في مصر..

السيد أحمد البدوي له إسمه ومحبينه.. وتحديدًا الطنطاوية.. 

ناس كتير مقتنعة أنه ولي من أولياء الله الصالحين.. 

وراجل ليه كرامات و قدر انه يعمل المعجزات.. 

وبيروحوا يزوروه وياخدوا بركاته في ضريحه في مسجد الأحمدي في طنطا.. 

وناس تانية على العكس بقى تمامًا.. متعرفش مين السيد البدوي دا أساسًا..

طب يا ترى ايه هي قصة اسطورة السيد البدوي؟ 

أصل السيد البدوي

أحمد بن علي بن يحيى البدوي الحسيني الفاسي (فاس 596 هـ/1199 م – طنطا 675 هـ/1276 م)..

 كان إمام صوفي سني عربي، ويعتبر ثالث أقطاب الولاية الأربعة عند المتصوفين..

 الطريقة البدوية، اللي بترتبط بيه، معروفة برايتها الحمراء..

 لقّب بالبدوي عشان كان دايمًا يغطّي وشه باللثام زي أهل البادية، وله كذا لقب، من أشهرهم شيخ العرب والسطوحي..

نسبه من جهة أبوّه بيرجع للحسين بن علي بن أبي طالب. اتولد البدوي في مدينة فاس المغربية.

في سنة 603 هـ/1206 م، لما كان عند أحمد البدوي سبع سنين..

 هاجرت أسرته من فاس لمكة في رحلة أخدت حوالي أربع سنين..

مروا بمصر في طريقهم وقعدوا فيها حوالي ثلاث سنين.

في بعض القصص الصوفية.. بيقولوا إن علي والد البدوي شاف في المنام صوت بيقوله: “يا علي، ارحل من البلاد دي لمكة، لأن لنا هناك شأناً.”

وبحسب المصادر الصوفية..

 البدوي بدأ يعبد الله من صغره وكان بيروح مغارة في جبل أبي قبيس قريب من مكة عشان يتعبد لوحده..

هجرته إلى العراق

 فضل كده لحد ما بقى عنده 38 سنة.. وبعدها قرر يسافر للعراق مع أخوه حسن سنة 634 هـ/1227 م.. طاف البدوي شمال العراق وجنوبه..

فيه شوية آراء عن سبب ترك البدوي مكة ورحيله للعراق.. الإمام الأكبر عبد الحليم محمود، شيخ الأزهر السابق، أكد إنه ما تصرفش لوحده زي بعض الأولياء، وأنه شاف رؤية بتقول له يروح العراق..

وناس تانية قالوا إن أحمد البدوي حس إن مكة، رغم مكانتها الكبيرة.. مش كفاية لطموحاته وآماله.. 

ففكر في الهجرة لمكان فيه إمكانيات أكبر.. وراح للعراق خصوصاً إن فيها عدد من الأولياء الصوفيين.. زي أحمد الرفاعي وعبد القادر الجيلاني..

تغير حال البدوي.. 

بعد ما قضى البدوي سنة في العراق.. رجع مكة سنة 635 هـ/1238 م..

المتصوفة بيقولوا إنه تغير جداً في سلوكه وعبادته بعد ما رجع.. بقى يكثر من الصلاة والصيام بشكل مش معتاد عليه.. وبقى طويل الصمت وبيطول النظر للسماء، و مكانش بيتكلم مع الناس إلا بالإشارات ويفضل ساكت..

أخته فاطمة بدأت تقلق عليه، وكانت تنبه أخوها حسن من نومه في الليل تشكو له من حالته..

في واحدة من الروايات، بتقول له: “ابن والدي، إن أخي أحمد قائم طول الليل، وهو شاخص ببصره إلى السماء ونهاره صائم، و انقلب سواد عينيه بحمرة تتوقد كالجمر، وله مدة أربعين يوماً ما أكل طعاماً ولا شراباً.”

الهجرة إلى مصر..

في نفس السنة اللي رجع فيها مكة، قرر البدوي يسافر لمصر، وبالتحديد “طندتا”، اللي هي طنطا دلوقتي..

وناس من الصوفية، زي عبد الوهاب الشعراني، قالوا إنه ما رجعش مكة، لكنه سافر مصر على طول بسبب حلم شافه، اللي قال له: “قم يا هُمام وسر إلى طندتا”..

والمناوي اتفق معاه بس قال إن الحلم قال له: “قُم (ثلاثاُ) وأطلب مطلع الشمس، فإذا وصلته فأطلب مغربها، وسر إلى طندتا فيها مقامك أيها الفتى”..

وذكر المناوي كمان إنه لما وصل مصر.. الظاهر بيبرس استقبله مع جيشه وكرّمه، وكان ده سنة 634 هـ..

 وده مش صحيح لأن الظاهر بيبرس ما تولى حكم مصر إلا سنة 668 هـ، وكان وقتها الملك الكامل محمد بن العادل هو اللي يحكم..

واختلفت الآراء بسبب هجرة البدوي لمصر واستقراره في طنطا..

اتقال إنه كان عنده فكرة عن موقع طنطا اللي في نص بين القاهرة والإسكندرية في دلتا النيل..

 فاستقر فيها عشان ينشر طريقته بسهولة..

 وحسب المصادر الصوفية، لما استقر البدوي في طنطا، أقام عند تاجر اسمه “ابن شحيط” أو “ركن الدين”، وكان ساكن فوق سطح داره..

ناس قالوا إنه فضل يسكن فوق السطح عشان يحب يكون وسط الطبيعة ويشوف آيات الله في السماء والأرض بسهولة..

واتقال كمان إنه كان حيّي، وما حبش يعيش جوه الدار عشان ما يحرجش صاحب الدار وأسرته..

 وكمان ممكن يكون تأثر بأهل العراق، لأنه عاش بينهم سنة، وكانوا زمان يفضلوا النوم فوق أسطح بيوتهم بسبب الحر في الصيف..

 حسب المصادر الصوفية، البدوي عاش فوق السطح حوالي اثنتي عشرة سنة، وكان يقعد أكتر من أربعين يوم من غير ما يأكل أو يشرب أو ينام.. ومن هنا جاله اللقب “السطوحي”.

كرامات السيد البدوي.. 

امتلأت كتب الصوفية بكرامات كتير منسوبة لأحمد البدوي، و بيشوف بعض الصوفية زي الإمام عبد الحليم محمود إن أكبر كرامة للبدوي هي إنه ربّى رجال وبنى أبطال مجاهدين..

في محافظة الغربية، بيظهر مئذنة وقبة مسجد أحمد البدوي داخل الترس..

ومن أشهر الكرامات المنسوبة له إنه كان ينقذ الأسرى المسلمين من إيد الصليبيين في أيام الحملات الصليبية على مصر، وكان فيه اعتقاد شائع إن البدوي كان بيستمر ينقذ الأسرى حتى بعد مماته..

وعلى النقيض تمامًا.. 

بردو في ناس بتنتقد كرامات البدوي، لأن معظمها اتسجل في الفترات الأخيرة من العصر العثماني..

 اللي كان معروف فيه بالجمود والتأخر وانتشار الجهل..

وقتها، بقى التصوف وسيلة لكسب العيش.. لأن أسهل الطرق هي استغلال جهل الناس والتلاعب بعقولهم ومشاعرهم..

في النهاية وعلى الأغلب أحمد البدوي كان راجل صالح و مجذوب لحب الله لأنه كان راجل سُني..

بس أتباعه هما اللي نسجوا حواليه قصص وأساطير هو نفسه مالوش دعوة بيها.. والله أعلم.. 

و خلونا نختم الحكاية بكلام الشيخ أحمد رزوق في كتابه “قواعد التصوف” لما قال: 

“كل شيخ لم يظهر بالسنة فلا يصح اتباعه لعدم تحقق حالته.. وإن صح في نفسه وظهر عليه ألف ألف كرامة من أمره.. “

يعني الخلاصة احنا مالناش غير كتاب الله وسنة رسوله.. عليه أفضل الصلاة والسلام..

انت بقى شايف ان السيد البدوي دا راجل فعلًا عنده كرامات ولا مجرد راجل متدين متصوف و خلاص؟ 

مغامرة تحت البحر 

في قلب المحيط الأطلسي.. وفي عمق الماء اللي مليان أسرار وغموض..

وبالتحديد يوم 18 يونيو 2023..

حصلت كارثة لا كانت علي البال ولا علي الخاطر.. 

الغواصة “تيتان”.. اللي استحوذت على أنظار العالم كله.. 

الغواصة، اللي كانت في رحلة لاستكشاف حطام سفينة “تيتانيك” الأسطورية..

الناس كانت متحمسة تشوف الحطام التاريخي، لكن في لحظة واحدة..

كل شيء اتقلب لما انقطع الاتصال بالغواصة، وابتدت رحلة البحث عن الأمل وسط أعماق البحر..

تفاصيل الرحلة.. 

الرحلة كانت في المياه الدولية شمال المحيط الأطلسي قدام سواحل نيوفاوندلاند، كندا..

الغواصة كانت في رحلة سياحية علشان يشوفوا حطام سفينة “آر إم إس تيتانيك” وكان على متنها خمسة أشخاص..

وفجأة الاتصال انقطع.. 

ودا بعد حوالي ساعة و 45 دقيقة من بداية الغطس لموقع الحطام..

وأبلغت السلطات لما الغواصة مطلعتش في الوقت المحدد..

فرق دولية بقيادة خفر السواحل الأمريكي والبحرية الأمريكية وخفر السواحل الكندي بدأوا عمليات بحث وإنقاذ..

