﴿فَوَجَدَا عَبْدًا مِنْ عِبَادِنَا آتَيْنَاهُ رَحْمَةً مِنْ عِنْدِنَا وَعَلَّمْنَاهُ مِنْ لَدُنَّا عِلْمًا﴾

وسط حكايات الأنبياء، بيظهر عالم حكيم..  

بيقولوا إنه عاش من زمان أوي..

ويمكن لسه عايش لحد دلوقتي.. محدش عارف أصله ولا حياته بتمشي إزاي..

هل هو نبي يوحى إليه؟.. ولي من أولياء الله؟.. ملاك بيعيش وسط البشر؟.. ولا مجرد عبد صالح ليه حكمة مش معروفة؟

كل اللي نعرفه عنه.. مجرد قصص بيتنقلها الناس عبر الأجيال..

وكل قصة بتزيده غموض أكتر..

ظهر لسيدنا موسى، وعلّمه حاجات خفيّة عن أسرار الكون والقدر.. وبرغم إن سيرته مذكورة في القرآن -وتحديدًا في سورة الكهف- .. بس برضه حكايته لسه مليانة ألغاز…

ما اتذكرش اسمه بشكل صريح.. 

بس اتعرف علي مدار العصور باسم “الخضر”..

أول ظهور للخضر

في يوم من الأيام..

سيدنا موسى، عليه السلام، طلب يتعلم من علم الخضر عند مجمع البحرين، وقال له: 

﴿قَالَ لَهُ مُوسَى هَلْ أَتَّبِعُكَ عَلَى أَنْ تُعَلِّمَنِ مِمَّا عُلِّمْتَ رُشْدًا﴾..

 الخضر كان عنده علم وحكمة مش عند حد تاني، وفيه جدل كتير حوالين كونه نبي ولا مجرد ولي صالح.

في ناس كتير بتختلف في تفاصيل شخصيته. الصحابي عبد الله بن مسعود، رضي الله عنه..  قال ان هو المقصود في الآية دي..

﴿قَالَ الَّذِي عِنْدَهُ عِلْمٌ مِنَ الْكِتَابِ أَنَا آتِيكَ بِهِ قَبْلَ أَنْ يَرْتَدَّ إِلَيْكَ طَرْفُكَ فَلَمَّا رَآهُ مُسْتَقِرًّا عِنْدَهُ قَالَ هَذَا مِنْ فَضْلِ رَبِّي لِيَبْلُوَنِي أَأَشْكُرُ أَمْ أَكْفُرُ وَمَنْ شَكَرَ فَإِنَّمَا يَشْكُرُ لِنَفْسِهِ وَمَنْ كَفَرَ فَإِنَّ رَبِّي غَنِيٌّ كَرِيمٌ ﴾..

لكن ابن عباس كان ليه رأي مختلف، وقال إنه كان آصف بن برخيا، مش الخضر..

 وبرغم من إن الناس بيحبوا يقولوا إنه لسه حيّ لحد دلوقتي، إلا إن العلماء اتفقوا إنه خلاص مات من زمان..

الخضر مش شخصية خاصة بالإسلام بس.. هو كمان شخصية مهمة في ديانات تانية زي المسيحية واليهودية و كمان الدرزية..

بيشوفوا الخضر كرمز للقوة والحكمة، وحامي للبحار، ومُعلِّم للمعرفة السرية..

أصل الخضر

الخضر بيفضل شخصية غامضة ومقدسة عند ناس كتير.. ودوره بيفضل محفور في خيالهم.. مع إنه مش باين دايماً إنه شخص واحد.. إلا إنهم بيشوفوه زي روح بتظهر وقت الأزمات.. وبيساعد كل اللي بيحتاجه..

الروايات كتيرة ومختلفة حوالين نسب الخضر.. 

وده كان دايماً موضوع جدل بين العلماء..

ابن كثير ذكر في كتابه “البداية والنهاية” إن الخضر ممكن يكون ابن سيدنا آدم نفسه، وبيحكي قصة تقول إنه كان له عمر طويل عشان يشهد ظهور المسيح الدجال ويكذبه.. الرواية دي نقلها عن الحافظ ابن عساكر، لكنها بتعتبر منقطعة وغريبة..

