمى “البراكين الطينية” بتنتج كميات كبيرة من المياه الراوية، اللي بينتج عن الانفجارات دي ان السفينة أنها لا تقدر على حمل وتوفير الطفو للسفن وده بيؤدي لغرقها بسرعة كبيرة من غير اي سابق انذار..

سحب سداسية

رصد العلماء سحب سداسية الأضلاع، قالوا انها بتسبب عواصف ورياح بسرعة 273 كيلومتر في الساعة في منطقة مثلث برمودا!.. تخيل قوة العواصف اللي من المستحيل أن أي سفينة تتحمل قوة العواصف والرياح دي…

نظرية الزلزال

هنا بيحصل هزات أرضية قوية في قاع المحيط وبتولد موجات عالية وعنيفة ومفاجئة بتخلي السفن تغطس وتتجه الى القاع بشدة في لحظات قليلة!..

أما عن الطيارات، لما بيحصل الهزات والموجات في جميع أرجاء المثلث بيؤدي إلى اختلال في توازن الطائرة ومش بتقدر تتحمل السيطرة فبتسقط جوة الدوامة!..

الحبار العملاق

نوع من أنواع الكائنات البحرية، ضخم جدا بيوصل حجمه لـ 9 متر، ويمكنه انه يلتهم السفن مع الطاقم! …

تم طرح الفرضية دي لاول مرة ، عن وجود الحبار الضخم ، من علماء الأحياء البحرية من اليابان ” تسوتيمي كوبودر وكيويتشي موري ” سنة 2005 وتمكنوا من تصوير حيوان البطلينوس الضخم اللي هاجم بقوة خط الطعوم!..

وقال سيمون: “أسطورة الحبار العملاق مش خيال، الرخويات دي موجودة فعلاً، وطولها ممكن يوصل لـ 150 قدم”…

الضباب الالكتروني؟!

في اتنين اسمهم “روب ماكجريجور” و “بروس جيرنون” كتبوا كتاب اسمه ” الضباب “ كان ” جيرنون ” أول شاهد نجا من الظاهرة الغريبة في مثلث برمودا…

في سنة 1970 كان ” جيرنون ” هو وأبوه في طيارة فوق جزر البهاما، كانوا رايحين لمنطقة اسمها (لبينيمي) حصلهم حاجة غريبة جداً، كان في دوامة أشبه بنفق النفق وكانت تحتك في أجنحة الطائرة وهما بيحلقوا، اتعطلت كل أدوات الملاحة الالكترونية والمغناطيسية و البوصلة المغناطيسية وفضلت تدور بسرعة جنونية لا يمكن تفسيره! ..

دخلوا جوة النفق، مبقوش شايفين السماء، مش شايفين غير بياض مايل للرمادي وباهت اللون، مفيش ولا محيط ولا سماء!…وبعد طيران دام 34 دقيقة لقوا نفسهم فوق شاطئ ميامي، الرحلة دي خدت منهم 72 دقيقة، واعتقد ( ماكجريجور ) و ( جيرنون ) بأن الضباب الالكتروني هو المسؤول عن اختفاء الرحلة 19 وطائرات وسفن…

أغرب نظرية اتقالت عن مثلث برمودا ؟!

د.كينيث ماكاول كان عنده اعتقاد أن منطقة برمودا مسكونة بأرواح العبيد الأفارقة اللي انتقلوا غصب لـ امريكا، وقال ده في كتابه ” علاج المسكون ” Healing The Haunted ، كتب عن تجربة غريبة؟…

كان (ماكاول) بيبحر في منطقة برمودا وقال ” كنت في المركبة بتستمع بالهواء الدافي المشبع بالبخار، سمعت اصوات غريبة، اصوات غناء حزين! قال لنفسه ان في اسطوانة مسجلة أكيد افراد الطاقم هما اللي مشغلينها بس الغناء فضل مستمر لحد الليلة التالية…في الآخر نزل المركبة عشان يسأل مين مشغل الاسطوانية دي ويقفلها، بس الاصوات تحت كانت نفس الاصوات في أي مكان تاني؟ يعني الصوت موجود في كل مكان بالسفينة! كان كل أفراد الطاقم محتارين بسبب الاصوات اللي مش بتقف!”…

بعدها عرف (كينيث ماكاول) ان ملاحي السفن البريطانية في القرن 18 كانوا بيرموا العبيد في البحر قصاد الفلوس !!!

في الآخر دي كلها تخمينات، بس محدش عارف الحقيقة فين؟!

وبالنسبالك أكيد فيه تفسير ممكن تميل ليه أيان كان ايه!!

في 4 نوفمبر سنة 1922 انقطعت الكهربا لمدة 15 دقيقة عن القاهرة كلها وده كان في نفس توقيت فتح مقبرة توت عنخ آمون…معظم الناس وقتها قالوا انها صدفة، لكن فيه ناس تانية قالوا انها لعنة الفراعنة !! 

لعنة الفراعنة؟!