وكمان شاركت طيارات من سلاح الجو الكندي والحرس الوطني الجوي الأمريكي..

 وسفينة من البحرية الكندية الملكية وسفن تجارية وبحثية ومركبات بتحكم عن بُعد في البحث..

بعد حوالي 80 ساعة من البحث..

لقت مركبة بتحكم عن بعد حطام الغواصة في قاع البحر جنب موقع تيتانيك..

واتضح إن الغواصة انفجرت بعد فترة بسيطة من بداية الغطس، وده أدى لوفاة كل الركاب فوراً..

تاريخ شركة “أوشن غيت”

شركة “أوشن غيت” دي شركة خاصة أسسها ستوكتون راش وسونلاين غيليرمو سنة 2009..

ومن سنة 2010، بدأت تنقل عملاء بيدفعوا رسوم للرحلات دي في غواصات تجارية قبالة سواحل كاليفورنيا، وخليج المكسيك، والمحيط الأطلسي..

ستوكتون راش شاف إن زيارات مواقع حطام السفن هتجذب انتباه الإعلام..

وفي 2016، الشركة بدأت تنقل عملاء لأول مرة لموقع حطام باستخدام الغواصة سايكلوبس 1، وراحوا يشوفوا حطام سفينة “إس إس أندريا دوريا”..

في 2019، راش قال في مقابلة مع مجلة “سميثسونيان”: “فيه حطام واحد بس الناس كلها عارفاه، لو طلبت من حد يسمي حاجة تحت المية، هيقولوا أسماك القرش، الحيتان، وتيتانيك.”

نرجع بالزمن لورا..

كانت السفينة “آر إم إس تيتانيك” سفينة بريطانية عابرة للمحيطات وغرقت شمال المحيط الأطلسي يوم 15 أبريل 1912 بعد ما اصطدمت بجبل جليدي..

 وفي 1985 اكتشفوا الحطام بتاعها على عمق حوالي 3,810 متر (يعني حوالي 12,500 قدم) وعلى بعد حوالي 400 ميل بحري من ساحل نيوفاوندلاند..

أما الغواصة “تيتان”، فهي غواصة بتستوعب خمسة أفراد وتديرها شركة “أوشن غيت”..

 اتصممت علشان تقدر تغوص لعمق يصل لغاية 4,000 متر (حوالي 13,000 قدم) بغرض استكشاف المواقع، وجمع البيانات، وإنتاج الأفلام، وتجربة الأجهزة والبرامج المخصصة لأعماق البحار..

الاتنين مرتبطين برحلات خطيرة إلى أعماق المحيط..

والاتنين بردو انتهوا بكارثة مأساوية..

تيتانيك غرقت في شمال المحيط الأطلسي في 1912 بعد ما اصطدمت بجبل جليدي..

وكان هدف غواصة “تيتان” في رحلتها هو الوصول إلى حطام تيتانيك لاستكشافه، لكنها واجهت انفجار مفاجئ أدى إلى وفاة الركاب الخمسة اللي كانوا على متنها..

يعني باختصار ، القدر جمعهم في نفس المكان تقريبًا تحت المحيط، وأدى مصيرهم المشترك إلى خسارة الأرواح في ظروف صعبة ومؤلمة..

القصة بتتكرر

في الوقت الحالي.. 

ملياردير من أوهايو اسمه لاري كونور بيخطط لرحلة جديدة لحطام تيتانيك بغواصة جديدة هتنزل لأعماق البحر..

كونور، زي ضحية غواصة تيتان هايميش هاردينغ، يعتبر عضو في مجتمع المستكشفين الأغنياء، وسبق له إنه راح لأعماق المحيط ووصل لمستويات مرتفعة في الفضاء..

لكن كونور بيأكد إن اللي حصل مع تيتان يوم 18 يونيو 2023.. واللي أدى لانفجارها ووفاة كل الركاب الخمسة في طريقهم لحطام تيتانيك، كان حالة شاذة..

 وقال لصحيفة وول ستريت جورنال و صحيفة نيويورك تايمز إن رحلته الجديدة هتكون رجوع لأساليب معروفة وموثوقة لاستكشاف أعماق البحر..

في تصريح لصحيفة التايمز الأسبوع ده، كونور قال:

 “أنا قلق إن الناس يربطوا بين الغواصات، خاصة الجديدة أو المختلفة، وبين الخطر أو المآسي..

لو مش قادرين نعمل المهمة دي، فإحنا مش ناس بتدور على الإثارة أو المخاطرة الكبيرة.”

و”إحنا” هنا بترجع  باتريك لاهي، الشريك المؤسس لشركة غواصات ترايتون، اللي كونور طلب منه تصميم غواصة جديدة بهيكل أكريليك مخصوص للرحلة..

 التقديرات بتقول إن تكلفة المركبة هتكون بعشرات الملايين من الدولارات، ومش هتكون جاهزة قبل صيف 2026..

شركة غواصات ترايتون معروفة في المجال ده، وقدرت توصل بأحد غواصاتها لعمق 10 آلاف متر، أما حطام تيتانيك بيقع على عمق حوالي 3800 متر..

تفتكر بقى ان حادثة الغواصة دي قضاء وقدر ولا اللي حصل دا مترتب له كويس أوي؟؟ 

رسولنا الكريم قال.. ان ربنا بيبعت كل 100 سنة عالم دين يجدد للمسلمين دينهم ..

زي عمر بن عبد العزيز، الامام الشافعي، الامام البخاري، وبطل الحكاية النهاردة ..

الشيخ محمد متولي الشعراوي

ازاي الشعراوي قد يوصل للمجد والعظمة دي ؟

البداية كانت في.. 15 أبريل 1911 لما اتولد محمد متولي الشعراوي.. 

في قرية دقدوس بمركز ميت غمر في الدقهلية.. من أسرة بسيطة.. 

وفي يوم ولادته خاله شاف رؤيا ان في كتكوت واقف على المنبر وبيخطب.. 

ومن اليوم دا أصر متولي الشعراوي انه محمد لازم يحقق الرؤيا دي..

وفعلاً محمد كان من أذكى الطلاب في الكُتاب.. وعلى سن 11 سنة قدر أنه يحفظ القرآن كله.. 

وعلى سن 19 سنة اتجوز محمد ودخل المرحلة الثانوية في معهد الأزهر..

ولأنه كان ثورجي و بيقود مظاهرات ضد الاحتلال.. ففي سنة 1934 الشعراوي كتب قصيدة اعتبروها إهانة للذات الملكية واتفصل من المعهد.. 

بس قدر يرجع تاني و يكمل المرحلة الثانوية..

وبعد مناوشات مع أبوه.. دخل محمد كلية اللغة العربية جامعة الأزهر..

واتخرج الشعراوي سنة 1941.. 

بداية الشعراوي

اتقدم في مسابقة التعيين وطلع الأول.. واتعين مدرس بمعهد طنطا الأزهري..

وسنة 1950 اتعرض عليه يسافر يشتغل في كلية الشريعة في مكة.. وبالفعل سافر واشتغل..

لحد ما حصل خلاف كبير جدا بين عبد الناصر والملك فيصل.. وطبعًا رجعت بعثة الأزهر والشعراوي معاها.. 

ولما رجع عينوه مدير لمكتب شيخ الأزهر ” الشيخ حسن مأمون”.. اللي بعدها أُقيل بأمر من عبد الناصر.. 

وفي نفس السنة دي طلعت بعثة من الأزهر لتعريب الجزائر.. وكان الشعراوي رئيس البعثة وقعد هناك 7 سنين.. 

بعد نكسة 67

سنة 1970 عبد الناصر عين الشعراوي أمين الفكر في الحزب الاشتراكي..

 ودا كان خبر صعب جدًا على الشعراوي عشان كان ضد الاشتراكيين بشكل عام..

وقعد الشعراوي يدعي ربنا يخلصه من المأزق ده.. 

وطبعًا ده عشان مفيش حد كان يقدر يناقش عبدالناصر في قرار..

وسبحان الله.. مات عبد الناصر قبل ما يقابل الشعراوي ويسلمه المنصب بكام يوم.. 

عهد جديد

أول ما اتولى السادات الحكم..

أمر الشعراوي انه يطلع من الجزائر على السعودية عشان يصلح العلاقات اللي باظت في عهد جمال عبد الناصر..

وبالفعل الشعراوي كان له ثقله في السعودية.. 

عشان كدا رجع العلاقات بمنتهى السهولة و رجعت بعثة الأزهر لمكة من تاني ..

وفي سنة 1973..

كان أول ظهور الشعراوي على التليفزيون في برنامج نور على نور..

وقال إنه تفسيره للقرآن هي مجرد خواطر بتيجى على قلب مؤمن.. 

وبعد اللقاء ده ازدادت شعبية الشعراوي والناس حبته جدًا.. 

وطبعًا شجعه جدًا الرئيس المتدين أنور السادات.. 

وبعدها اتعمل للشعراوي اشهر برنامج تفسير في العالم الإسلامي كله..

برنامج “خواطر إيمانية” وكان بيجي كل جمعة بعد الصلاة.. 

سنة 1976.. 

منح السادات الشيخ الشعراوي وسام الاستحقاق من الطبقة الأولى بمناسبة وصوله لسن الــ 60 عام.. 

وفي نفس السنة اتعين وزير الأوقاف..

لكن الشعراوي مارتحش نهائي للمنصب..

و قال ان دي كانت أسوأ تجربة في حياته كلها.. 

لأنه لقى نفسه بيحارب في جبهات كتير..

