يا ترى فكرت يوم إن الحكايات اللي بنسمعها عن حوريات البحر ممكن تكون مش مجرد خيال؟ تخيل إن فيه أسرار قديمة مدفونة في أعماق المحيطات، أسرار بتستنى حد يكتشفها..

تعالوا نحكي حكاية حوريات البحر، القصة اللي شغلت عقول البشر من زمان وما زالت لغز محيّر لحد دلوقتي..

أسطورة ولا حقيقة؟

زمان، لما الإنسان كان لسه بيحاول يفهم العالم اللي حواليه، كل حاجة غريبة كانت بالنسباله إما معجزة أو لعنة.. 

ومن هنا بدأت قصة حوريات البحر.. أقدم ذكر ليها كان في ملحمة جلجامش، أقدم نص أدبي معروف، واللي اتكلم عن كائنات غريبة نصفها بشر والنصف التاني كان زمان بيتوصف كطائر..

لكن مع الوقت، الإنسان القديم بدأ يشوف حاجات مختلفة، ومن هنا ظهرت فكرة “نصف سمكة”.

في كهف السباحين في مصر، لقوا رسومات حجرية بتوضح معارك بين البشر وكائنات غريبة، نصها العلوي بشري، لكن النصف السفلي كان زعنفة سمكة! يا ترى الإنسان القديم شاف إيه بالضبط؟ وهل الكائنات دي كانت موجودة بجد ولا مجرد خيال؟

مرت السنين، وبدأ البشر يتعمقوا أكتر في البحار..

وفي عام 1493، الرحالة الشهير كريستوفر كولومبوس كتب في مذكراته إنه شاف تلات مخلوقات غريبة عند سواحل أفريقيا. شكلهم من فوق كان زي البشر، لكن لما غطسوا، بان إن ليهم زعانف!
مش كولومبوس بس، فيه كمان البحار الإنجليزي هنري هدسون، اللي هو وطاقمه شافوا كائنات بملامح أنثوية، حاولت تهاجم سفينتهم وغابت بسرعة في المياه..

غموض مستمر..

تعالَ نرجع للوقت الحاضر.. الإنترنت مليان فيديوهات عن حوريات البحر، بعضها واضح إنه متفبرك، لكن فيه حاجات بتحيّر. زي الفيديو اللي اتصور في غواصة، لما كائن غريب خبط على الزجاج بإيده. المقطع ده أثار جدل كبير وما زال لغز..

وفي اليابان، لقوا عظام لكائن غريب على الشاطئ، العظام دي اتحللت واتقال إنها تنتمي لكائن بحري بنصف بشري. العظام دي معروضة في متحف هناك، وبتخلي الناس تسأل: هل دي فعلاً بقايا حورية بحر؟

في سنة 2012، عمال عند سد في زيمبابوي قالوا إنهم شافوا كائن نصه بشري، بيغوص زي السمك. الخوف خلاهم يرفضوا يكملوا شغلهم..

 وفي مصر، سنة 2013، اكتشفوا كائن على شواطئ سفاجا وقالوا إنه نادر جدًا وتم التحفظ عليه..

السؤال اللي ملوش إجابة

لحد النهاردة، العلم بيقول إننا ماكتشفناش غير 10% بس من المحيطات..

هل ممكن الكائنات دي تكون موجودة فعلاً في أعماق البحار، بعيد عن عيون البشر؟ وهل الغموض اللي بيحيط بحوريات البحر جزء من طبيعتها، ولا ده مجرد خوفنا من المجهول؟

البحر لسه بيخبي أسراره، واللي نعرفه عنه نقطة في بحر المجهول..

وانت بقي مؤمن بوجود حوريات البحر؟ ولا شايف إنها مجرد أسطورة جميلة؟

المكان اللى مش قادرين نوضح سرّه لحد دلوقتي.. واللى دايمًا بيخطف الأنظار ويفتح أبواب الجدل..

البحر اللى بيبلع السفن والطائرات من غير ما يسيب وراها أي أثر، وكأنها اختفت في لحظة واحدة، رغم إن العلم بيقول إن الأمور دي ما بتتكرر..

مثلث برمودا.. 

هل هو مجرد ظاهرة طبيعية غريبة؟ ولا فيه حاجة تانية مخفية عننا؟.. 

في يوم 13 نوفمبر 2024 اتعملت جلسة استماع في الكونجرس غريبة جدًا كانوا بيناقشوا فيها وبيسمعوا تفاصيل الأحداث الغريبة اللي حصلت قبل كده من مشاهدة أجسام طايرة لمشاهدة أجسام غريبة.. الخ..

أحد المشاركين في الجلسة صرح وقال ان معظم الأجسام الغريبة اللي كانوا بيشوفوها يا إما تحت الماية يا إما فوق في المحيطات.. وبما ان الاطباق دي بقى مصدرها المحيطات أصبح اسمها UAB بدل من UFO..

كمان ناقشوا في الجلسة دي عن حادث كاتالينا اللي حدث سنة 1980 والحادثة دي كانت عبارة عن انهم شافوا اجسام غريبة تحت الماية.. 

والحادث دا اتحكى عنه بالتفصيل في فيلم Abyss.. اللي اتعمل واتعرض بعد الواقعة بـ 9 سنين.. 

الغريب بقى ان جزيرة كاتالينا اللي حصل فيها الحادثة دي كانت من ضمن 4 أماكن اللي قالوا ان موجود فيها قواعد مخصوصة للكائنات الغريبة دي والاربع أماكن دول واللي منهم .. مثلث برمودا..

المعلومة دي كانت موجودة ضمن نظريات المؤامرة  اللي كان بيتم تكذيبها.. ودلوقتي تم تأكيدها.. 

يعني حوادث السفن والطيارات في المنطقة ماكنتش بسبب ظواهر طبيعية أو قوة جاذبية عالية.. 

وان الكائنات دي كان ليها دخل في اختفاء كل السفن والطيارات.. 

أهمية الأماكن دي؟ 

تم الكشف عن الاماكن دي عن طريق مشروع 

The Star gate.. اللي اتعمل سنة 1978.. يعني كل الظواهر الغريبة دي كان معروف اماكنها واسبابها من حوالي 50 سنة.. 

قالوا كمان في نفس الجلسة أن نفس الأجسام الغريبة دي لقوها في حادثة روزويل.. الغريب انهم وصفوا دلوقتي الكائنات البعدية والاغرب من كده انهم وصفوها بالذكاء الغير بشري.. 

أما عن تصريح اليزون دو فكان الاغرب على الاطلاق.. لانه قال انهم تواصلوا مع الكائنات دي بشكل مؤكد ولكن مش بشكل لفظي.. تواصلوا بشكل ذهني.. بمعنى أصح بالتخاطر..

ودا يخلينا نتجه بالكلام لـ الاسقاط النجمي.. 

علاقة الاسقاط النجمي بمثلث برمودا..

تجارب الناس اللي بيروحوا أماكن وعوالم تانية بأذهانهم ووعيهم وجم يحكوا عن تجاربهم والغريب اكتر ان الناس دي كانت بتطلع وبتحكي عن الكائنات الغريبة دي وأنواعها والشرير منهم والطيب وأماكنهم..

بس الناس دي كان بيتقال عليهم مجانين أو ملبوسين.. 

ولكن الاغرب ان  مشروع The Star gate عشان يحدد أماكن الكائنات دي تحت المحيط احتاج الناس اللي عندها قدرات التواصل الذهني مع الكائنات دي.. الكائنات اللي كان بيتقال عليها مجانين.. 