في روايات تانية بتقول إنه كان قابيل بن آدم، وبعضهم بيقول إنه بليا بن ملكان أو المعمّر بن مالك بن عبد الله..

وواحدة من الروايات بتقول إنه ابن عمائيل من نسل إسحاق..

كمان، في ناس بتعتقد إنه كان من سبط النبي هارون، أخو سيدنا موسى، لكن القول ده بيعتبر بعيد..

فيه رواية تانية بتقول إنه ابن بنت فرعون..

أو حتى إنه فرعوني في الأصل..

وكمان في بعض الأقوال بتربطه بالنبي اليسع..

وبعض العلماء شايفين إنه من نسل فارس، وكان أبوه فارسي وأمه رومانية، أو العكس..

وفي النهاية.. فيه كمان رأي إنه كان اللي أماته الله مئة سنة ثم بعثه، زي ما ذُكر في سورة البقرة..

هل مازال الخضر حي؟ 

تعددت الأقوال، وكل حكاية بتدي تفاصيل مختلفة بشكل مختلف..

لكن كلها بتزود الغموض حوالين شخصية الخضر ونسبه اكتر واكتر..

العلماء اتفقوا إن الخضر ميت زي باقي البشر.. لكن في كتب كتير بتروي قصص عن إنه لسه عايش.. رغم إن الروايات دي سندها ضعيف وما فيش دليل قوي عليها..

وفي كتاب “البداية والنهاية”.. جت حكاية بتقول إن الخضر كان أطول بني آدم عمرًا.. وإنه دفن آدم بعد الطوفان.. وإنه عاش فترة طويلة بسبب دعوة من سيدنا آدم بطول العمر..

كمان اتقال إن الخضر شرب من عين الحياة.. وده كان سبب إنه يفضل عايش.. لكن الشيخ عبد الله بن جبرين أنكر الرواية دي وقال إنها غير صحيحة وإن ما فيش حاجة زي نهر الحياة اللي بيخلي اللي يشرب منه يعيش للأبد..

قال كمان إن القصص اللي بتتكلم عن ناس زي الخضر وإلياس وذي القرنين اللي عايشين لحد دلوقتي مالهاش أصل..

وفي “مجموع الفتاوى” لابن تيمية..

جابوا عن سؤال هل الخضر وإلياس لسه عايشين أو معمّرين.. وكان الجواب إنهم مش في الأحياء..

واستشهدوا بحديث النبي محمد ﷺ اللي بيقول فيه إنه مش هيبقى حد على الأرض بعد مية سنة..

 وده بيأكد إن الخضر خلاص توفى زي باقي البشر..

الخضر في الديانات 

في المسيحية.. الخضر بيعتبر شخصية مقدسة.. والناس بتقول إنه هو نفسه مار جرجس..

 الحكاية المشهورة عند المسيحيين بتقول إنه فيه تنين كان بيطلع كل سنة على سكان بيروت، يخوفهم ويقتل منهم..

عشان يخلّصوا من الشر ده، أهل المدينة اتفقوا يقدموا له بنت جميلة كل سنة عن طريق القرعة.. 

وفي سنة من السنين، القرعة وقعت على بنت حاكم المدينة. البنت كانت مؤمنة، ففضلت تدعي لربنا ينقذها.. 

فجأة، ظهر لها مار جرجس وهو راكب حصان وبيده حربة..

لما التنين طلع يهجم عليها..

مار جرجس باغته وضربه بالحربة.. فمات التنين في الحال.. الحاكم بنى كنيسة في المكان ده عشان يكرم مار جرجس.. وبيحتفل المسيحيين بعيد مار جرجس كل سنة في 23 أبريل.. لأنه استشهد في اليوم ده سنة 303 ميلادي بعد ما اعتنق المسيحية على أيام الإمبراطور دقلديانوس..

أما في اليهودية.. قصته قريبة من القصة اللي عندنا في الإسلام عن سيدنا موسى والخضر.. بس الشخصيات مختلفة شوية..

القصة بتقول إنه يوشع بن لاوي طلب من ربنا إنه يقابل إلياس، وربنا استجاب..

لما اتقابلوا، يوشع طلب من إلياس إنه ياخده معاه في رحلته ويعرفه أسرار معينة، وإلياس وافق بشرط إنه ما يسألش عن أي حاجة يشوفها..