ومشوه في أول تعديل وزاري سنة 1978..

سنة 1980.. اتعين الشعراوي عضو في مجلس الشورى ورفض كل المناصب اللي اتعرضت عليه.. 

واتفرغ للدعوة والتفسير

ولأنه كان عنده ملكة قوية في تفسير القرآن.. استحق لقب “أمير الدعاة”.. 

عهد مبارك

وفي سنة 1981..

بعد قتل السادات.. تولى مبارك الحكم ..

والعلاقة بين مبارك والشعراوي كانت كويسة جدًا ومافيهاش مشاكل.. 

ودا بان بعد رجوع مبارك من محاولة اغتيال في إثيوبيا سنة 1995.. 

قال الشعراوي وقتها جملته الشهيرة.. 

“أنا أقف على أعتاب نهايتي.. فلن أختمها بنفاق..
إذا كنت قدرنا فليوفقك الله.. وإذا كنا قدرك فلعينك الله على أن تتحمل.” 

وفي يوم 17 يونيو 1998.. توفي الشيخ الشعراوي عن عمر يناهز 87 سنة.. 

مالحقش يفسر القران كامل ووقف عند “سورة الصف”..

بس ألف أكتر من 60 كتاب.. فتاوى وتفسير و خواطر.. 

وساب تسجيلات من أعظم ما قيل في العصر الحديث.. 

ومشي في جنازته أكتر من مليون شخص.. وادفن في قبره في قرية دقدوس.. 

انت بقى شايف ان تفسير الشعراوي للقرآن كان مجرد خواطر؟

من زمان..

الإنسان كان يعرف القرابين في ثقافات كتير حول العالم..

و في مصر، القرابين ليها تاريخ طويل، سواء في الديانات القديمة أو الحديثة..

و عرف إنه لازم يقدم حاجات غالية علشان يرضي الإله..

وكان كمان بيجهز الميت للعالم التاني..

من ضمن الحاجات اللي كانت بتتقدم القرابين الحيوانية.. سواء للميت أو لقوى أعلى..

وكان الهدف منها خصوبة الأنواع الحيوانية..

وكمان كان فيه قرابين بشرية قبل التاريخ، وغالباً كانت من النساء والأطفال..

تنوعت القرابين عبر تاريخ الإنسان باختلاف الحضارات والثقافات الدينية المنتشرة في كل مكان.. 

هي مش بس مجرد تقديم أشياء مادية، لكن كمان تعبير عن الشكر والامتنان أو حتى طلب الحماية والبركة..

بداية تطور فكرة القرابين..

من أول الأحداث اللي حصلت في العالم، حسب الرواية الدينية، كان فيه هابيل وقابيل، اللي قدموا أول قربان معروف..

هابيل كان عنده أغنام وقدم قربان من ماشية سمينة، أما قابيل فكان مزارع، وقدم حزمة من الزرع الرديء واحتفظ بالزرع الجيد لنفسه..

فأنزل الله نار فأكلت قربان هابيل كعلامة على قبوله، وفضل قربان قابيل كما هو، وبسبب كده، قابيل قتل أخوه هابيل..

الحضارات القديمة زي السومرية والبابلية والفينيقية واليونانية والرومانية وحتى المصرية القديمة، كانت تعرف القرابين..

كانوا بيقدموها لأسباب مختلفة، زي إرضاء الآلهة لتجنب غضبها، أو الوفاء بالنذور، أو الشكر على النعم، أو طلب الغفران، أو لمباركة الماشية والمزروعات والعائلة..

وتنوعت القرابين بين النباتية والحيوانية وأحيانًا بشرية..

القرابين البشرية

ويل ديورانت في كتابه “قصة الحضارة” قال إن الإنسان القديم في أوقات الحاجة وشح الطعام لجأ لأكل أخوه الإنسان واعتبر لحم البشر من أطايب الطعام..

الفكرة دي استمرت مع القبائل اللي بتاكل لحوم البشر..

بما إن القرابين كانت في أبسط أشكالها طعام للآلهة، فكانوا شايفين إن أفضل حاجة يقدموها للإله هي الإنسان نفسه، اللي يعتبر أعلى مرتبة في الأضاحي..

ولأن الطقوس الدينية بتستمر لسنين طويلة حتى بعد ما تتغير العادات، فضل مفهوم الأضحية البشرية مرتبط بالأضحية الحيوانية رغم إن البشر كفوا عن أكل بعضهم..

القرابين الحيوانية

كانت القرابين الحيوانية بتتقدم للآلهة، إما بحرقها بالكامل.. وده اللي اتسمى في اليونانية القديمة (الحرق الكامل)..

أو بحرق جزء منها مع الاحتفاظ أو التبرع بجزء من الأضحية..

حسب الباحث رضا الأبيض، القرابين الحيوانية كانت أكثر الأنواع شيوعاً، وأهم الحيوانات اللي كان الإنسان بيقرب بها للإله كانت الخراف.

و كانت القرابين الحيوانية هي الطريقة الوحيدة لنجاتهم من الموت..

لكن بعد كده توسع المفهوم، وبقى كل عمل يحتاج لقربان، سواء ولادة مولود أو الشفاء من مرض أو حتى الوفاء للآلهة، وحتى الموت كان ليه قربان..

القرابين النباتية

في العصور القديمة، كان الإنسان يعتقد إن الآلهة هي اللي تمتلك الأرض والحقول.. ولما يقدّموا لها قرابين نباتية، كانوا بيؤدوا واجب ديني..

في بلاد ما بين النهرين، كان الساميون بيقدّموا أنواع مختلفة من الأطعمة زي الخضروات والفواكه. والعرب كمان كانوا يقدموا قرابين نباتية لألهتهم..

 وكانت تتمثل في بواكير المحاصيل والنخيل.

وبحسب نفس الدراسة، كان بعض العرب، خصوصاً أهل المدر والحرث، لما يحرثوا الأرض أو يغرسوا غرس، يخطوا خط في النص ويقولوا إن الجزء اللي تحت الخط للآلهة..

التماثيل أو الدمى

مع مرور الوقت.. بدأ الناس يستغنوا عن تقديم القرابين، وصارت الدمى بديلة عن القرابين البشرية والحيوانية. السومريون والساميون في بلاد ما بين النهرين عرفوا الظاهرة دي، المعروفة بظاهرة البدل.. فمثلاً تموز الإله، كان بديل عن صعود الخصب بعد موته، شرط إنه يتم إرسال تموز ليمثلها..

 العرب كمان كانوا يستخدموا التماثيل كقرابين، وإذا كان القربان بشري كان التمثال بشكل إنسان، وإذا حيواني كان بشكل حيوان..

عودة نوستا الأميرة ..

تم إعادة مومياء عمرها 500 سنة لفتاة إنكا إلى بوليفيا بعد حوالي 129 سنة من ما تبرعت بيها لمتحف جامعة ولاية ميشيجان. وذكر مسئول إنها المرة الأولى اللي تتعاد فيها بقايا بشرية ذات أهمية أثرية لجبال الأنديز.

المومياء المعروفة باسم “نوستا”، اللي معناها “الأميرة” بلغة الكيشوا، أذهلت الكثيرين بسبب حالتها الممتازة، حيث جدائلها السوداء لسه محافظة على رونقها، حسبما قالت صحيفة ديلي ميل البريطانية.

الخبراء بيقولوا إن المومياء جات من منطقة في مرتفعات الأنديز قرب لاباز خلال السنوات الأخيرة من حضارة الإنكا.

 القرابين ليها مكانة كبيرة في ثقافاتنا وعاداتنا..

 هي مش بس طقوس، لكن كمان رمز للتواصل مع الروحانيات والمعتقدات..

كل واحد بيقدم قرابين حسب إيمانه ورؤيته..

عشان فالنهاية الأمر كله بيرجع لإيماننا وحبنا للمشاركة والعطاء..

انت بقى قولنا ايه فكرتك عن موضوع القرابين دا.. وهل متفق معاه دينيًا واجتماعيًا ولا لأ؟

“ابن القدر” كما لقب نفسه.. عبد الحليم حافظ..

عاش حياة كلها صعوبات ومآسي ولكن ما غناش غير كل الأغاني اللي بتعبر عن الدفا والحب والحنين..

ودا كان بالنسبة للناس غريب جدا..

 ازاي عارف يعبر عن مشاعرهم.. رغم أنه ماشفش دا ف حياته ولا عاشه!! 

بداية الرحلة..

العندليب اتولد في يوم 21 يونيو 1929.. في قرية الحلوات في الشرقية.. 

كان الأصغر بين أربعة إخوة..

وأمه توفيت بعد ولادته بكام يوم.. 

وبعدها أبوهم كمان توفى قبل ما يكمل عامه الأول، فعاش يتيم..

عاش مع خاله الحاج متولي ولعب مع أولاد عمه..

لكن جاله مرض البلهارسيا اللي أثر على حياته بشكل كبير..

قال عن نفسه مرة إنه “ابن القدر”، لأنه عمل 61 عملية في حياته.. وكان بيستغرب ازاي قدر يخرج منهم.. 

أخوه الكبير إسماعيل كان مطرب ومدرس موسيقى..

و بعدين، حليم دخل كُتاب الشيخ أحمد، ومن أول ما بدأ المدرسة حب الموسيقى بقى واضح..

لدرجة إنه بقى رئيس فرقة الأناشيد في مدرسته، ومن ساعتها وهو عاوز يدخل عالم الغناء..

الفترة دي بدأت بعد إجازته في الإذاعة عام 1951..