أما بقى بالنسبة لأنواع المخلوقات الاخرى فهي أنواع كتير ومختلفة.. 

تصريح اليزون دو كان بيقول ان الكائنات دي عندها قدرة انها تعرف حركاتهم وردات فعلهم والتنبؤ بيها قبل ما يعملوها.. 

كمان قال ان الكائنات دي كانت بتتدخل وبتأثر على عمل المنشآت النووية يعني من الآخر بيعطلهم.. 

ودا اللي اتقال بالظبط في كتاب Faded Gaint اللي كتبه روبورت كلاس واتقال فيه ان الموضوع متعلق 100% بالكائنات الاخرى مش بأي عطل فني..

وفي سنة 1996 أعلنت باحثة وصحفية في مجال الخوارق اسمها Linda Moulton .. انها استلمت رسالة من شخص مجهول ادعى أنه أحد أحفاد المشاركين في حادثة روزويل.. وقالت معلومات كتيرة مكتوبة في الرسالة أهمها انه كان مكتوب.. 

سيبدأ الاعتراف الغير بشرية على الأرض بدءًا من 2025.. 

وانه في خطة ممهدة لدا والموضوع دا مش من سنة ولا اتنين.. لا دا من 1996!!!!

حقيقة الاطباق الطائرة

طبعًا في ناس هتقول ان الاطباق الطايرة دي صناعة أمريكية.. بس في الحقيقة ان الاطباق الطايرة دي موجودة من قديم الأزل.. من أيام الفراعنة.. 

وكل الحضارات القديمة اتكلمت عنها و رسمتها.

حتى في الحضارة المصرية.. الملك تحتمس الثالث شافها ووصفها ووثقها.. 

اطلانتس الحقيقية.. 

في نظريات كتير قالت ان السكان اللي موجودين تحت المحيطات دي هما مش كائنات فضائية.. 

هما سكان أطلانتس..

وفي الأصل حضارة أطلانتس كانت متطورة جدًا واختفت.. وفي كلام كتير بيتقال انها حضارة مفقودة تحت الماية ولسه موجودة.. 

وان كل الافلام اللي اتكلمت عن أطلانتس فهي بتعرض حقايق عن حياة ناس موجودين فعلا تحت المحيط وعندهم تكنولوجيا متطورة مخليهاهم قادرين يعيشوا تحت الماية.. 

في النهاية.. على رغم من كل الاكتشافات والتصريحات اللي بنشوفها كل يوم عن الكائنات دي وعن حقيقتهم وحقيقة كيانهم..  لسه فيه كتير من الأسرار اللي مش قادرين نفهمها.. بس اتأكدوا اننا هنفهمها قريب أوي..  

فيه ناس لما تقرأ عنهم أو تسمع عنهم، تحس إنهم مش مجرد أشخاص عاديين..

دول ناس ربنا اختارهم عشان يغيروا الدنيا بعملهم و علمهم.. الدكتور مجدي يعقوب هو واحد من الشخصيات دي اللي لو حاولت تكتب عنها كتاب، مش هتقدر توفيه حقه..

مش بس لأنه جراح قلب عالمي.. لكن كمان لأنه رمز للعطاء..

من بلبيس في مصر لقلب بريطانيا..

مشوار مليان نجاحات غيرت حياة ملايين الناس في كل مكان..

و النهاردة هنتعرف على قصة حياته المليئة بالتحديات والإنجازات، واللي مش بس جعلته “ملك القلوب” بل كمان رمز للأمل والتغيير في عالم الطب..

بداية مجدي يعقوب.. 

الدكتور مجدي يعقوب اتولد في 16 نوفمبر 1935 في مدينة بلبيس بمحافظة الشرقية..

كان من عيلة قبطية أرثوذكسية، وأصولهم من المنيا.. دخل كلية الطب في جامعة القاهرة، وبعد كده سافر يدرس في شيكاغو.. 

ومن بعدها سافر لبريطانيا في 1962 علشان يشتغل في مستشفى الصدر في لندن.. ومن هنا بدأت رحلة عظيمة..

الراجل ده من سنة 1969 كان شغال أخصائي جراحة قلب ورئة في مستشفى هارفيلد، وكان من سنة 1992 مدير قسم الأبحاث والتعليم في المستشفى دي..

ومن 1986 بقى أستاذ في المعهد القومي للقلب والرئة.. كان دايمًا مهتم بتطوير تقنيات جراحة نقل القلب، ومن سنة 1967 وهو بيشتغل على الموضوع ده..

أشهر إنجازات مجدي يعقوب..

أكتر عملية نقل قلب مشهورة ليه كانت في 1980، لما عمل عملية نقل قلب لراجل اسمه دريك موريس، واللي فضل عايش بالقلب ده لحد ما مات في 2005..

كان أطول شخص في أوروبا عايش بقلب منقول!

في بريطانيا، محدش ممكن ينسى العمليات اللي عملها لمجموعة من المشاهير، منهم الكوميديان البريطاني إريك موركامب..

علشان كده الملكة إليزابيث الثانية منحت له لقب فارس في 1992، ومن ساعتها وهو معروف في الإعلام البريطاني بلقب “ملك القلوب”..

 الدكتور مجدي يعقوب مكنش بس جراح شاطر، لأ ده كان ليه دور كبير كمان في البحث العلمي..

هو اشتغل على تطوير تقنيات جديدة في زراعة الأعضاء وعلاج أمراض القلب..

مثلاً، كان ليه دور مهم في تطوير صمامات قلب باستخدام الخلايا الجذعية، وده اكتشاف ممكن يحدث نقلة كبيرة في جراحة القلب في المستقبل..

لكن لما وصل لسن 65 سنة.. قرر الدكتور مجدي يعقوب يعتزل إجراء العمليات الجراحية، بس ما سابش المجال تمامًا، استمر كمستشار ومُنظّر لعمليات نقل الأعضاء..

لكن في 2006 رجع وقرر يعمل عملية معقدة جدًا..

كان لازم فيها يستأصل قلب مزروع في مريضة عشان يشيل القلب الطبيعي اللي كان المفروض يتشال في العملية السابقة..

غير شغله كجراح.. الدكتور يعقوب أسس جمعية اسمها “مجدي يعقوب لمرضى القلب” علشان تساعد الأطفال المصابين بأمراض قلب في الدول النامية.. 

الجمعية دي بتوفر علاج مجاني للأطفال وبتنشر الوعي عن أمراض القلب..

إلى جانب إنجازاته الطبية الكبيرة، حصل الدكتور مجدي يعقوب على ألقاب وأوسمة من جامعات مرموقة زي جامعة برونيل، وجامعة كارديف، وجامعة لوفبرا، وكمان حصل على زمالة كلية الجراحين الملكية في لندن..

ومن كتر تكريمه، كمان حصل على كراس شرفية في جامعات في باكستان وإيطاليا..

مؤسسة مجدي يعقوب للقلب.. 

لكن أكتر حاجة مش هتتنسى هي عملية زرع القلب اللي عملها في 1983 لرجل إنجليزي اسمه جون مكافيرتي، اللي دخل موسوعة غينيس كأطول شخص يعيش بقلب منقول لغاية ما مات في 2016 بعد 33 سنة..

في 2007، الدكتور مجدي يعقوب حصل على جائزة “فخر بريطانيا” تقديرًا لمساهمته في مجال الطب، وخصوصًا عمليات القلب، وكان الحفل ده من أحلى اللحظات في حياته لما تسلم الجائزة قدام كل الناس اللي أنقذ حياتهم..