القصة دي زي اللي عندنا في الإسلام.. بس الأسماء والأحداث مختلفة شوية..

في النهاية..  اختلفت الآراء حول نبوّة الخضر.. بعض العلماء بيقولوا إنه نبي، زي ما ذكر ابن حجر لما استشهد بكلامه لموسى في القرآن: 

 (وَما فَعَلْتُهُ عَنْ أَمْرِي)

 بمعنى إنه كان بيوحى إليه.. فهل فعلًا نزله الوحي ولا كان بيوحي إليه من غير وحي؟؟ .. 

 كمان ابن عطية نقل عن البغوي إن أغلب العلماء شايفين إنه نبي، لكن اختلفوا إذا كان رسول ولا لأ..

ابن عباس ووهب بن منبه قالوا إنه نبي بس مش مرسل.. 

وفي روايات تانية.. 

زي إسماعيل بن أبي زياد ومحمد بن إسحق.. بيقولوا إنه كان رسول لقومه واستجابوا له.. وده الرأي اللي نص عليه ابن الجوزي..

وفي أقوال تانية بتقول إنه ولي من الأولياء، أو إنه ملك من الملائكة، أو عبد صالح.. 

بس الحقيقة احنا ما نعرفش هل هو ملك أو نبي أو عبد صالح..! 

انت بقي تفتكر ان الخضر ده ملك ولا نبي ولا عبد صالح؟ وتفتكر هو عايش معانا كل ده فعلًا ولا مات من زمان؟؟ 

في عمق الحرب العالمية الثانية..

حصلت حاجة غريبة ومثيرة في مدينة فلادلفيا الأمريكية.. اتعرفت بعد كده بتجربة فلادلفيا..

القصة بتبدأ مع مشروع سري.. هدفه خلق سفينة حربية غير مرئية.. 

لكن بدل ما يتحقق النجاح المطلوب، التجربة قلبت الأمور رأسًا على عقب، وتسببت في نتائج مرعبة..!

الجنود اللي شاركوا في التجربة واجهوا أشياء ماحدش كان يتوقعها، زي اختفاء مفاجئ وتحولات غريبة في أجسادهم..

التجربة أثارت تساؤلات كثيرة حول الحدود بين العلم والأخلاق.. وفتحت باب النقاش عن الأخطار الكامنة في التجارب العلمية..

 فهل كان هدفهم نبيل ولا لعبوا بالنار؟ 

تجربة فيلادلفيا.. اللي بتعرف أحيانًا بمشروع قوس قزح، هي واحدة من أشهر الأساطير اللي مرتبطة بالبحرية الأمريكية.. 

في سنة 1943.. اتقال إن البحرية حاولت تخفي مدمّرة اسمها يو إس إس إلدريدج عن أعين العدو باستخدام تقنيات مغناطيسية..

 لكن التجربة دي ما نجحتش زي ما كانوا بيتوقعوا..

ورغم كده، ظهرت شائعات كتير عن تأثيرات التجربة على الطاقم..

تفاصيل التجربة

بحسب الروايات.. كان الهدف من التجربة هو استخدام مجالات مغناطيسية وجاذبية عشان يخلو السفينة غير مرئية.. 

 لكن بعد ما اتعملت دراسات وبحوث، اتضح إن الروايات دي مليانة تناقضات..

البحرية الأمريكية نفت أي علاقة لها بالتجربة، واعتبرتها مجرد خرافة..

الشائعات والادعاءات

كتير من الصحف في الوقت ده اتكلمت عن الموضوع.. وأشارت إن بعض البحّارة عانوا من آثار التجربة..

لكن ما كانش فيه أي دليل علمي يدعم الكلام ده..

 في مقال كتبه روبرت أورمان.. 

وضح إن الشخصية الرئيسية في القصة.. 

كارلوس أليند، كان في الحقيقة شخص عنده مشاكل نفسية، مما يثير الشكوك حول مصداقية روايته..

الأبحاث والدراسات

الكثير من النقاد قالوا إن قصة تجربة فيلادلفيا تعتمد على سرد درامي أكتر من الحقائق الموثوقة..

مثلاً.. المؤرخ مايك داش عمل تحليل للقصة ولاقى إنها مليانة تناقضات.. 