لما قدم قصيدة “لقاء” من كلمات الشاعر صلاح عبد الصبور وألحان كمال الطويل..

واستمرت لحد ما بدأ تصوير أول أفلامه “لحن الوفاء” عام 1955، وكان وقتها مرض البلهارسيا مش مأثر عليه قوي..

فترة ازدهار العندليب..

في الفترة دي..

 لاحظنا إنه في عدد كبير من الأغاني فيها نبرة تفاؤل زي: “ذلك عيد الندى”، “أقبل الصباح”، “مركب الأحلام”، “في سكون الليل”، “فرحتنا يا هنانا”، “العيون بتناجيك”، “غني.. غني”، “الليل أنوار وسمر”، “نسيم الفجرية”، و”ريح دمعك”، وكمان “اصحى وقوم”، “الدنيا كلها”..

بعض الأغاني كانت تتكلم عن جمال الطبيعة، زي: “الأصيل الذهبي”، “هل الربيع؟”، و”الأصيل”..

وفي أغاني عاطفية كانت تذكر الطبيعة كجزء من عشق الإنسان لكل ما هو جميل زي “ربما”، “في سكون الليل”، “القرنفل”، “حبيبي في عينيه”، “صحبة الورد”، “ربيع شاعر”، “الجدول”، “إنتِ إلهام جديد”، “هنا روض غرامنا”، و”فات الربيع”..

لكن لما زادت أعراض مرض البلهارسيا عنده بدءاً من عام 1956، بدأنا نلاحظ إن نبرة التفاؤل اختفت تدريجياً من أغانيه، وحلت محلها نبرة الحزن..

عبد الحليم حافظ اشتغل مع الملحن العبقري محمد الموجي وكمال الطويل وبليغ حمدي..

 وكمان عنده أغاني شهيرة من ألحان موسيقار الأجيال محمد عبد الوهاب زي: “أهواك”، “نبتدي منين الحكاية”، و”فاتت جنبنا”.. الثنائي حليم وبليغ قدما مع الشاعر المعروف محمد حمزة مجموعة من أجمل الأغاني العربية، منها: “زي الهوا”، “سواح”، “حاول تفتكرني”، “أي دمعة حزن لا”، و”موعود” وغيرها.

غنى كمان للشاعر الكبير نزار قباني أغنيتين مميزتين، هما “قارئة الفنجان” و”رسالة من تحت الماء”، واللي لحنهم محمد الموجي.

بعد حرب 1967..

غنى في حفلة تاريخية أمام 8 آلاف شخص في قاعة ألبرت هول في لندن لدعم المجهود الحربي لإزالة آثار العدوان..

 في الحفلة دي.. قدم أغنية “المسيح” من كلمات عبد الرحمن الأبنودي وألحان بليغ حمدي، وكمان غنى “عدى النهار”، وهي واحدة من أشهر أغانيه..

كان عبد الحليم صديق للزعيم الحبيب بورقيبة، والحسن الثاني، والملك حسين..

كان عنده حلم إنه يقدم قصة “لا” للكاتب الكبير مصطفى أمين على شاشة السينما ورشح نجلاء فتحي لبطولتها، لكن القدر ماساعدوش..

كمان قدم 3 برامج غنائية، هي: “فتاة النيل” للشاعر أحمد مخيمر وألحان محمد الموجي وإخراج كامل يوسف، و”معروف الاسكافي” للشاعر إبراهيم رجب وألحان عبد الحليم نفسه وإخراج عثمان أباظة..

و”وفاء” للشاعر مصطفى عبد الرحمن وألحان حسين جنيد وإخراج إسماعيل عبد المجيد..

الحب الحقيقي والوحيد في حياة العندليب.. 

حب الفنان عبد الحليم حافظ الحقيقي كان مع “ديدي”.. سيدة مطلقة، وبدأت قصة حبهم على شاطئ سيدي بشر في الإسكندرية..

 لكن عبد الحليم ماتجوزهاش..

كان ناوي يطلب إيدها من جدها، لكن الجد رفض وقال إنه عايز يرجعها لزوجها..

ديدي كانت تعبانة في زواجها، وقالت إنها عايزة تفصل وتعيش مع عبد الحليم..

بعد كده.. جدها اتصل بالعندليب وقال له إن ديدي تعبت جداً وجالها مرض نادر، وبدأ سمعها ونظرها يقل..

عبد الحليم سافر لها لندن على طول..

 وهي طلبت منه إنه يتجوز في حياتها علشان تطمن عليه وتشوفه سعيد.. 

عبد الحليم طمّنها وقال لها: “إن شاء الله هتقومي وإن شاء الله هنتجوز”، لكن للأسف، توفيت بعدها.

مرض العندليب.. 

أصيب العندليب الأسمر بتليف في الكبد بسبب مرض البلهارسيا، وكان التليف ده سبب وفاته عام 1977..

 أول مرة عرف فيها العندليب بالمرض كان عام 1956.. لما كان عنده 26 سنة..

 لما حصل له أول نزيف في المعدة وهو مدعو على الإفطار عند صديقه مصطفى العريف في رمضان..

الأطباء اللي عالجوه خلال رحلته مع المرض..

 كانوا: الدكتور مصطفى قناوي، الدكتور ياسين عبد الغفار، الدكتور زكي سويدان، الدكتور هشام عيسى، الدكتور شاكر سرور، ومن إنجلترا الدكتور تانر، و الدكتورة شيلا شارلوك، و الدكتور دوجر ويليامز، ود. رونالد ماكبث، ومن فرنسا د. سارازان..

كان عنده سكرتيرة خاصة اسمها الآنسة سهير محمد علي، واشتغلت معاه من 1972 وكانت معاه في كل المستشفيات اللي قعد فيها..

المستشفيات اللي رقد فيها برة كانت: مستشفى ابن سينا في الرباط (المغرب)..

وفي إنجلترا: مستشفى سان جيمس هيرست، ولندن كلينك، فيرسنج هوم، ومستشفى كنجز كولدج (اللي شهد وفاته)، وكمان “سالبتريد” في باريس..

وفاة العندليب.. 

وفي يوم الأربعاء 30 مارس 1977 تفاجئ الجمهور بوفاة العندليب الأسمر.. 

والسبب الرئيسي لوفاته كان الدم الملوث اللي نقل له وسبب له التهاب كبدي فيروسي (فيروس سي)..

ومعاه كمان تليف في الكبد نتيجة إصابته بداء البلهارسيا من وهو صغير.. زي ما وضح الفحص في لندن..

وقتها ما كانش فيه علاج للمرض ده..

 بعض الآراء قالت إن السبب المباشر في وفاته كان خدش المنظار اللي دخل لأمعائه وسبب نزيف..

 الأطباء حاولوا يوقفوا النزيف على قد ما يقدروا بس للأسف معرفهوش وتوفي عبد الحليم في لندن عن عمر 47 سنة..

الجمهور حِزن حُزن شديد.. 

لدرجة إن بعض البنات في مصر انتحروا بعد ما سمعوا الخبر..

وتم تشييع جثمانه في جنازة كبييرة جدًا .. لم تشهد مصر مثلها غير جنازة الرئيس جمال عبد الناصر والفنانة أم كلثوم..

 عدد الحضور في الجنازة كان أكثر من 2.5 مليون شخص، وكانت انفعالات الناس صادقة جداً وقت التشييع..

في ختام رحلتنا في حياة عبد الحليم حافظ..

بنشوف إزاي الفنان ده قدر يخلد اسمه في تاريخ الموسيقى العربية بفضل موهبته المختلفة وإرادته القوية.. 

ورغم أن حياته كلها كانت مليانه مآسي.. عبد الحليم هيظل رمز للحنين والفن الحقيقي..

وهتفضل اغانيه بتعبر عن مشاعرنا للأبد..

قولنا انت اغنية بتحبها لعبد الحليم وبتعبر عنك؟؟ 

لوحة “زحل يلتهم ابنه” للفنان الإسباني فرانشيسكو غويا.. اللي رسمها سنة 1823،..

 تعتبر واحدة من أكثر الأعمال الفنية جدلًا..

 كتير من النقاد بيشوفوها كـأبشع لوحة في تاريخ الفن.. بسبب المعاني العميقة والرمزية اللي فيها.

اكتشاف اللوحة ومكانتها الفنية

بعد ما غويا مات..

اكتشفوا ان اللوحة مرسومة على حائط بيته..

 وبعد كده تم نقلها لقماش.. وعرضوها في متحف ديل برادو في مدريد..

 اللوحة بتنتمي لـ“المرحلة السوداء”..

 وهي الفترة الأخيرة في حياة غويا..

 لما فقد سمعه وبدأ يعاني من اضطرابات نفسية شديدة.. وكمان تأثر بالغزو الفرنسي بقيادة نابليون لبلاده..

الرمزية في اللوحة..

اللوحة بتصور الملك زحل وهو بيأكل ابنه..

تعبيرًا عن خوفه من انه يتشال من العرش..

 الصورة دي مرتبطة بأسطورة يونانية بتحكي عن جشع الإنسان والأفعال اللي ممكن يرتكبها من أجل السلطة.. القصة بتدور حول الإله الروماني ساترن..

 اللي شبه الإله اليوناني “كرونوس”..

 اللي استولى على عرش الألوهية بعد ما قتل أبوه “أورانوس”..

 اللي كان رمز للظلم.

أسطورة كرونوس وزوجته ريا..

الأسطورة بتقول إن كرونوس كان خايف من نبوءة تقول إن واحد من أبنائه هيسقطه من العرش..

 فبدأ يبلع كل مولود ينجبوه زوجته ريا..