في 2014، حصل على وسام الاستحقاق البريطاني من الملكة إليزابيث، وفي 2011 حصل على “قلادة النيل العظمى” من الرئيس المصري الأسبق حسني مبارك تكريمًا لمجهوداته العظيمة في مجال جراحة القلب..

الدكتور مجدي يعقوب كان دايمًا حريص على إنه يعّلم الأطباء الجدد.. 

كان بيشارك في دورات تدريبية وورش تعليمية في بريطانيا وحوالين العالم علشان ينقل علمه وخبراته للأطباء الشباب..

واللي مش ناسينه كمان هو الفريق الطبي بقيادته اللي نجح في تطوير صمام قلب باستخدام الخلايا الجذعية، وكان ده اكتشاف ثوري هيسمح في المستقبل بزراعة قلب كامل باستخدام نفس الطريقة دي..

لكن أهم حاجة إن الدكتور مجدي يعقوب دايمًا بيرجع مصر، وفي كل مرة بيساعد في إجراء عمليات قلب مفتوح بالمجان.. خصوصًا في مركز عمليات القلب اللي أسسه في أسوان عام 2009..

وكمان تم بناء تمثال ليه في أسوان وآخر في بلبيس تقديرًا لمجهوده العظيم..

لن ننسى .. 

باختصار، الدكتور مجدي يعقوب مش بس جراح قلب، ده بقى رمز للتفاني والعطاء، وعمره ما وقف عن المساهمة في تطوير الطب..

وفي النهاية.. لو فكرنا في حياة الدكتور مجدي يعقوب، هنعرف إن الإنسان ممكن يحقق المستحيل لما يكون عنده حلم ويشتغل عليه بكل تفاني..

هو مش بس أنقذ قلوب الناس، لكن كمان علمنا إزاي نكون أقوى وأفضل في كل حاجة بنعملها..

فهل ممكن لينا نتعلم من قصته ونساهم بدورنا في تغيير حياة الآخرين؟

يوم السبت الموافق 23 نوفمبر 2024.. يوم عادي، زي أي يوم..

لحد ما الصحف والتلفزيون انفجروا بخبر صادم:

 محمد رحيم، ملحن الأجيال، توفى فجأة!.
الوسط الفني كله اتقلب، والجمهور كمان.. إزاي واحد زي محمد رحيم، اللي ألحانه لسه بتعيش في كل بيت، يرحل فجأة كده!!!

مين هو محمد رحيم؟ 

محمد رحيم.. اتولد في ديسمبر 1979..

كان نجم من نوع خاص في عالم الموسيقى.. ألحانه جمعت أسماء كبيرة في الساحة الفنية.. 

من عمرو دياب في “لو عشقاني”، وشيرين عبد الوهاب في “مشاعر”، لحد محمد منير في “يا حمام”..

مفيش حد سمع أغنية من ألحانه وماحسش بقربها لقلبه.

لكن الصدمة كانت لما شقيقه “طاهر رحيم” لقى جثمانه في شقته بمنطقة الهرم..

المشهد كان مليان ألغاز: كدمات على الساقين، نزيف من الأنف، وجرح صغير في زاوية الفم..

طاهر ماقدرش يستوعب اللي شايفه، وقرر يروح قسم شرطة الهرم للإبلاغ عن شكوكه بوجود شبهة جنائية..

التحقيقات تبدأ..

​​

الشرطة والنيابة اتحركوا بسرعة.. 

والمكان كله بقى تحت التحقيق..

النيابة أمرت بنقل الجثمان لمشرحة زينهم عشان تحدد أسباب الوفاة..

وفي الوقت نفسه، النيابة طلبت التحقيق مع المقربين من محمد رحيم، وأولهم زوجته أنوسة كوتة، مدربة الأسود الشهيرة..

أنوسة.. اللي كانت في حالة صدمة وحزن.. حكت إن محمد كان مرهق جدًا مؤخرًا..

ضغط الشغل كان عالي، خصوصًا إنه كان شغال على مشروع فني جديد مع محمد منير..

كمان، كشفت إنه كان بيعاني من مشاكل في القلب، وسبق له إجراء عملية قسطرة بعد ما أصيب بذبحة صدرية في يوليو الماضي..

لكنها أكدت إنه ماكانش عنده أي مشاكل خطيرة تخلّي وفاته متوقعة بالشكل ده..

لحظات التحقيق..

التقرير المبدئي من المشرحة كشف عن تفاصيل مثيرة للجدل:

• وجود كدمات في الساقين وجرح صغير في زاوية الفم.
• خربشات سطحية على اليدين.

لكن مفتش الصحة أكد إن الإصابات دي سطحية جدًا، وماتدلش على أي اعتداء جنائي..

النيابة قررت التوسع في التحقيقات، واستدعت كل الناس اللي كانوا على تواصل مع محمد في الأيام الأخيرة..

واحدة من أهم الخطوات اللي أخدتها الشرطة كانت مراجعة كاميرات المراقبة حوالين مكان سكنه..

النتائج كانت واضحة: مافيش أي تحركات مريبة أو دخول أشخاص غرباء للشقة. كل المؤشرات أكدت إن الوفاة كانت طبيعية..

النيابة تحسم الأمر..

بعد كل التحقيقات دي.. النيابة أعلنت رسمياً إن وفاة محمد رحيم طبيعية..

الإصابات اللي ظهرت على جسده كانت ناتجة عن ظروف الوفاة نفسها، ومفتش الصحة أكد إن مافيش أي علامات تشير للاختناق أو الاعتداء..

قررت النيابة حفظ القضية.. لكنها أكدت إنها هتفتحها تاني لو ظهرت أي أدلة جديدة..

الوداع الأخير

في مسجد الشرطة، اجتمع محبي محمد رحيم وأصدقاؤه من الوسط الفني لتوديعه. كانت الجنازة مليانة دموع وحزن، خصوصًا بعد ما كتبت زوجته أنوسة كوتة على فيسبوك: 

المشهد كان مؤثر جدًا؛ الناس كلها كانت بتفتكر ألحانه اللي خلدت أجمل اللحظات..

من “مشاعر” لشيرين، لحد “أنا لو قلت” لمحمد فؤاد، كلها ألحان هتفضل محفورة في القلوب..

وداعاً محمد رحيم..

رحيل محمد رحيم كان مفاجئ وصادم.. 

أعماله الفنية هتفضل رمز للإبداع والحب اللي كان بيحطه في كل نغمة..

محمد مش بس كان ملحن؛ كان صانع لحظات جميلة في حياة كل اللي سمعوا موسيقاه..

الدنيا رجعت لهدوئها.. لكن إحساس الغصة فضل موجود في قلوب الكل..

محمد رحيم ماكنش مجرد ملحن.. 

كان إنسان بمعني الكلمة ومواقفه الانسانية كتيرة بشهادة الكل..

 ذكراه هتفضل عايشة مش بس في ألحانه، لكن في كل لحظة حلوة عشناها مع موسيقاه..

انت بقي كقارئ ومشاهد للأحداث وشايف الصورة من فوق.. 

تفتكر فعلًا في حد ورا قتل محمد رحيم ولا الموضوع قضاء وقدر؟؟

الريان.. اسم له وقع مختلف على مسامعنا كلنا.. 

من رجل أعمال بدأ من الصفر، لحد ما أصبح واحد من أقوى رجال مصر في عالم المال والأعمال..

لكن ورا القصة دي.. في تفاصيل مثيرة وأسرار كبيرة..

إزاي بني إمبراطوريته في وقت قصير؟ و إيه السر اللي خلاه يدخل عالم الشهرة والمال بسرعة ويحقق نجاحات غير مسبوقة؟ القصة مش بس عن الثراء، لكن كمان عن طموحات كبيرة وتحديات عملاقة.. وأحداث قلبت حياته رأسًا على عقب..