بص يسيدي أيام الفراعنة لما كان فيه حد بيموت بالتحديد الملوك كان بيدفن مع كل ممتلكاته… الدهب وكل حاجة تخصه لأن حسب اعتقادهم انهم بعد ما يموتوا هيرجعوا للحياة تاني!!

و طبعا الدهب ده ممكن يتسرق فعشان كده كانوا بيخلوا الكهنة والسحرة الكبار يعملوا سحر أو لعنة لحماية الكنوز من السرقة!…

أشهر لعنة في العالم

الحكاية بتبدأ في مصر سنة 1922م، لما عالم الآثار هوارد كارتر واللورد كارنارفون بيكتشفوا أعظم اكتشاف في العالم، مقبرة “توت عنخ آمون”، اللي قلبت العالم كله وقتها.

المقبرة دي حرفيًا كان فيها كنز مهول لدرجة إن مفيش أي ملك فرعوني تم اكتشاف مقبرته ولقوا معاه كمية الدهب والآثار دي، دا غير إن كان فيه خنجر في المقبرة لحد دلوقتي مش معروف هو اتصنع ازاي، لدرجة إن العلماء بيقولوا إن المادة بتاعته متاخدة من نيزك نزل من السما!

كمان كارتر اكتشف حاجة غريبة؟ عبارة منقوشة في جدار وكانت العبارة “سيطوي الموت بجناحه كل من يُزعج الملك”… 

لما قرأ العبارة خاف جداً لكن بعد كده اقنع نفسه ان العبارة دي مكتوبة لتخويف اللصوص مش اكتر ولا هي لعنة ولا حاجة…لكن كارتر كان غلطان لان بعد ما اتفتحت المقبرة بدأت الحوادث الغريبة تحصل؟! كل اللي دخل المقبرة مات بطريقة غامضة…

ليلة فتح المقبرة؟!

في نفس الوقت اللي اتفتحت فيه المقبرة الكهربا اتقطعت عن القاهرة كلها!! وده كان شئ مريب جداً

كمان فيه شخص كان موجود مع علماء الآثار وقت فتح المقبرة اسمه محمد زكريا…الشخص ده مات بعد ما رجع بيته (وقالوا انه عنده حمي مجهولة)

بداية اللعنة!

الحادثة الأولي…بعد الإكتشاف سافر كارتر للقاهرة لمقابلة اللورد كارنارفون عشان يتكلم معاه على مقبرة توت عنخ امون، فقرر كارنارفون زيارتها…وأول ما دخل لسعته بعوضة جوه المقبرة!!!

وبعدها بكام يوم كان اللورد كارنارفون بيحلق دقنه، وهو بيحلق أصاب مكان اللسعة بالموس واللي أدي لتسسم في الدم وفي الآخر مات..!!

بس موته تسبب في خوف ورعب بين الغرب، لدرجة إنهم صدقوا إن سبب موته “لعنة توت عنخ آمون”!

الحادثة التانية…كارتر كان ليه مساعد اسمه كالندر كان حاطت العصفور الكناري بتاع كارتر في البلكونة، في يوم فتح مقبرة توت عنخ امون سمع كالندر صوت غريب جاي من البلكونة، جري كالندر عشان يشوف ايه اللي بيحصل، اول ماوصل وقف مخضوض من المنظر اللي شايفه؟…شاف العصفور الكناري محاصر بأفعى كوبرا ضخمة وبتمد لسانها داخل قفص العصفور! بسرعة كالندر قتل الافعى لكن ملحقش العصفور لان الافعى قتلته! ..الملفت في الحادثة دي ان فوق تمثال توت عنخ امون أفعى كوبرا…!! 

الحادثة التالتة…سنة 1924م، بعد اكتشاف المقبرة بسنتين، عالم الآثار هيو آيفلين وايت اللي كان موجود وقت اكتشاف المقبرة انتحر، ودا تسبب في رعب بين الناس، لأنه شنق نفسه وساب رسالة يُقال إنها مكتوبة بدمه، وكان بيقول فيها:

“لقد استسلمت، هناك لعنة تجبرني على الاختفاء.”

كمان في احصائيات بتقول ان في اكتر من 40 عالم اثار ماتوا بعد دخولهم المقبرة بايام قليلة!!!

حل اللغز…

في كذا تفسير اتقال عن حوادث موت العلماء اللي دخلوا المقبرة:

اول تفسير…ان مقبرة توت عنخ امون بقالها الاف السنين مقفولة، فالهواء اللي خرج من المقبرة هواء ملوث، فلما المقبرة اتفتحت اصاب كل اللي دخلوا المقبرة بتسمم فماتوا نتيجتها، او ان حصل هلاوس مثلاً خلت اللي ينتحر ينتحر واللي يموت بالحمى…

تاني تفسير…ان المقبرة كانت محمية بتعاويذ وسحر لحمياتها من

نابشِي القُبُور فأي حد يحاول يدخلها بتصيبه اللعنة!.. 

انت بقي مع أي تفسير فيهم؟!