بعد ما ابتلع خمسة من أبنائه.. ريا قررت تخفي ابنها السادس..

فقامت بإلباسه حجر عشان يبقى شكله كأنه مولود جديد.. وسلمته لكرونوس اللي ابتلعه وهو مش داري..

لما كبر الابن “زيوس”.. أمّه أوعزت له بفكرة الانتقام..

 وقدر يقدم لوالده شراب يفرغ ما في بطنه عشان يخرج أبنائه..

 في النهاية، المعركة بين زيوس وكرونوس انتهت بهزيمة الأخير، وبقى زيوس هو الحاكم..

تحريف غويا للقصة..

غويا حرف القصة شوية، لأنه ظهر زحل وهو بيأكل جسد شاب بالغ بدلاً من طفل صغير..

بعض النقاد لاحظوا إن الجسد اللي زحل بيأكله يشبه جسد امرأة..

وده بيخلي الناس تتساءل عن سبب اختيار غويا لهذا الشكل.. واحد من الخبراء “نايجل غليندينغ”..

 قال إن الاختيار ده ممكن يكون ناتج عن إحباطاته الشخصية مع الشيخوخة و مرضه و علاقاته الفاشلة.

الخذلان السياسي والاجتماعي..

بس وراء العمل الفني ده كان فيه معاني أعمق..

ممكن نفهم اللوحة كمان كتعبير عن الخذلان اللي عانى منه الشعب الإسباني بسبب سياسات العائلة الحاكمة بعد الاحتلال..

زحل هنا بيمثل الحاكم، وابنه بيمثل الشعب اللي بيعاني من التهميش والإهمال..

في سياق الحياة المعقدة اللي عاشها غويا، كان العمل ده بمثابة تعبير عن الألم والمعاناة اللي عاشها الشعب بسبب الاحتلال..

تأثير الحرب والصراعات النفسية..

غويا كان معروف إنه رسام الملوك..

وكان جزء من تيار الرومانسية اللي بتركز على التعبير عن المشاعر..

لكن نهايته كانت مليانة اضطرابات ومشاكل نفسية، زي اضطراب ما بعد الصدمة..

 بسبب اللي شافه من قتل واغتصاب وتهجير..

 كل المشاهد دي ساهمت في تشكيل رؤيته الفنية وفي خلق العمل العميق ده.

في النهاية..

لوحة “زحل يلتهم ابنه” مش مجرد عمل فني.. ده تجسيد للصراع الإنساني والظلم السياسي..

من خلال اللوحة دي..

غويا بيخلينا نغوص في أعماق النفس البشرية ونفهم التعقيدات اللي بتتجاوز الفنون البصرية..

انت بقى أول ما شوفت اللوحة دي حسيت بإيه؟؟ 

شجرة الدر محدش قدر يعرف لها أصل محدد ولا حتى تاريخ ميلاد ..

لدرجة ان حتى تاريخ وفاتها اختلفوا فيه.. 

لكن اللي معروف عنها إلى حد ما يعني.. إنها من أصول خوارزمية..

شجرة الدر كانت من عيلة كبيرة.. وليها سلطان.. 

بس التتار فرق شملهم وقوتهم وبقت جارية.. 

واشتراها الأمير الصالح “نجم الدين أيوب”.. ابن السلطان الكامل “محمد أيوب”.. سلطان مصر من عام 1218 لـ 1238.. 

شجرة الدر مكنتش مجرد جارية عادية.. وكانت جميلة جمال مش طبيعي.. 

وكانت بتعرف تقرأ وتكتب.. وكمان كانت بتغني.. 

وطبعًا دي مواصفات صعب جدا تتجمع في جارية واحدة..

وده طبعًا خلى الملك الصالح ينبهر بيها و يتعلق بيها جدًا..

ويحبها لدرجة انه كان بياخدها معاه في كل سفرياته.. 

وقتها كان الملك الصالح بيحكم “حُصن كيفا”.. علي حدود تركستان.. 

وفي الوقت ده خلفت شجرة الدر ابنها “خليل” من الصالح نجم الدين أيوب.. 

فعشان كدا إداها حريتها من كونها جارية واتجوزها..

الملك الصالح كان بيحلم بحكم مصر.. وهو فعلًا كان ولي العهد.. 

لكن سوداء بنت الفقيه.. مرات الملك الكامل التانية.. واللي كانت أقرب لقلبه.. 

أقنعت جوزها السلطان الكامل أنه ينصب ابنها “العادل أبو بكر” في ولاية العهد بدل ابنه الكبير “الصالح نجم الدين”.. 

اللي لما عرف بده كان هيتجنن.. مش عشان الحكم والنفوذ.. لكن عشان لأن أخوه العادل كان طايش جدا وكان هيضيع البلد..

ولما مات الملك الكامل.. بالفعل تولى ابنه الملك العادل الحكم.. 

لكنه في وقت قصير.. خرب الدينا.. ماكنش في دماغه الحكم أصلا وكان بيصرف كل فلوس الدولة علي ملذاته.. 

وده خلى كبار الأمراء يتضايقوا منه جدًا.. 

فبعتوا لأخوه الصالح نجم الدين عشان يجي هو يلحق الوضع ويمسك الدولة مكانه.. 

وفعلاً قرر نجم الدين ينزل القاهرة.. 

لكن لما أخوه الملك العادل عرف.. عمله كمين في الكرك وللأسف اعتقلوه.. 

شجرة الدر طبعًا وقفت جمب جوزها جدًا وعاشت معاه في المعتقل.. 

وهما الاتنين كانوا بيحلموا مع بعض بحكم مصر.. 

وشجرة الدر كانت دايمًا بتشجع جوزها على أنه يرجع حقه المُغتصب.. 

وفعلا بعد 7 شهور خرج نجم الدين من المعتقل وراح على مصر.. بعد ما الأمراء انقلبوا على أخوه الملك العادل.. 

سنة 1249.. لما جت الحملة الصليبية السابعة على مصر بقيادة لويس التاسع ملك فرنسا..

كان الملك الصالح مريض مرض شديد جدًا.. وفي عز ما كانت الحرب مشتدة بين المسلمين والصليبيين.. مات الملك الصالح في المنصورة عن عمر يناهز 44 سنة بعد ما وقعت دمياط في ايد الصليبيين.. 

وساب البلد من غير حاكم.. 

وشجرة الدر كانت وقتها مش مستوعبة موت ابنها خليل وبعدها بفترة قصيرة موت جوزها.. 

بداية شجرة الدر.. 

قدرت شجرة الدر انها تسيطر على حزنها و وقفت على رجليها عشان تلحق البلد..

 واستدعت قائد الجيوش الأمير “فخر الدين” ورئيس القصر السلطاني الطواشي ” جمال الدين” ..

 واتفقت معاهم انهم يخبوا خبر وفاة الملك عشان نفسية الجنود في الحرب..

ونقلت جثمان الملك في مركب علي القاهرة في سرية تامة.. وحطته في قلعة جزيرة الروضة.. 

وأعلنوا أن الملك تعبان ومش قادر يقابل حد.. 

واستمروا في تنفيذ الخطة لدرجة أنهم كانوا بيدخلوا الأكل كل يوم للأوضة اللي المفروض الملك نايم فيها.. عشان محدش يحس بحاجه .. 

وأصبحت شجرة الدر بتصدر القرارات والأوامر الملكية بختم الملك.. 

وصلت أخبار وفاة الصالح أيوب للصليبيين في دمياط.. وشجعتهم على الهجوم على القاهرة..

روبرت دارتوا، أخ الملك لويس، قاد هجوم مفاجئ على معسكر المصريين في جديلة..

 وقتل الأمير فخر الدين يوسف وهرب الجنود. 

الأمير بيبرس عرض خطة على شجرة الدر علشان يقبضوا على الصليبيين، وهي وافقت..

 لما دخلوا المنصورة، فاجأتهم المماليك والسكان، وانتهت المعركة بهزيمتهم ومقتل عدد كبير منهم..

 المعركة دي كانت بداية ظهور المماليك البحرية كمقاتلين أساسيين في الدفاع عن مصر.

نهاية توران شاه.. 

بعد النصر، تنكر السلطان الجديد لشجرة الدر، بدل ما يحفظ لها جميلها، بدأ يهددها ويطلب منها فلوس أبوها..

 كانت بتقوله إنها صرفت الفلوس على الحرب وتدبير أمور الدولة..

 لما زاد عليه الضغط وخافت منه، راحت القدس عشان تخاف من غدره وانتقامه.

مش بس كده، توران شاه كمان زاد غيظه على أمراء المماليك، اللي كان لهم الفضل في تحقيق النصر وهزيمة الحملة الصليبية السابعة..

 بدأ يفكر إنه يتخلص منهم، لكن هم كانوا أسرع منه وأعدوا نفسهم كويس، وفي الآخر اتخلصوا منه بالقتل على يد أقطاي.

مقتل شجرة الدر..

عز الدين أيبك قلب عليها بعد ما استقر على الحكم في البلاد، وشال منافسيه من الداخل ومن الأيوبيين برة، وبدأ يتقن إدارة الأمور..

 بعد كده قرر يتجوز بنت “بدر الدين لؤلؤ” صاحب الموصل..

فغضبت شجر الدر وقررت تدبر مؤامرة للتخلص منه..

بعت له رسائل تتودد وتطلب عفوه، وهو انخدع بحيلتها وراح للقلعة، وهناك اتقتل في 23 ربيع الأول 655 هـ (1257م).