تعالوا نكتشف سوا مع بعض الحكاية المثيرة لواحد من أعظم رجال الأعمال في مصر، واللي ليه قصة تستحق كل لحظة من التشويق والإثارة..

بداية حياة الريان

أحمد توفيق عبد الفتاح الجبري، واللي كل الناس عرفوه باسم أحمد الريان، اتولد في 25 إبريل 1956.. وكان من أسرة بسيطة جدًا في مصر.

بدأ حياته المهنية في مجال تجارة السيارات.. وبعدين انتقل إلى عالم الأعمال، عشان يبقى واحد من أشهر رجال الأعمال في مصر في مجال توظيف الأموال..

وبقى مؤسس شركة الريان اللي حققت نجاح كبير في مجال توظيف الأموال..

أسس أحمد الريان شركة الريان لتوظيف الأموال، وهي الشركة التي كانت بتعمل على جمع الأموال من المواطنين بوعود بعوائد كبيرة جدًا..

الشركة كبرت بسرعة وشهدت نجاحات ضخمة.. واللي خلاه واحد من أغنى رجال مصر في الفترة دي..

قضية توظيف الأموال

في عام 1989.. بدأت السلطات المصرية التحقيق مع الريان في قضية توظيف أموال، و تم اتهامه بجمع أموال من المواطنين وتوظيفها بشكل غير قانوني..

الريان كان وعد المستثمرين بعوائد ضخمة جدًا..

وطبعًا بعد شراكة الريان والسعد ابتدت الإمبراطورية الضخمة وبقت دولة جوا دولة .. وابتدوا انهم يغطوا على اقتصاد الدولة نفسه.. 

وفعلاً اتلفق للريان قضية واتقال الأموال دي كانت تُستغل بشكل غير قانوني.. و بالفعل تم القبض عليه في 1989 ووجهت إليه تهم تتعلق بالاحتيال.. واتحكم عليه بالسجن لمدة 21 سنة..

حياة الريان في السجن

فكرة انه يقضي الريان 21 سنة خلف القضبان كانت حاجة مؤلمة.. تمت الإشارة في الحلقة إلى حياته الصعبة في السجن، حيث كانت مليئة بالمعاناة، ولكنه استمر في محاولات تبرئة نفسه..

بالرغم من مرور سنين طويلة في السجن .. إلا أن الريان فضل محافظ على مكانته في المجتمع المصري وذكراه كأحد أكبر رجال الأعمال في الفترة دي..

 الإفراج عن أحمد الريان

بعد 21 سنة من السجن، وفي أغسطس 2010، تم الإفراج عن أحمد الريان بموجب قرار قضائي..

و تم تسليط الضوء على الأجواء اللي انتشرت بعد الإفراج عنه، وكيف استقبله المجتمع المصري، وخصوصًا بعد ما الموضوع بقى مثير للجدل..

القصة موقفتش على حياة أحمد الريان فقط.. وبقت القضية ليها تأثير كبير جدًا على سوق توظيف الأموال في مصر..

كانت القضية سبب رئيسي في بداية سلسلة من التحقيقات مع رجال أعمال آخرين في نفس المجال.. مما أدى إلى تراجع كبير في هذه الأنشطة المالية في مصر..

حكاية أحمد الريان كانت مليانة تقلبات، من صعود سريع وأرباح ضخمة إلى سقوط مفاجئ واتهامات بالاحتيال..

ولكن في النهاية.. رغم سجنه واتهاماته، فضل اسمه جزء من التاريخ المصري.. وحكايته تستحق أنها تتحكي للأجيال اللي جاية..

قصة أحمد الريان هتفضل واحدة من أهم القصص المثيرة في تاريخ رجال الأعمال في مصر..

رحلة مليانة بالطموح والنجاح السريع، ولكنها انتهت بفاجعة وصراع مع القانون..

هل كان الريان ضحية لنظام قاسي.. ولا كان جزء من لعبة أكبر من مجرد تجارة الأموال؟

في قلب بلاد ما بين النهرين، كان فيه حلم ضخم، حلم بمشروع قد يكون الأعظم في تاريخ البشرية.. حلم الملك النمرود.. برج بابل..

ناس كتير بتسأل ليه!! ليه كان عايز يبني برج يوصل للسماء؟ إيه اللي كان مخليه يطمح لدرجة إنهم يتحدى حدود الأرض ويوصلوا لسماء المجهول؟..

سر كبير، اللي مفهوم منه انه كان عنده أمل إنه يحقق حاجة عظيمة تتخلد عبر العصور..

الناس فضلت تحكيها من جيل لجيل، سواء في الكتب القديمة أو على لسان العلماء.. كتير من الناس ممكن ما يعرفوش القصة الكاملة ورا البرج ده..

 لكن النهاردة هقول لكم الحكاية من أولها لآخرها..

قصة برج بابل..

برج بابل كان في مدينة بابل، في منطقة معروفة باسم “شنعار” اللي كانت جزء من بلاد ما بين النهرين، اللي موجودة دلوقتي في العراق..

الكل كان يعرف عن البرج ده في القصص التاريخية والدينية، وكان له ذكرى قوية في التوراة والإنجيل كمان.. 

في البداية.. البابليين قرروا يبنوا البرج ده علشان يكون ليهم مكانة تاريخية ويثبتوا وجودهم بين القبائل..

وكانوا عايزين يبنوا برج ضخم عشان يخلوا نفسهم مشهورين في العالم..

البرج ده كان عبارة عن هيكل دائري ضخم، يتكون من طوابق متدرجة بشكل حلزوني..

وكان يوصل لارتفاعات رهيبة لأنه طبعًا كان عاوز بوصل للسماء!.. كانوا شغالين عليه ليل ونهار، لكن في نص القصة حصل حاجة غريبة..

الناس اللي كانوا بيشتغلوا في بناء البرج كانوا بيحبوا يعملوا شيء عظيم..

لكن حصل إنهم اختلفوا في لغاتهم.. وكل مجموعة كانت بتتكلم لغة مختلفة.. فالموضوع أصبح صعب جدا عليهم، ومع الوقت حصل تفرقة بينهم وانتشروا في كل مكان على الأرض.. 

يعني البرج اللي كانوا عايزين يبنوه علشان يبقوا موحدين، هو نفسه السبب اللي فرقهم في النهاية..

وبصراحة اختلف السبب وراء بناء البرج، واتوجد أكتر من تفسير..

بعض الناس بتقول إنهم كانوا عايزين يوصلوا للسماء.. والبعض الآخر بيقول إن الملك نمرود هو اللي أمر ببنائه ودي القصة الأشهر فعلًا..

نمرود ده كان حاكم الأرض في الوقت ده، وكان ملك قوي جدا، وكان في عهده فساد وظلم كبير..

بيقولوا إنه كان يعذب الناس ويأخذ أموالهم عشان يثبت ليهم إنه هو الأقوى..

لكن في بعض الروايات التانية، بيقولوا إن البرج كان في الأصل مركز ديني لِعبادة الله و لدراسة علم الفلك، وكان يمثل جزء كبير من الحضارة البابلية القديمة..

برج بابل في الكتاب المقدس

برج بابل كمان ظهر في التوراة في حكاية نوح عليه السلام.. بعد الطوفان، نوح وأولاده استقروا في مدينة بابل، وهناك قام نمرود ببناء البرج ده..

البرج ده كان مش مجرد بناء عادي، بل كان بيستخدم كقلعة ومركز سياسي وديني في الوقت ده..

