لو سألنا أي حد إيه أعلي قمة في العالم معظمهم هيقدر يجاوب من غير ما يفكر ويقولك قمة إيفرست لكن مأثرش مرة فضولك تتعرف علي أعمق مكان علي الأرض ؟

رحلة إكتشافها لأول مرة

في سنة 1872 كانت في سفينة للبحوث البريطانية و إسمها HMS Challenger في مهمة عشان تستكشف المحيطات و استمرت الرحلة دي حوالي 4 سنين، في الوقت دا كانوا بيستخدموا حبال بأطوال كبيرة جداً و كانت محددة بعلامات لقياس الطول و كان في طرفها قطعة ضخمة جدا من المعدن، كانت السفينة كل ما بتعدي مسافة 225 م كانوا بينزلوا الحبل و يحددوا عمق المنطقة دي من العلامات اللي علي الحبل٬ الطريقة كانت فعلا صعبة ولكن لسه مكنش في أي تطور تكنولوجي يسهل عليهم المهمة٬ المهم لما السفينة وصلت في المحيط الهادي لمكان قريب من جزر الماريانا كانت المفاجأة إن الحبل استمر في النزول عن العمق المعتاد بالنسبة للمستكشفين العمق دا كان حوالي 8000 

قادر تتخيل المسافة؟! هساعدك تتخيلها 

تخيل إن دا المحيط و المثلث دا هو جبل ايفرست و قلبته الخندق هيكون طول الجبل + 2 كيلو متر كمان. 

مثال تاني باعتبار برج خليفة أطول مبنى الإنسان صنعة طولة حوالي 828 فأنت كدا محتاج أكتر من 13 برج خليفة فوق بعض عشان توصل لنهاية خندق ماريانا اعمق نقطة علي سطح الأرض. 

خندق ماريانا Mariana Trench

هو يعتبر أعمق نقطة على سطح الكرة الأرضية مكانة في غرب المحيط الهادي شرق جزر ماريانا الشمالية وقريبة من اليابان; خندق ماريانا يعتقد بأنه واحد من أقدم قيعان البحر على الكوكب، عمره حوالي 180 مليون سنة.

خليني أقولك إن استكشاف المحيط مانتهاش لحد كدا، في سنة 1951م رجعت السفينة تاني لخندق ماريانا عشان تكمل استكشافها ولكن بنسخة جديدة هي ( تشالنجر 2 ) و اللي كانت مطورة أكتر و مزودة بأدوات قياس العمق بطريقة دقيقة إلى حد ما. 

و رجعوا تاني في سنة 1960م و دا كان أول نزول للإنسان في خندق ماريانا بس كانت لمدة قصيرة، حوالي 20د.

 ليه أتسمي deep sea challenger

بس هنا الموضوع اتغير تماماً المخرج جيمس كاميرون في 26 مارس عام 2012 قدر إنه يغوص إلي أعمق نقطة بالكرة الأرضية وقدر يقعد فيها ٦ ساعات وبكدة يبقي هو أول شخص في التاريخ يغوص إلى أعمق نقطة على كوكب الأرض بغواصته الخاصة ديب سي تشالنجر (deep sea challenger) بسبب كده سميت أعمق نقطة بالكرة الأرضية بأسم غواصته ديب تشالنج . 

تفتكر لو اتعرض عليك رحلة مدفوعة إنك تجرب أغرب رحلة ممكن تعملها في حياتك و تكتشف أعمق نقطة على الأرض هتنتهز الفرصة؟!!

تخيل نفسك عايش في الاسكندرية وقت ريا وسكينة احساسك كان هيبقي ايه؟!… تفتكر كان ممكن تكونٍ من ضمن الضحايا؟

ريا وسكينة هل هي فعلا قصة مبالغ فيها؟!

لحد سنة 1993 مكنش حد يعرف القصة الحقيقية الكاملة ورا ريا وسكينة

اللي كان معروف بين الناس ساعتها أو في السبعين سنة اللي عدوا علي القضية مجرد حكاوي وخرافات أو يمكن أن يقال عليها مبالغات…

وده راجع ان تحقيقات النيابة في القضية كانت سرية (جدااً).