في يوم 10 أبريل سنة 1257، اتقتل السلطان عز الدين أيبك وهو بيستحمي في قلعة الجبل على إيد مجموعة من الخدم..

السلطان كان ماسك الحكم بقاله سبع سنين..

 في اليوم اللي بعده، أعلنت شجر الدر إنه توفى فجأة بالليل، لكن المماليك المعزية، بقيادة نائب السلطنة قطز، ما صدقوش الكلام ده..

الخدم اعترفوا تحت التعذيب بالمؤامرة، وحاولوا يقتلوا شجر الدر، لكن المماليك الصالحية جابوها وحموها ونقلوها للبرج الأحمر في القلعة..

  وبعدين تم إعدام الخدم اللي اغتالوا عز الدين أيبك..

وأخذوها لزوجة عز الدين أيبك، اللي أمرت جواريها يقتلوها بعد كام يوم..

قاموا بضربها على دماغها بالقباقيب ورموها من فوق سور القلعة عارية تماماً.. 

وما اتدفنتش إلا بعد أيام.. على إيد واحد من عامة الشعب اللي خدها ودفنها.. 

وكده انتهت حياتها بشكل مفاجئ بعد ما كانت محط أنظار الجميع..

وماتت بنفس الطريقة اللي قتلت بيها عز الدين أيبك.. 

تفتكر شجرة الدر كانت تستاهل الموتة دي؟؟ ولا دا كان ظلم ليها كونها امرأة عظيمة حكمت وحافظت على مصر !! 

سنة 1956 .. 

لما عبد الناصر قرر يقلب على اليهود .. وطردهم من مصر..

كان رد فعل اليهود مش أحسن حاجة..

مشيوا اه.. بس وهما مقررين انهم مش هيخسروا كل حاجة..

وقالوا انهم هيهربوا فلوسهم بره..

و ده كان بسبب سلطتهم الكبيرة على اقتصاد البلد..
ومحدش كان قادر يعرف هما بيخرجوا الفلوس برا ازاى.. 

لحد ما فــ يوم..

دخل الملازم “أحمد رشدي” قسم في إسكندرية ومعاه مسجون..

ولما اتسأل الملازم مين ده؟
قال دا يهودي مترحل من ليبيا..

وبعد ما رحلوه على القاهرة..

جاله ظابط البوليس السياسي “حسن حسني”..

واتكلم مع المسجون .. 

وقاله “احنا مش عارفين جنسيتك ايه.. مصري ولا يهودي ولا انجليزي” !!

بس اللي متأكدين منه أن اليهود اللي انت اتحبست معاهم في اسكندرية كانوا متأكدين انك يهودي زيهم.. 

و انت كراجل انجليزي أكيد مابتكرهش المصريين..  

رد عليه المسجون وقاله.. “لا.. انا مصري زيي زيك”..

قام قاله الضابط.. “ايوااا.. احكي لي قصتك بقى”

من هُنا البداية.. 

رفعت علي سليمان الجمال..

اتولد في دمياط 1 يوليو سنة 1927.. بعد ما والده توفى سنة 1936.. 

أخوه سامي بقى هو المسؤول عنه..

رفعت كان طالب مش مهتم بدراسته.. وكان بيحب المسرح والسينما..

اتخرج سنة 1946 واشتغل محاسب، لكن اتفصل بتهمة اختلاس فلوس..

سافر على سفينة وزار موانئ كتير، وبعدين لقى شغل في شركة سياحية في ليفربول..

سافر لأمريكا من غير تأشيرة واتقبض عليه في ألمانيا ورجع لمصر.. بعد ما رجع..

 اشتغل في شركة قناة السويس بجواز سفر مزور..

بعد ثورة 1952.. 

قدر يجيب جواز سفر جديد، لكن اتقبض عليه بتهمة إنه شخصية يهودية..

“بعد أن قضيت زمنًا طويلاً وحدي مع أكاذيبي، أجدني مسرورًا الآن إذ أبوح بالحقيقة إلى شخص ما..

 وهكذا شرعت أحكي لــ حسن حسني كل شيء عني منذ البداية..

 كيف قابلت كثيرين من اليهود في استوديوهات السينما، وكيف تمثلت سلوكهم وعاداتهم من منطلق الاهتمام بأن أصبح ممثلا..

وحكيت له عن الفترة التي قضيتها في “إنجلترا” و”فرنسا” و”أمريكا”، ثم أخيرًا في “مصر”..

 بسطت له كل شيء في صدق..

 إنني مجرد مهرج، ومشخصاتي عاش في التظاهر ومثل كل الأدوار التي دفعته إليها الضرورة ليبلغ ما يريد في حياته”

• من مذكرات رفعت الجمال.

بعد ما سمعه الضابط “حسن حسني”.. 

قاله.. “انت مش قدامك غير حلين”.. 

الحل الأول .. إما تتسجن بسبب قضايا التزوير الكتير اللي عليك..
الحل الثاني .. يإما انك تحط ايدك في ايدينا و يتمسح ماضي “رفعت الجمال” نهائي..

وطبعًا رفعت من غير أي تردد اختار الحل الثاني.. وحط ايده في ايد الحكومة.. 

الضابط “حسن حسني” زرع رفعت وسط اليهود عشان يكشف له شبكة تهريب الأموال.. 

وطبعًا بعد كورس مخابرات محترم..

 اتحول رفعت الجمال.. لليهودي “جاك بيتون”.. 

وبقى عنده باسبور وشهادة ميلاد وكله رسمي من الحكومة المصرية.. 

وشغلوه في شركة تأمينات مصرية كلها يهود.. 

وفعلاً نجح رفعت الجمال انه يكون صداقات قوية أوي مع اليهود.. لحد ما صاحب “ايلي كوهين”..

الجاسوس اللي كان بيشغل منصب حساس جدًا وخطر في سوريا.. 

خلال رحلة رفعت الجمال الطويلة في شغله كجاسوس..

انتقل في عدد من المحطات المهمة عشان يوصل لهدفه، منها فرنسا وإيطاليا والعراق..

زار العراق بمهمة رسمية سنة 1965 في عهد الرئيس العراقي الراحل عبد السلام عارف..

وكانت الزيارة ضمن اتفاق الوحدة الثلاثية بين مصر والعراق وسوريا..

الحكومات الثلاثة اتفقت على خطوات لتفعيل الوحدة، من خلال خطة التبادل الاستراتيجي للدفاع المشترك..

يعني نشروا قواتهم على أراضي بعض..

العراق استقبلت وحدات من الدول دي زي كتيبة من القوات الخاصة المصرية..

ومجموعة من المخابرات المصرية اللي كانوا شغالين ضد “إسرائيل”..

وكان من بينهم رفعت الجمال..

مرة أخرى وجدت نفسي أقف عند نقطة تحول خطيرة في حياتي..

 لم أكن أتصور أنني ما أزال مدينًا لهم، ولكن الأمر كان شديد الحساسية عندما يتعلق بجهاز المخابرات.. 

فمن ناحية روعتني فكرة الذهاب إلى قلب عرين الأسد..

فليس ثمة مكان للاختباء في إسرائيل، وإذا قُبض عليَّ هناك فسوف يسدل الستار عليَّ نهائيًا والمعروف أن إسرائيل لا تضيع وقتًا مع العملاء الأجانب..

يستجوبونهم ثم يقتلونهم..

ولست مشوقًا إلى ذلك..

 ولكني كنت أصبحت راسخ القدمين في الدور الذي تقمصته، كما لو كنت أمثل دورًا في السينما، وكنت قد أحببت قيامي بدور “جاك بيتون”..
أحببت اللعبة، والفارق الوحيد هذه المرة هو أن المسرح الذي سأؤدي عليه دوري هو العالم باتساعه، وموضوع الرواية هو الجاسوسية الدولية..

وقلت في نفسي أي عرض مسرحي مذهل هذا؟…

 لقد اعتدت دائمًا وبصورة ما أن أكون مغامرًا مقامرًا، وأحببت مذاق المخاطرة..

 وتدبرت أمري في إطار هذه الأفكار، وتبين لي أن لا خيار أمامي..

 سوف أؤدي أفضل أدوار حياتي لأواجه خيارين في نهاية المطاف: إما أن يُقبض عليَّ وأستجوب وأشنق، أو أن أنجح في أداء الدور وأستحق عليه جائزة الأوسكار..

• من مذكرات رفعت الجمال.

وقدر علي مدار حياته الجاسوسية أنه ينقل معلومات خطيرة جدًا لمصر..

العميل المزدوج.. !

في 2002..

نزل كتاب عن الجواسيس في إسرائيل بيقول إن الجمال كان عميل مزدوج، وإن الإسرائيليين عرفوا هويته من البداية..

لكن الرواية المصرية بتأكد إنه كان جاسوس مخلص لمصر وقدم معلومات مهمة..

 الكتاب بيشير إنه الجمال دخل إسرائيل بهوية يهودية وفتح شركة سفر..

 وكان فيه تعاون سري بين المخابرات المصرية والشاباك.. كمان كان له مغامرات نسائية، وتزوج ألمانية بعد عشرة أيام من معرفته بيها..

عودة البطل.. 

بعد ما خلص رفعت الجمال شغله كجاسوس.. على أكمل وجه بدأ يشتغل في البترول وأسس شركة آجيبتكو..

 أنور السادات وجه وزير البترول إنه يهتم به من غير ما يكشف هويته..

 لكن الوزارة ما كانتش عندها غير بئر مليحة المهجور، ورفضت تسمح له ينقل البترول بالتنكات..

لجأ للسادات مرة تانية، لكنه ملاقاش مساعدة..