وفي النهاية، البرج تعرض للدمار بسبب الحروب والعواصف والزلازل، وكل المعالم اللي كانت حواليه اختفت مع مرور الزمن.

أما عن شكله.. فالتوراة بتقول إن البرج كان بيشبه الهرم المدرج، وكان لونه بني ومعه قاعدة ضخمة..

مع كل طابق كان بيميل للضيق، لحد ما وصلوا في النهاية لأعلى نقطة ممكنة، وكان فيه معبد في القمة للعبادة..

البرج كان ضخماً لدرجة إنه كان قادر يستوعب حوالي 100 ألف شخص..

بالنسبة للصور أو الآثار اللي تدل على وجوده، مفيش صور حقيقية للبرج لحد دلوقتي.. كل الصور اللي بتشوفها على الإنترنت هي رسومات فنية أو مجرد تخيلات.. 

أما آثاره، ففيه حاجات زي الزقورة، اللي كانت عبارة عن هيكل عظيم مكون من سبع طبقات، وبوابة عشتار الشهيرة اللي تم نقلها لمتحف برلين، كمان في تمثال الأسد البابلّي اللي اكتشفوه في 1776 واللي بيعرض قوة الملك اللي حكم بابل في العصور القديمة..

لكن في النهاية، رغم إن البرج ده مبقاش موجود دلوقتي، إلا إن القصة عنه لسه عايشة في قلوب الناس وكل واحد عنده تصور مختلف ليه.. وكل ما نرجع للحكايات دي، بنحس وكأنها جزء من تاريخ طويل ومستمر.. الأسئلة كثيرة، لكن الإجابة ما زالت في مكان مجهول.. فهل سنكتشف سر برج بابل في يوم من الأيام؟

في عالم الطيور.. 

في طائر غريب دايمًا بيخلي الناس تتسائل وتستغرب..

الغراب.. الطائر الأسود اللي دايمًا بيتنقل بين الظلال والنور.. حواليه أسرار كتير لسه مافيش حد اكتشفها..

إيه اللي نعرفه عن الطائر ده اللي في بعض الثقافات يعتبر رمز للحكمة..

وفي ثقافات تانية بيكون نذير شؤم؟..

وليه وجوده لسه محير لعلماء كتير رغم إنه دايمًا حوالينا؟ تعالوا نغوص مع بعض في عالم الغراب..

ونكشف الأسرار اللي ممكن تكون مخفية بين جناحيه..

حياة الغراب.. 

الغربان مش بس طيور ذكية.. لكن عندها عادات وتقاليد خاصة بيها بتخليها تختلف عن باقي الطيور..

واحدة من أشهر السلوكيات اللي اكتشفها العلماء هي طريقة تعاملها مع موتاها..

في بعض الثقافات، يقال إن الغراب هو اللي علم الإنسان مفهوم الدفن..

لما تم رصد سلوك الغربان في التعامل مع رفقائها الميتين، اكتشفوا إنهم بيحفروا حفرة صغيرة ويحطوا فيها الجثة، أحيانًا بترتيب معين وكأنهم بيؤدوا طقوس دفن..

من هنا.. فُرضت فرضيات إن الإنسان قد يكون تعلم بعض المفاهيم المرتبطة بالموت والدفن من سلوك الغربان من أيام قابيل وهابيل..

العادات دي مش مجرد تصرفات عشوائية، لكنها جزء من أسلوب حياة معقد للغراب يشمل الحذر، والتواصل الجماعي، وتكريم الأفراد المفقودين.. 

الغراب ده مش طائر عادي، ده طائر ليه طقوسه الخاصة اللي بتدل على فطنته وذكاءه الفائق، وده بيفصله عن باقي الطيور بشكل كبير.”

الغراب بيجمع باقي الغربان حواليه لما يموت واحد منهم، والسبب ورا ده حاجة غريبة فعلاً..

الغربان معروفة بتصرفاتها العجيبة لما تشوف طيور ميتة من نفس نوعها، بتقف حواليها وبتصرخ بصوت عالي..

فيه ناس كتير فكروا إن ده جزء من طقوس جنازة بتعملها الغربان.. لكن الحقيقة كانت لسه لغز للعلماء..

ومفيش عندهم دلائل كتير يقدروا يعتمدوا عليها، غير إنهم سمعوا عن سلوكيات زي دي من الناس..

فريق من الباحثين قرروا يدرسوا سبب تصرف الغربان بالطريقة دي حول الطيور الميتة من نفس نوعها..

عشان يعرفوا الحقيقة، الفريق عمل تجربة جديدة ومختلفة.. وكانوا استفادوا من حقيقة معروفة عن الغربان، وهي إنها بتتذكر شكل اللي بيشكل تهديد ليها، وده كان اتثبت في تجربة قديمة قبل كده..

دراسة حول الغربان..

تمت مجموعة من الدراسات بقيادة “جون مارزلوف” من جامعة واشنطن في سياتل، أمريكا..

الدراسات دي كشفت إن الغربان بتتذكر الشخص اللي بيشكل خطر ليها..

وبعد كده.. بتعلم الغربان التانية على الشخص ده، وبتبدأ تعنّفه بصوت عالي..

يعني بمجرد ما تشوف أي غراب وجه الشخص ده، بيبدأوا كلهم يصرخوا ويزعقوا، وده ممكن يستمر لسنين طويلة بعد كده..

وعشان يتجنبوا أي مشاكل مع الغربان في الواقع.. استخدموا في التجربة وجه غير حقيقي..

كان مجرد قناع جلدي شبيه بالوجه الحقيقي للشخص اللي شارك في التجربة..

باستخدام قناع مشابه، دخل الباحثين شخص لوحده في مكان بتتوقع فيه الغربان إنها هتاخد أكل لذيذ من الشخص ده، وكان اسمه “كايلي سويفت”، وهي كمان من جامعة واشنطن..

الغراب مثال الشر..

عشان كده، كانت “سويفت” بتقوم بدور الشخص الطيب اللي بيجيب الأكل للغربان.. أما الشخص التاني اللي كان لابس قناع مختلف، فكان بيقوم بدور الشخص الشرير..

الراجل ده دخل المكان وهو ماسك غراب ميت في إيديه، وقعد في مكانه حوالي نص ساعة.

“سويفت” قالت: “كنت دايمًا الشخص اللطيف اللي بيقدم لهم الأكل، وكان ده حلو لأنني مكنتش خليت لي أعداء وسط الغربان. كنت بحط الأكل برا البيت، وبعد شوية يظهر الشخص التاني.”

وأضافت: “هو كان ماسك غراب ميت، بس مش بطريقة عنيفة ولا كأنه بيعيد تمثيل مشهد موت.. كان بس ماسكه كأنه بيشيله عشان يرميه في الزبالة، وإيده ممدودة كأنها ماسكة طبق مقبلات.”

في أول يوم ظهر فيه الشخص اللي كان لابس القناع، الغربان قاطعوا تمامًا الأكل اللي “سويفت” حطته برا البيت..

بدل كده، اتجمعت الغربان وبدأت تتصرف بعنف، وكأنهم بيهددوا حيوانات مفترسة. الباحثين قالوا إن التصرف العنيف ده ممكن يكون له أكتر من غرض، زي “معاقبة المفترس، أو إثبات الهيمنة، أو تعليم المجموعة عن الشخص أو المكان اللي بيشكل خطر.”

ولو تم وضع صقر جنب الغراب الميت، الغربان كانت بتتجنب الأكل أكتر.. وده بيدل إنهم كانوا شايفين إن الصقر هو مصدر الخطر..