لأنه ماكانش فيه أي دليل علمي يدعم الادعاءات..

العلم والتقنيات

لحد دلوقتي.. مفيش أي نظريات علمية تدعم فكرة تجربة فيلادلفيا..

بعض الكتب ذكرت إن آينشتاين كان بيشتغل على نظرية لها علاقة قبل ما يموت، لكن ما فيش دليل على الكلام ده..

ومع إن في نظريات حديثة عن “عباءات التخفي”.. 

إلا إنها مش مرتبطة بالظواهر اللي اتذكرت في تجربة فيلادلفيا..

التناقضات الزمنية

امتى حصلت التجربة بالضبط؟ فيه تناقضات كتير في التواريخ..

 لأنه مفيش تحقق من وجود يو إس إس إلدريدج في فيلادلفيا في الوقت اللي اتقال إنه حصل فيه..

وفي سنة 1996، مكتب الأبحاث البحرية اعترف إنه معملش أي تحقيقات عن التخفّي الراداري في الفترة دي..

شهادات المحاربين القدماء

في سنة 1999، بعض المحاربين القدماء اللي خدموا في يو إس إس إلدريدج أكدوا إنهم ما شافوش السفينة ترسو في فيلادلفيا..

الشهادات دي تضيف شكوك أكتر حول مصداقية القصة..

تجربة فيلادلفيا، على الرغم من إنها موضوع مثير، لكن في النهاية تُعتبر واحدة من أساطير الخيال العلمي..

مفيش أدلة علمية تدعمها، مما يخليها قصة تفتقر للمصداقية وتفضل في إطار الخيال..

انت بقى بعد ما قرأت القصة.. تفتكر اللي حصل دا كان حقيقة ولا مجرد خيال؟؟ 

تخيلوا معايا واحد يقدر يسافر من مكان لمكان في لمحة.. 

أو يظهر فجأة في وسط الناس رغم المسافات الكبيرة! الحكايات دي مش بس أساطير.. 

لكن فيها بركة وتاريخ وروحانيات عميقة.. 

فيه ولي في دمشق.. بيقدر يرد على أمه من مكة وكأنه جنبها!.. متخيلين!!.. 

ولا بقى أسطورة الشيخ المختفي اللي بيصلي في أماكن بعيدة من غير ما حد يشوفه..

“أهل الخطوة”.. اسم مش بس بتخطف الأنفاس.. لكنها بتفتح لنا أبواب لعالم من الإيمان بالغرائب والقدرات الخارقة اللي موجودة بينا.. 

ياترى فعلاً في حاجة اسمها أهل الخطوة؟!

أهل الخطوة.. حقيقة أم خرافة؟

في التراث الشعبي المصري والعربي.. 

فيه كتير من الحكايات عن ناس عاديين لكن عندهم قدرات خارقة، ومشهورين بما يعرف بـ”أهل الخطوة”..

منهم اللي عنده بركة في بيته وملهاش نهاية.. 

ومنهم اللي ممكن يديك نصيحة تخليك تحس إنه مطلع على المستقبل، ومنهم اللي بيحققوا طلبات الناس بطرق غريبة..

أهل الخطوة.. عندهم قدرة غريبة على الانتقال لمسافات طويلة بخطوة واحدة أو في لمح البصر..

ومش مهم يكون في بحر أو جبل بينهم وبين الهدف.. يعني ممكن يكونوا في مكانين في نفس الوقت..

ولسه في ناس مصممة إن القدرات دي عندها علاقة بالله، وإن ربنا بيديها لبعض عباده الصالحين أو الأولياء..

رأي الصوفية

المتصوفة أو الصوفية عندهم إيمان قوي بالقدرات دي..

بيقولوا إن الأقطاب الأربعة، اللي هم: 

• أحمد الرفاعي من الشام.
•  عبد القادر الجيلاني من العراق.
• أحمد البدوي من المغرب.
• وإبراهيم الدسوقي من مصر.

كانوا من أهل الخطوة.. 

وهم مش شايفين إن ده مجرد خرافة، وبيعتبروا الكرامات ظواهر خارقة للعادة بيسمح الله بيها للناس الصالحين..

والأولياء عندهم اعتقاد إن الكرامات دي مظهر من مظاهر نعمة الله، ولازم ما يتفاخروا بيها..