 شركته ساءت وزوجته باعتها بعد وفاته لشركة كندية..

عنده ابن واحد من زوجته الألمانية، لكنه مش مصري لأن المخابرات مسحت كل أوراقه..

 لما طلبوا منه الجنسية، الطلب اترفض لأن مفيش دليل يثبت بنوته لمصري.

مذكرات الجمال.. 

قرر الجمالي إنه يكتب مذكراته..  وخلاها عند المحامي بتاعه.. على إنه يسلمها لمراته بعد وفاته بثلاث سنين علشان تكون استوعبت الأمور وقدرت تستعيد هدوءها وتفهم حقيقة جوزها اللي عاش معاها كل السنين دي..

 في المذكرات، يحكي عن ازاي عرف يحصل على امتياز التنقيب عن البترول المصري في 1977..

 وبعدين رجع مصر.. 

وفي آخر المذكرات، بيتكلم رفعت الجمال عن إصابته بمرض خبيث وبيتناول العلاج الكيماوي في أكتوبر.. وكتب “الجمال” وصية تفتح في حال وفاته، وكانت بتقول :

هذه وصيتي..

 أضعها أمانة في أيديكم الكريمة..

 السلام على من اتبع الهدى..

 بسم الله الرحمن الرحيم إنّا لله وإنّا إليه راجعون لقد سبق وتركت معكم ما يشبه وصية..

 وأرجو التكرم باعتبارها لاغية، وها أنذا أقدم لسيادتكم وصيتي بعد تعديلها إلى ما هو آت: 

في حالة عدم عودتي حيا أرزق إلى أرض الوطن الحبيب مصر أي أن تكتشف حقيقة أمري في إسرائيل..

 وينتهي بي الأمر إلى المصير المحتوم الوحيد في هذه الحال، وهو الإعدام شنقا..

 فإنني أرجو صرف المبالغ الآتية:

 لأخي من أبي سالم علي الجمال، القاطن.. برقم.. شارع الإمام علي مبلغ.. جنيه. أعتقد أنه يساوى إن لم يكن يزيد على المبالغ التي صرفها على منذ وفاة المرحوم والدي عام 1935، وبذلك أصبح غير مدين له بشيء.. 

لأخي حبيب علي الهجان، ومكتبه بشارع عماد الدين رقم…، مبلغ… كان يدّعي أني مدين له به، وليترحم عليّ إن أراد. مبلغ… لشقيقتي العزيزة … حرم الصاغ … والمقيمة بشارع الفيوم رقم… بمصر الجديدة بصفة هدية رمزية متواضعة مني لها، وأسألها الدعاء لي دائما بالرحمة..

المبلغ المتبقي من مستحقاتي يقسم كالآتي: نصف المبلغ لـ… نجل الصاغ … وشقيقتي …، وليعلم أنني كنت أكن له محبة كبيرة.. 

النصف الثاني يصرف لملاجئ الأيتام بذلك أكون قد أبرأت ذمتي أمام الله، بعد أن بذلت كل ما في وسعى لخدمة الوطن العزيز، والله أكبر والعزة لمصر الحبيبة إنا لله وإنا إليه راجعون رأفت الهجان ..

أشهد أن لا إله إلا الله وأشهد أن محمدا رسول الله..

وفاة الجمال.. 

وفي يوم 30 يناير 1982..

توفى رفعت الجمال بعد معاناته لمدة 9 شهور مع مرض سرطان الرئة في مرحلة متأخرة.. 

وكان موصي انه مايدفنش في مقابر اليهود.. وكتب قصة حياته بالكامل.. واتفتحت وصيته بعد 3 سنين من وفاته..

انت بقى بعد ما قرأت قصة حياة رفعت الجمال.. مصدق احتمالية انه ممكن يكون كان عميل مزروج فعلاً زي ما اسرائيل قالت؟؟ 

على مدى تاريخ مصر الحديث..

مفيش قضية جنائية خدت نفس الاهتمام الرسمي والشعبي زي قضية ريا وسكينة..

حتى ولو بعد مرور أكتر من 100 سنة على إعدامهم ..

 لسه القضية شاغلة بال ناس كتير، والجدل حواليهم مستمر..

جريمة إنسانية بشعة هزت مصر تعتبر من أكثر الجرائم التي اقشعرت لها الأبدان على مر التاريخ المصري.. 

مش عشان بس شهدت مقتل 17 امرأة..

ولكن عشان أبطالها ستات.. كانوا أول امرأتان ينفذوا حكم الإعدام في تاريخ مصر..

 ريا وسكينة السفاحتان اللي قتلوا الستات بمشاركة أزواجهم ، ودا عشان ياخدوا مصوغات الضحايا من مجوهرات..

و على مدار عام كامل..  قتلوا 17 امرأة وحفروا قبور لجثث النساء في مكان إقامتهم، وكانوا بياكلوا ويشربوا، ويمارسوا حياتهم الطبيعية فوق جثث الموتى !!

ريا وسكينة كانوا أختين مصريتين مشهورين كأكتر السفاحين رعباً فى تاريخ مصر..

الحكاية من أولها ..

في الفترة بين ديسمبر 1919 و نوفمبر 1920، أسسوا عصابة لاستدراج النساء وقتلهم وسرقة كل مجوهراتهم الذهبية..

ودا سبب حالة من الرعب في الإسكندرية..

بدايتهم كانت في الصعيد، و انتقلوا لكفر الزيات وبعدين الإسكندرية..

واشتغلوا في أنشطة غير مشروعة كتير زي المخدرات والدعارة..

انضمت ليهم عصابة مكونة من أزواجهم وأفراد تانيين صحابهم و شكلوا جبهة من الخطر في الزمن دا..

بدأت العصابة الاجرامية العمل في الإسكندرية لأكثر من ثلاث سنوات..

وده بعد مجيهم من صعيد مصر إلى بنى سويف وكفر الزيات لتتزوج ريا حسب الله سعيد مرعى..

أما سكينة فاشتغلت فى بيت دعارة لحد ما وقعت فى حب أحد الرجال..

 انتقلت ريا مع زوجها.. وسكينة مع عشيقها لأماكن كتير وكانوا بيستدرجوا فيها الضحايا..

أربعة منازل فى الإسكندرية شهدت الجرائم دي بعد انتقال السفاحتين للسكن فيها..

ومنها سوق زنقة الستات القريب من ميدان المنشية.. 

 وعناوين البيوت هي: 5 شارع ماكوريس في حي كرموز، 38 شارع علي بك الكبير، 16 حارة النجاة، 8 حارة النجاة..

كانت ريا بتروح السوق تختار ضحاياها.. وكانت بتختار ضحيتها بعناية.. لازم تكون لابسة مجوهرات كثيرة..

وبعدين تروح ريا تبدأ كلام معاها و تقرب منها.. وبعدين تعزمها عندها في البيت.. 

وتقوم بقتلها ودا طبعًا بمساعدة زوجها وشقيقتها وعشيق شقيقتها، بالإضافة إلى عرابي حسان وعبد الرازق يوسف..

وطبعًا كترت البلاغات عن النساء المختفية..

ومن سوء حظهم تكرر اسم ريا و سكينة في محاضر البلاغات.. أن الضحايا كان آخر ظهور ليهم مع ريا و سكينة !! 

وقوع ريا وسكينة في الفخ!

و في صباح 11 ديسمبر 1920 جت المفاجأة الكبيرة لما لقى عسكري الدورية جثة امرأة..

لها بقايا عظام وشعر رأس طويل بعظام الجمجمة وكل أعضاء الجسم منفصلة عن بعضها..

ولقي جنب الجثة طرحة من الشاش الأسود وفردة شراب سوداء..

وكترت المفاجآت بقدوم راجل اسمه أحمد مرسى عبده يتقدم ببلاغ إلى قسم اللبان..

بيقول انه خلال حفره جوا لإدخال المياه لقى عظام آدمية في البيت كان يستأجره رجل اسمه محمد احمد السمني ..

الراجل ده كان بيأجر غرف البيت من الباطن لحسابه الخاص ومنهم كانت سكينة بنت على..

خاصة أنها هى اللى استأجرت الحجرة اللى لقي فيها الراجل الجثة تحت البلاط !! 

و بدأ رجال البوليس في البحث عن الدلائل وراء مقتل تلك الضحايا إلى أن لاحظ أحد المخبرين..

وقال في نفس الوقت أحمد البرقى ان في رائحة بخور مكثفة من غرفة ريا بالدور الارضي بشارع على بك الكبير..

ودا أثار شكوك اليوزباشى إبراهيم حمدى وأمر بإخلاء الغرفة دي وشال الصندرة ليكتشف أن بلاط الحجرة لسه جديد..

وطلعت ريحة العفونة بشكل لا يحتمل..

ووقتها ظهرت جثة امرأة..

وطبعًا ظهر على ريا الارتباك و تم القبض عليها وبعدها لقوا ختم حسب الله المربوط بمكان الجريمة !!

و اتضح من دا سقوط الختم أثناء دفن الجثث !!

و اعترفت ريا فى القسم بالجرائم بعد اكتشاف الجثة الثالثة من قبل قوات الأمن..

وحكمدار الأسكندرية أمر بالتفتيش تحت بلاط كل الأماكن التى سكنت فيها ريا وسكينة عشان يلاقي عدد كبير من الجثث تحت البلاط..

ويلاقي الملازم أحمد عبدالله من قوة البحث على مجوهرات وصور وكمبيالة بـ 120 جنيها في بيت عرابى..

ولقى نفس الضابط علي أوراق وأحراز أخرى فى بيت باقي المتهمين. 