لما رجع الشخص اللي كان لابس القناع في اليوم التاني، من غير ما يكون ماسك غراب ميت، لسه الغربان بتتجنب الأكل اللي كانت “سويفت” حطاهولهم..

النتايج دي بتبين إن الغربان هتتجنب مكان أو حاجة بتشكل خطر على حياتها.. الطيور دي فاهمة يعني إيه موت، وعارفة تخاف منه..

“سويفت” وضحت وقالت: “التجربة بتوضح إن الغربان بتشوف الموت، على الأقل جزئيًا، كـ ‘لحظة قابلة للتعلم’ عشان تستفيد منها.. الموت بالنسبة لهم بيبقى علامة على الخطر، والخطر ده لازم يتجنبوه.”

الخوف من الموت ده بيستمر معاهم.. وحتى بعد ستة أسابيع، أكتر من تلت الأزواج من 65 زوج غراب لسه بيستجيبوا بنفس الطريقة..

الدراسة دي، اللي نُشرت في مجلة “سلوك الحيوان”، كانت جزء من سلسلة أبحاث بتحاول تفهم أكتر عن رد فعل الحيوانات لما تشوف موت أحد أفرادها. الباحثين اكتشفوا إن طيور القيق، اللي هي من نفس عائلة الغربان، بتعمل حاجة شبه “جنازة” لما تشوف واحد من أفرادها ميت..

الاكتشافات دي بتسلط الضوء على أهمية ذاكرة الغربان في التعلم وتخزين تفاصيل وجوه البشر. دي مهارة بتساعدهم يميزوا الناس اللي بيشكلوا خطر على حياتهم من بين باقي الناس اللي مش بيشكلوا تهديد..

“سويفت” قالت لـ “بي بي سي إيرث”: “الدراسة دي مثال تاني على إزاي الغربان تطورت علشان تقدر تعيش وتتكيف معانا بشكل ناجح.”

وأضافت: “الغربان قادرة على حفظ ملامح وجوهنا، وده بيحصل في ظروف مختلفة ومتنوعه بشكل مذهل، حتى لما نكون بنظهر ليهم كأشخاص ممكن نؤذيهم من خلال تصرفاتنا تجاه موتاهم.”

النهاردة، الغربان بقت آخر الحيوانات في مجموعة صغيرة قادرة على التعرف على الطيور الميتة من نفس نوعها، ويمكن حتى تقيم لها نوع من الحداد..

كمان معروف عن الفيلة والزرافات وقرود الشمبانزي وعدد من طيور فصيلة الغرابيات إنهم بيقعدوا قريب من أفرادهم الميتة فترة بعد موتهم..

في النهاية.. الغراب بيفضل طائر غامض وجذاب، مش بس عشان ذكائه، لكن كمان بسبب سلوكياته المعقدة اللي دايمًا بتثير التساؤلات..

من تعلم الإنسان لطقوس الدفن لقدرته على تمييز الخطر والتعامل معاه بطرق مميزة، الغراب بيأكد إنه مش طائر عادي..

ومع كل اكتشاف جديد عن حياته، بنكتشف إنه أكتر من مجرد طائر، ده كائن عنده أسرار وحكمة كبيرة..

لكن، هل ممكن الغراب يكون مصدر إلهام للبشر في فهم أعمق للحياة والموت؟ وإيه هي الأسرار التانية اللي لسه مخبّياها بين جناحيه؟

في يوم من الأيام.. كان في فكرة غريبة جدًا في أمريكا!

حاجة مكنتش تيجي على البال ولا على الخاطر.. 

الناس كانوا بيلعبوا وبيجربوا بأطفالهم حرفيًا..

عن طريق البريد! متخيل!!!

دا مش هزار.. دي كانت حقيقة.. وأكتر من كده كمان..

كانت حاجة مشهورة لدرجة إن في ناس استخدموها عشان يبعتوا ولادهم من ولاية لولاية تانية علشان يزوروا أهلهم..

طبعًا الموضوع ده أثار دهشة كبيرة، وانتشر بسرعة في الصحف، وكل الناس بقت تتكلم عنه..

إزاي ممكن طفل يسافر كطرد بريدي يعني؟..

ولحد فين وصل الموضوع ده؟ وهل الموضوع ده كان ممكن يستمر؟..

دي كلها أسئلة هنعرف إجاباتها في حكايتنا النهاردة عن واحدة من أغرب الظواهر في تاريخ البريد الأمريكي!

خدمة الطرود البريدية..

في بداية يناير سنة 1913..

بدأ مركز البريد الأمريكي يقدّم خدمة الطرود البريدية.. وكان ده أول مرة الأمريكان يقدروا يبعتوا حاجات وزنها أكتر من 4 أرطال عبر البريد..وده مقابل مبلغ بسيط جدًا..

قبل ما تبدأ الخدمة دي، كان الأمريكان بيعتمدوا على الشركات الخاصة علشان ينقلوا الطرود من مكان لمكان..

ومع بداية الخدمة دي.. الأمريكان قرروا يبعثوا حاجات غريبة عبر البريد، زي البيض والدجاج و الآجر والإسمنت والحديد!..

الموضوع ما وقفش عند كده، كمان بعض الناس استغلوا الخدمة دي بطريقة غير تقليدية..

كان في ناس بيبعتوا أولادهم عن طريق البريد من منطقة للتانية عشان يزوروا قرايبهم.. بما إن مفيش قانون وقتها يمنع كده.. والموضوع ده كان بيتم بسرعة ومن غير أي مشاكل!!

الطرد الأول.. 

بعد كام أسبوع من بداية خدمة الطرود البريدية.. حصلت أول حادثة إرسال طفل عبر البريد في ولاية أوهايو..

كان فيه زوجين قرروا يبعثوا ابنهم اللي كان وزنه 11 رطل لبيت جدته، اللي كان على بعد ميل واحد منهم، وكانوا دفعوا 15 سنت كطوابع بريدية.. وكمان 50 دولار تأمين على الطفل..

 ووفقًا لما ذكرته جريدة نيويورك تايمز في الوقت ده.. كان ساعي البريد فيرنون ليتل هو اللي تولّى المهمة الغريبة دي، وراح بالطفل لبيت جدته كأنه بيبعت طرد عادي..

بعد ما نجحت أول عملية إرسال طفل عبر البريد، واللي انتشرت أخبارها في الصحف الأميركية، قرر العديد من الأمريكان إنهم يعملوا نفس الشيء..

البريد بقى وسيلة سريعة وآمنة علشان يبعثوا أطفالهم لزيارة أقاربهم في أماكن بعيدة..

الطرد الثاني..

وبعد حادثة أوهايو، وبعد كام يوم، في ولاية بنسلفانيا حصلت ثاني عملية إرسال طفل عبر البريد، وكانت تكلفتها 45 سنت، وتكفّل بيها ساعي البريد جيمس بيرلي..

لكن أشهر حادثة من كل الحكايات دي كانت حكاية الطفلة ماي بييرستورف.. اللي بقت من أشهر قصص إرسال الأطفال عبر البريد في أمريكا..

في يوم 19 فبراير سنة 1914.. قررت عائلة من ولاية إيداهو تبعت ابنتهم ماي بييرستورف.. اللي كانت عندها ست سنين، لزيارة جدتها اللي كانت عايشة على بعد 73 ميل..

ولأن الطفلة كانت لسه صغيرة، ألصقوا طوابع بريدية على معطفها، وكان سعر الطوابع 53 سنت..

علشان يوصلوا الطفلة بسرعة، ساعي البريد قرر يستخدم القطار علشان يوصلها بأسرع وقت لبيت جدتها..