وبمجرد ان القضية انتهت واتحكم علي عصابة ريا وسكينة بالإعدام واتنفذ الحكم…كل اللي اتبقي من القضية هي شوية اساطير واختفت تفاصيل الحقيقة الكاملة..

حتى التناول السينمائى للقضية بعد كده فى الأفلام كان تناول سطحى وغير حقيقى ومبنى على خرافات ..

زى فيلم “ريا وسكينة” للكاتب صلاح ابو سيف اللى كان بطولة أنور وجدى ..

ومكنش فى حد مهتم إنه يدور علي الحقيقة والقصة الكاملة بتفاصيلها وأبعادها الاجتماعية …

وده نظراً لأسباب كتير أبرزها إن الضحايا أغلبيتهم سيئِ السمعة…

و”إنهم بيمثلوا أحقر طبقة من طبقات المجتمع” ودا متاخد من كلامهم!!

طب إزاى وصلتلنا القصة الحقيقية اللى ظهرت فى مسلسل ريا وسكينة

واللى بالمناسبة طلعت تطابق القصة الحقيقة المثبتة فى أوراق القضية؟!

واللى اتعمل عنها فيديوهات ومقالات كتير على النت…؟!

وإيه حقيقة إنهم كانوا مجرد أبرياء بيقتلوا الإنجليز لحساب مصر والكلام ده…

خلينا نسأل السؤال الأهم…

مين اللي قال عليهم أبرياء وهل في إثبات؟!

المذيع عمرو الليثي في برنامجه التليفزيوني (بوضوح) كان مستضيف المؤلف أحمد عاشور وساعتها طلع وقال انه بحث في الوثائق واكتشف براءة ريا وسكينة..وانه كتب فيلم اسمه براءة ريا وسكينة ولما اتسأل ” فين يا احمد الوثائق”  قال انه هيكشف عنها بعد الفيلم…بس الفيلم لحد دلوقتي مطلعش للنور!!

السؤال هنا بقي ليه الحكومة هتخبي لو هما فعلاً كانوا أبطال!

ليه مصر كلها هتتواطئ عشان يثبتوا ان ريا وسكينة مجرمين؟

مع ان في الوقت ده مصر كانت في حالة ثورة  ضد الإحتلال الإنجليزي

بس أحمد عاشور شايف ان قصة ريا وسكينة ألفها الإحتلال الإنجليزي عشان يخوفوا الستات انهم ينزلوا الشوارع… وطبعا دي قصة مش منطقية خالص..لأن نزول المرأة للشارع في ثورة 19 كان حدث فريد من نوعه، لكن مكنش النزول القوي اللي يخلي الإنجليز يعملوا القصة دي كلها… 

ووفقاً لرواية عاشور ريا وسكينة كانوا بيقتلوا الستات اللي بتتعامل مع الإنجليز .. الكلام دا مش منطقي بالمرة…لأن اساساً مصر كلها كانت بتتعامل مع الانجليز.

طب اشمعنا الستات ليه مش الرجالة؟! طيب ما يقتلوا العساكر الإنجليز نفسهم…

كمان عاشور قال انهم كانوا من الجهاز السري لثورة 19..طب الزعيم سعد زغلول ما صرحش ليه عن الحقيقة..حتي في مذكراته اللي كتب فيها ادق تفاصيل حياته وتفاصيل الثورة!

ليه مفيش حد فيهم (ريا وسكينة) قال انهم من الجهاز السري للثورة؟

الحقائق

النظرية المنطقية المبنية علي حقائق..أن ريا وسكينة والرجالة كانوا جماعة فقيرة جدا وكانوا بيقتلوا الستات سيئة السمعة لكن ولا كانوا ابطال ولا حاجة..لأن كل اللي اتقتلوا كانوا من المترددات على بيتهم لممارسة الدعارة.. وأحمد عاشور نفسه قال ان ريا وسكينة كانوا شغالين في الدعارة المرخصة..

ومذكوراً في التحقيقات ان حسب الله قال قبل إعدامه: “هما 15 بس اللي قتلناهم، ولو عاوزنى أعدهم واحد واحد وأسميهم؛ والله لو كنت عشت سنة واحدة كمان، لكنت قطعت لكم دابر العواهر وحرمتهم يمشوا فى الشوارع”.

من وجهة نظرك كقارئ..تفتكر دي أعمال أبطال؟!