الطفلة “بديعة” و كلمة السر !! 

كانت “بديعة” ابنة “ريا” هي كلمة السر اللي حلت لغز اختفاء وقتل 17 امرأة فهي اللي قامت بالاعتراف و الادلاء عنهم..

و “بديعة” هي ابنة ريا التي حبت أمها علي الرغم من تصرفات أمها البشعة معها..

و هي طفلة عانت الظلم و الفقر والجفاف العاطفي من قبل أسرتها..

 و من الذنب الكبير اللي تحملته بداخلها بسبب اللي عملته بعيلتها كلها و شافته بعينها واعترافها اللي كان شهادة ودت أسرتها كلها لحبل المشنقة . 

العدالة تأخذ مجراها.. 

فى 16 مايو 1921 الموافق 8 رمضان سنة 1339 ..

صدر حكم الإعدام على كل من ريا وسكينة وحسب الله وعبدالعال و عرابي حسان وعبد الرازق يوسف..

و في يوم الخميس الموافق 22 ديسمبر 1921 ..

تم تنفيذ حكم الإعدام وكانت دي المرة الأولى اللي تم فيها تنفيذ حكم الإعدام داخل السجون المصرية..

أما الطفلة بديعة فبعد ان تم تنفيذ الاعدام في أهلها بقت يتيمة بلا أهل..

وتولي البوليس بديعة ووداها الملجأ العباسي وفضلت   الست مريم صاحبة خالتها سكينة تزورها بشكل مستمر

و لكن بعد شهور قال القدر كلمته و أشتعلت النيران في الملجأ العباسي..

و توفي الكثير من الأطفال اليتامي و كان من بينهم أشهر طفلة في التاريخ اتسببت شهادتها في إعدام كل أهلها و هي الطفلة بديعة ابنة ريا همام..

براءة ريا وسكينة!!

ادّعى سيناريست اسمه أحمد عاشور إنه تحقق من القضية.. ووصل لبراءة ريا وسكينة..

كمان بيقول إنه شغال على إنتاج وثائقي لسه ما اتعرضتش، هيحكي البراءة..

اللي بتقول إن ريا وسكينة تعاونوا مع الجهاز السري لثورة 1919 عشان يواجهوا الاحتلال الإنجليزي..

وإنهم همّ اللي لفّقوا لهم القضية عشان يتخلصوا منهم..

لغز هيفضل محيرنا العمر كله..

 تفتكر فعلاً بعد أكتر من 100 سنة ممكن ريا وسكينة يطلعوا بريئين ؟؟!

الزمن بيعيد نفسه.. والكوليرا رجعت بعد 77 سنة..

أخبار عمالة تنتشر أنه تم حجز 128 حالة في المستشفيات من 11 سبتمبر لحد يوم الأحد 22 سبتمبر.. 

الحالات بتعاني من أعراض نزلات معوية زي الإسهال والغثيان والقيء.. 

في منطقة “أبو الريش” وبعض قُرى مدينة دراو شمال أسوان..

رواد السوشيال ميديا كان لهم آراء مختلفة، فبعضهم اتكلم عن حجم المشكلة في أسوان، وآخرين عن أسبابها..

 التحليلات تفاوتت بين الحديث عن عدوى موسمية عادة بتظهر في أسوان في الوقت ده من السنة..

وبين التحذيرات من احتمال تفشي وباء الكوليرا..

اللي تبنوا خبر تفشي الكوليرا اتهموا المسؤولين بالتكتيم على مرض وبائي خطير، وطالبوا بإنقاذ أهالي أسوان من الموت.

سمعت الأخبار دي قبل كدا ؟.. صح؟؟ 

بداية الكوليرا في مصر 

مع نهاية عام 1947 مصر واجهت أزمة وباء الكوليرا و ابتدآ ظهور حالات اشتباه بالمرض.. 

في عدد الصحيفة الصادر يوم 24 سبتمبر 1947، كان فيه أول خبر عن بداية الأزمة لقرائها بعنوان..

 “التحوط من إصابات الكوليرا.. بيان من وزارة الصحة”..

الخبر اللي أعلنته وزارة الصحة أعلنت إن في بعض من القرى الموجودة في محافظة الشرقية ومحافظة القليوبية ظهرت حالات يشتبه في إنها كوليرا..

و على الرغم من إن الفحوصات المعملية لتأكيد المرض كانت لسه ما اتعملتش..

الا ان الوزارة اتخذت كل الإجراءات الوقائية على طول، وطلبت من الجمهور اتباع التحوطات اللازمة..

وأهمهم : عدم شرب المياه من غير الموارد العامة، وإنه لو ما اتوفرش، لازم نغلي الماء قبل استعماله..

 وكمان اللبن لازم يتغلي..  أما الخضار فلازم يتاكل مطبوخ بس.. والفواكه والخضار لازم تتغطس في مياه سخنة تغلي لمدة دقيقة، و لازم نغسل أيدينا قبل الأكل..

مقاومة الكوليرا

يوم الخميس 25 سبتمبر، كان فيه تقرير صحفي بعنوان “تدابير واسعة النطاق لمقاومة الكوليرا”..

سفر وزير الصحة ووكيلها للمناطق الموبوءة..

اعتماد نصف مليون جنيه للمكافحة.. 

انتظار نتيجة تحليل عينات أخذت من المصابين..

و تحت العنوان الفرعي “إنتاج المصل الواقي”.. 

اتكتب إن معالي الدكتور نجيب إسکندر باشا وزير الصحة راح لمصلحة المعامل و معمل المصل واللقاح بالعجوزة..

عشان يشرف بنفسه على إعداد المصل الواقي من الوباء ويشوف قدرة المعامل على إنتاجه..

الأهرام ذكرت كمان إن وزارة الصحة قالت إنه تم منع وصول خضراوات أو ألبان لمدينة القاهرة..

من المناطق اللي ظهرت فيها إصابات، وإن كل البلاد اللي فيها أعراض مرض وبائي تم محاصرتها، بحيث محدش يدخلها أو يخرج منها..

وزارة الصحة طلبت من وزارة المالية الموافقة على فتح اعتماد بمبلغ 100 ألف جنيه لمكافحة الوباء.. 

لكن دولة النقراشي باشا رفع الاعتماد لنصف مليون جنيه..

 وتحت عنوان “تجنيد الأطباء” وصلت الأخبار إن وزير الصحة ألغى كل إجازات أطباء الوزارة..

 وطلب تجنيد أطباء والانكلستوما والملاريا والصحة القروية للعمل في المناطق الموبوءة عشان يقضوا على المرض تمام..

 وأصدر أوامره إن موظفي الوزارة يرجعوا بعد الظهر ومش يغادروا إلا بإذن منه..

وكان فيه عنوان فرعي كمان..

 “عند وزير الصحة.. التدابير التي اتخذتها الوزارة”..

 وذكر فيه إجراءات زي منع الملاحة في ترعة الإسماعيلية، وحصر المراكب فيها لأنها قريبة من القُرى اللي فيها إصابات..

 كمان اتمنع سفر الباخرة اللي بتنقل الحجاج من السويس، ومنع سفر حجاج القُرى..

وكمان ما توقفش القطارات في سكة القاهرة وبورسعيد عند المحطات القريبة من القُرى اللي سجلت إصابات..

المجتمع المصري أخد شوية مبادرات لدعم جهود مكافحة الوباء، ومن ضمنها صناعة السينما..

 في عدد 29 سبتمبر، كان فيه خبر عن “استخدام السينما في مقاومة الوباء”..

و اتذكر إن وزارة الصحة اتصلت باستوديو مصر عشان يتخذوا تدابير لعرض أفلام تصويرية ناطقة تحذر الجمهور من وباء الكوليرا..

عدد 30 أكتوبر..

 الوزارة استقبلت خبر من دار سينما مترو إنها قررت تتبرع بدخل الحفلة الأولى من فيلم “البداية والنهاية للقنبلة الذرية” للمنكوبين بوباء الكوليرا في مصر..

التشريعات الرادعة شملت ما نُشر في عدد 29 سبتمبر بعنوان “100 جنيه مكافأة لمن يرشد عن المتاجرين بالمصل”..

و بخصوص المصل، فنفس العدد إنه اتقال ان “تحضير اللقاح في معامل الحكومة بس”..

 وكمان “إنتاج 80 ألف جرعة يومياً”.. أما عن الإمدادات الطبية اللي جاية من بره، فظهر في عدد 30 سبتمبر إن “الإمداد من الخارج لمكافحة الكوليرا” وفيه شحنات اللقاح والمواد الطبية اللي جت من إنجلترا وأمريكا..

وكان دور “الأهرام” مش بس إنها توصل الخبر للناس، لكن كمان زادت على كده، لما ذكرت في عدد 31 أكتوبر “إنها تبرعت بمبلغ 300 جنيه”..

نهاية الوباء

وأخيراً، في أواخر عام 1948، بدأ الوباء يختفي.. وعدد الوفيات يقل.. 

 في العدد الصادر يوم 5 ديسمبر كان فيه عنوان “توزيع الميداليات على مكافحين الكوليرا”..

وظهر في الخبر إن وزارة الصحة عملت حفلة شاي في فندق هليوبوليس بمصر الجديدة لتوزيع الميداليات التذكارية على اللي بذلوا جهود في مكافحة وباء الكوليرا خلال السنة اللي فاتت..

تفتكر بقى ان القصة بتاعت زمان هتتعاد من تانى وهيبقى وباء.. ولا الموضوع هيبقى أبسط بكتير ؟؟