بعد ما انتشر خبر حادثة الطفلة ماي بييرستورف.. اتخذ المسؤولين عن البريد الأميركي قرار بوقف إرسال البشر عبر الطرود البريدية..

ومع ذلك.. قصة ماي ألهمت الكاتب الأميركي مايكل أو تانيل، اللي قرر يحول الحكاية دي لرواية للأطفال، وكتب عنها بأسلوب شيق..

لكن رغم القرار ده، الأمريكيين استمروا في إرسال الأطفال عبر البريد لعدة أشهر بعد كده..

وفي سنة 1915.. قررت واحدة من ولاية فلوريدا تبعت ابنتها اللي كان عمرها 6 سنين عبر البريد لزيارة والدها في ولاية فرجينيا.. الطفلة دي.. اللي كانت مسافرة 720 ميل.. دفعت 15 سنت فقط كطوابع بريدية..

الحكاية دي خلّت الطفلة تحقق رقم قياسي غير مسبوق في مسافة السفر عبر البريد بين الولايتين..

وفقًا للمصادر الأميركية.. في شهر أغسطس سنة 1915 حصلت آخر عملية إرسال للأطفال عبر البريد..

في الحكاية دي، قررت عائلة من ولاية كنتاكي تبعت الطفلة مود سميث، اللي كان عمرها 3 سنين، لزيارة والدتها المريضة اللي كانت عايشة على بعد 40 ميل..

وده كان آخر استخدام للبريد في إرسال الأطفال قبل ما يتوقف الموضوع تمامًا..

وفي النهاية.. وبعد ما شوفنا إزاي البريد كان بيبعت الأطفال زي الطرود، لازم نسأل نفسنا..

هل لو الموضوع ده اتكرر في الزمن ده.. هنتقبله بنفس الطريقة؟ 

“المساكنة” تريند جديد ظهر فجأة.. لفظ ظهر في مجتمعنا زيه زي “التنمر” أو “الـ Issues”.. ألفاظ ماكناش نسمع عنها حاجة.. كبرت وبقت ضخمة.. 

ومع الوقت المصطلحات دي لما كبرت واتغيرت بقى بيكبر معاها اللفظ فعلاً..

 بس تعالو نعرف ايه حوار المساكنة دا ؟؟.. 

ظاهرة اجتماعية بدأت تظهر في الفترة الأخيرة في كتير من المجتمعات..

و بتتمثل في أن شخصين يعيشوا مع بعض من غير ما يكون فيه ارتباط رسمي زي الزواج..

المساكنة – كما يُقال- في بعض الأحيان بتكون اختيار عشان الظروف الاقتصادية أو الاجتماعية..

أو ممكن تكون قرار شخصي بهدف التجربة أو التعرف بشكل أفضل على شريك الحياة قبل اتخاذ خطوة الزواج..

و على الرغم من إنها بقت منتشرة في بعض الأماكن.. إلا إنها بتواجه انتقادات في مجتمعاتنا اللي بتعتمد على التقاليد والقيم الاجتماعية..

سبب انتشار المساكنة 

المساكنة أصبحت نمط شائع في الدول الغربية، خاصة في أوروبا الإسكندنافية..

ومع مرور الوقت انتشرت لبلدان تانية، رغم أن دول البحر المتوسط كانت أكثر تقليدية ومحافظة بسبب تأثير الدين..

ومع بداية التسعينيات، زادت أعداد الأزواج اللي بيتعايشوا بدون زواج، وده مع تغير المعايير الاجتماعية واختلاف نظرة الكنائس لموضوع المساكنة..

العوامل الاقتصادية والاجتماعية زي دخول المرأة لسوق العمل وانتشار وسائل منع الحمل.. 

ساعدت على تزايد المساكنة بدلًا من الزواج..

وكمان التغيرات السياسية في أوروبا الشرقية بعد سقوط الأنظمة الشيوعية أسهمت في حرية أكبر وتغير في أنماط الحياة..

المساكنة جزء من تغييرات اجتماعية أكبر زي ارتفاع الطلاق وتأخير سن الزواج..

وتعتبر مؤشرا على التحولات في القيم الاجتماعية حول الزواج والجنس..

في بعض الدول، الناس بدأوا يشوفوا الزواج كأنه نظام عفا عليه الزمن، وده كان بيخليهم يفضلوا العيش مع بعض بدون عقد رسمي..

أراء الفنانين في المساكنة 

>> إيناس الدغيدي 

تحدثت الفنانة إيناس الدغيدي عن تجربة المساكنة في برنامج “القرار” على قناة الغد، وقالت: “عشت المساكنة قبل ما أتجوز من طليقي لمدة 9 سنين”..

ونفت إيناس خوضها تجربة الجواز العرفي قبل كده، وأكدت إنها مش قادرة تعيش من غير حب، حتى لو كان من طرف واحد، زي ما قالت..

>> إليسا

في تصريح صادم، الفنانة إليسا عبّرت عن رأيها في المساكنة خلال برنامج “بيت السعد” مع أحمد سعد وشقيقه عمر سعد، وقالت: “أنا مش ضد فكرة المساكنة، لأن في كتير من الزيجات ما بتنجحش عشان الطرفين مبيكونوش عارفين بعض كويس، علشان كده نسب الطلاق زادت، شايفاها حاجة عادية، لكن أنا عمري ما عملت كده”..

>> كريم فهمي 

أما كريم فهمي، فقال في تصريحات تلفزيونية عن تجربة المساكنة: “أنا مش بحب الإعلان عن المعاصي، ومش هعمل نفسي متدين، ممكن أكون بعمل حاجات غلط لكن مش لازم أقولها على الهوى، و80% من الشباب أكيد مروا بالمرحلة دي، وأنا كنت منهم وأنا في سن أصغر”..

>> محمد عطية 

أثار محمد عطية جدلًا كبيرًا بعد تصريحاته عن المساكنة، وقال: “أنا مؤيد لفكرة المساكنة، لأن نسبة الطلاق بتزيد بسبب عدم التوافق في الحياة الجنسية، فالأفضل نعيش مع بعض الأول ونشوف إذا كنا نقدر نعيش سوا ولا لأ”..

>> مايا دياب 

كشفت الفنانة اللبنانية مايا دياب في أحد تصريحاتها التلفزيونية إنها فعلاً عاشت المساكنة مع زوجها الأول، وقالت إن الفترة دي كانت مهمة قبل خطوة الزواج عشان يساعدتهم يتعرفوا على بعض أكتر..

>> غادة عبد الرازق

“سأل مقدم البرنامج غادة إذا كانت إحدى حفيداتها ممكن تاخد قرار المساكنة قبل الجواز، وهل هتقبل بالواقع ده أو هتواجهه بالرفض، وكمان رأيها في الفكرة بشكل عام.

غادة ردت وقالت: ‘لا، أنا مش هستني لحد ما توصل لده، لأن من دلوقتي وأنا بقول لهم من وهم صغيرين. هما متربين كويس وعارفين كويس إيه الصح وإيه الغلط، يعني هما مش هيوصلوا للقرار ده. من البداية، أنا ومامتها عارفين كويس أوي نربيهم صح’.”

في النهاية.. المساكنة لسه بتسبب جدل كبير في مجتمعاتنا.. وكل واحد ليه رأي في الموضوع ده..

وعلى الرغم من إن البعض بيشوف إنها فرصة للتعرف على الشريك قبل الزواج.. 

إلا إن الفكرة دي بتتصادم مع القيم الدينية والأخلاقية اللي بتحترم العلاقة الزوجية..

وكمان مش متوافقة مع العادات والتقاليد اللي بنعيش بيها..

 فهل فعلاً ممكن نغض النظر عن تأثير الفكرة دي على المجتمع؟ وهل هي فعلاً حاجة مقبولة في مجتمعاتنا اللي بتعتمد على مبادئ واضحة في العلاقات؟؟

في كل حتة في مصر..

من شمالها لجنوبها.. فيه قصص مرعبة عن أماكن مخفية وسط الزحمة..

بيوتها قديمة لكن أرواحها بتصرخ في كل حيطانها..!

 ناس كتير بيحكوا عن حاجات غريبة بيحصلوها جوا بيوت قديمة، قلاع مسكونة، ومستشفيات مهجورة..

من القاهرة للإسكندرية ولحد أسوان، كل مكان وله حكاية بتخوف أكتر من التانية! 

تعالى نشوف مع بعض حكايات الأماكن المسكونة في مصر، واللي لو مش مصدقها، جرب تزورها بنفسك… لو تقدر!

قصر البارون

قصر البارون في منطقة مصر الجديدة مش مجرد مبنى أثري قديم..

ده مكان دايمًا محاط بأسرار وروايات مرعبة شغلت خيال الناس سنين طويلة..

القصر اللي بناه المليونير البلجيكي “إدوارد إمبان” كان مصمم بطريقة غريبة تميّزه عن باقي القصور.. لكن الغرابة ما وقفتش عند المعمار..

ناس كتير بيحكوا عن أصوات غريبة بتطلع من جدرانه.. وصرخات بيسمعوها من غير مصدر واضح..

وأحيانًا خيالات بتظهر فجأة عند الشرفات والنوافذ، خصوصًا بالليل!

فيه أساطير بتقول إن القصر كان مسرح لطلاسم وسحر أسود..

وإن البارون نفسه كان ليه اهتمامات غامضة بعالم الأرواح.. وبعض الروايات بتقول إن ممرات القصر السرية وغرفه المعزولة شاهدين على حوادث غامضة..

وإن أخته، اللي ماتت بشكل مأساوي، روحها لسه بتطارد المكان..

وبالرغم من إن معظم الكلام ده بيعتبر مجرد أساطير.. إلا إن القصر فضل مصدر رعب لكل اللي زاره..

كأنه حارس لأسراره اللي مش راضي يكشف عنها..!

مشرحة حلوان

مشرحة حلوان القديمة فعلاً ارتبطت بسمعة مرعبة.. والمكان دا مليان قصص مخيفة اتقالت من شهود حقيقيين..

ناس اتعرضوا لحاجات غريبة ومريبة جوه المشرحة..

أولاً، المشرحة دي كانت بتخدم حالات كتير في المنطقة.. واللي كان بيجعلها مكانًا دايمًا مليان جثث وتفاصيل حياة انتهت بشكل مفاجئ أو مأساوي..

ومع مرور الوقت، تحولت لمكان مهجور، وده اللي خلى القصص المرعبة تزيد، كأنها بوابة لعالم الأرواح..

فيه حكايات عن موظفين قُدام في المشرحة اللي كانوا بيقولوا إنهم بيشوفوا أشباح أشخاص لابسين ملابس قديمة بيمشوا في المكان، وكأنهم لسه عايشين..

فيه كمان قصة عن ممرضة كانت بتشتغل هناك وسمعت صوت جثة كانت لسه جاية بتمتم بكلمات غير مفهومة.. ومع كل مرة كانت تقرب عشان تتأكد، الصوت كان بيختفي..

ناس تانية بيحكوا إنهم لما كانوا بيمروا قدام المشرحة ليلًا، كانوا بيشوفوا أنوار في غرف معينة رغم إن المكان مهجور تمامًا، وكأن حد لسه موجود جوا بيشتغل..

ومن القصص اللي كتير ناس أكدوها، صوت خطوات على البلاط البارد بليل.. زي ما يكون فيه حد ماشي في الممرات، وصوت بيقفل الأبواب بعنف، ولما حد يدخل يبص، يلاقي المكان فاضي تمامًا.

القصة الأشهر واللي ناس كتير أكدوها هي حكاية العمال اللي كانوا بيحاولوا يرمموا المكان، وبيقولوا إن كل ما يبدأوا شغلهم.. يحصل لهم حوادث غريبة، من أدوات بتتحرك لوحدها.. وصرخات بتتسمع من أركان بعيدة، لحد ما وصلوا لحالة خوف خلتهم يوقفوا الشغل نهائي.. ولحد دلوقتي محدش عارف يقرب من المشرحة..

مشرحة حلوان بقت مكان مهجور ومرعب، بس قصصه لسه بتخوف وبتتردد وسط الناس، وكأن كل اللي ماتوا فيها، سايبين وراهم أثر، رافضين يسيبوا المكان حتى بعد الموت..

عمارة الايموبيليا 

عمارة الإيموبيليا في وسط البلد.. القاهرة..

من أشهر المباني في مصر، وهي مشهورة بمعمارها المميز وبتاريخها العريق اللي بيعود لأربعينات القرن الماضي..

لكن الغريب إن العمارة دي، اللي كانت سكن للكتير من الفنانين والمشاهير في عصرها الذهبي، اتربطت بحكايات مرعبة وأساطير عن أحداث غامضة حصلت فيها..

القصص بتقول إن فيه شقق معينة في العمارة كانت بتحصل فيها حاجات غريبة.. زي سماع أصوات خطوات في الليل أو حتى ظهور خيالات بتتحرك لوحدها..

من أشهر الحكايات هي قصة الفنانة ليلى مراد اللي سكنت في العمارة، واللي كانت بتقول إنها كانت بتحس بوجود أرواح في شقتها، وده اللي خلى كتير من الناس يقولوا إن العمارة مسكونة..

فيه كمان قصص عن ناس اتعرضوا لحوادث غريبة في الأسانسير اللي دايمًا بيتقال إنه بيتعطل فجأة بدون سبب.. وكأن حد أو شيء بيتحكم فيه..

وحصلت بالفعل حوادث مؤسفة داخل الأسانسير تسببت في خوف السكان، لدرجة إن فيه ناس بتتجنب استخدامه بالليل..

ومن القصص الغامضة.. بيُقال إن شابًا كان عايش في العمارة وقام فجأة بارتكاب جريمة قتل داخل شقته..

ومن بعدها الجيران سمعوا أصوات صرخات بتطلع من الشقة الفاضية، وكأن روح الضحية بتطارد المكان..

وكمان فيه قصة عن شقة تانية كانت ساكنة فيها “ليلي مراد”  ماتت بشكل غامض.. 

وبعد وفاتها الجيران كانوا بيشوفوا أنوار بتشتعل وتنطفي فيها لوحدها، رغم إن الشقة مقفولة وماحدش بيدخلها..

عمارة الإيموبيليا فضلت على مر السنين مصدر للرعب والأساطير في وسط البلد، والناس اللي بيعيشوا فيها أو بيزوروا المكان بيفضلوا يتجنبوا الحديث عن القصص المرعبة، وكأن العمارة بتحتفظ بأسرارها المرعبة جوه جدرانها..

وفي الآخر.. تفضل الأماكن المرعبة في مصر مش مجرد مباني قديمة أو آثار، لكنها بوابات لحكايات وأساطير ناس عاشوها وسمعوها على مر الزمن..

من قصور الأشباح للمستشفيات المهجورة، دايمًا فيه قصص بتخلي الرعب والإثارة حاضرين في كل ركن..

فهل عندك الجرأة تزور أي مكان من دول وتكتشف بنفسك إذا كانت الأساطير دي حقيقة؟