وبعض الفلاسفة المسلمين، زي ابن سينا، اعترفوا بالكرامات، لكن المعتزلة كانوا رافضين الفكرة دي.

في سوريا: قصة سوق ساروجة

في حكاية معروفة في سوريا، كان في ولي من أولياء الله ساكن في حي اسمه سوق ساروجة..

الأم كانت طباخة شاطرة وعارفة إن ابنها بيحب “الكبة اللبنية”، لكنه كان في مكة..

بعتت له رسالة عن طريق التخاطر، وقالت له إنها طبخت له الكبة..الولي رد عليها إنه جاي لها..

وفي لحظات، كان الولي في دمشق، خد نصيبه من الأكلة ورجع لمكة يتناولها مع أصحابه وهي لسه سخنة..

ومن ساعتها، سمي الحي باسم “ساروجة”، اللي معناه إنه “سار وجاء”. ولسه كبار السن في سوريا يصدقوا إنه مشي عبر الزمن بقدرة قادر..

لكن مع دخول القرن العشرين والتكنولوجي.. بدأت الحكايات دي تتراجع، والجيل الجديد مش عارف عنها كتير إلا من حكايات الجدود. واسم الحي بينسب لأحد القادة المماليك اللي عاش في القرن الرابع عشر..

في مصر: قصة الشيخ علي الخواص

الشيخ عبد الوهاب الشعراني ذكر في كتابه “الطبقات الكبرى” عن كرامات شيخه علي الخواص..

كان بيحصل إنه محدش يشوفه وهو بيصلي الظهر في جماعة، لكنه كان يظهر في أماكن بعيدة زي جامع الرملة في فلسطين..

وكان الشعراني يتساءل عن سبب عدم صلاتهم في أوقات معينة، والشيخ علي جاوب إنه فيه أماكن مخصوصة بيسجدوا فيها، زي المسجد الأقصى..

لكن ده بيختلف مع مواقيت الصلاة، لأنه في الوقت اللي بيأذن فيه في مصر، ممكن تكون الصلاة اتعملت في أماكن تانية..

أهل الخطوة في الثقافات الغربية

موضوع “أهل الخطوة” مش غريب برضه في الثقافات الغربية..

هوليوود عملت فيلم بعنوان Jumper في 2008، عن شاب عنده قدرة على الانتقال الذاتي لأي مكان بسرع..

 الفيلم بيستعرض الصراع بين “أهل الخطوة” وبين ناس تانية عاوزة تقضي عليهم..

 القصة مبنية على رواية خيال علمي بنفس الاسم..

القصص عن أهل الخطوة موجودة في التراث الشعبي وتعتبر جزء من الهوية الثقافية..

سواء كانت حقيقة أو خرافة، فبتعكس الإيمان بالأشياء الخارقة وبتضيف لمسة من الغموض للشعب العربي..

تفتكر بقى ايه حقيقة أهل الخطوة وشايف انهم كانوا موجودين فعلًا ولا دي مجرد أسطورة؟ 

السحر موجود من قديم الأزل.. وله تاريخ طويل في الأذي.. 

بدأ من عند الفراعنة اللي كانوا بيكتبوا طلاسم وتعاويذ على جدران المقابر عشان اللي يحاول يقرب منه تصيبه اللعنة أي “السحر”.. 

والمصريين معروفين بالسحر من زمان بردو.. ودا مذكور في القرءان.. 

قصة فرعون مع سيدنا موسى..

﴿قَالُوا يَا مُوسَىٰ إِمَّا أَن تُلْقِيَ وَإِمَّا أَن نَّكُونَ نَحْنُ الْمُلْقِينَ،

 قَالَ أَلْقُوا ۖ فَلَمَّا أَلْقَوْا سَحَرُوا أَعْيُنَ النَّاسِ وَاسْتَرْهَبُوهُمْ وَجَاءُوا بِسِحْرٍ عَظِيمٍ﴾.

بلاد السحر

بس مش بس المصريين اللي كان ليهم في السحر.. كمان البابليين كانوا معروفين بالسحر .. لدرجة انهم كانوا بيقتلوا بعض عن بعد.. 

(وَمَا كَفَرَ سُلَيْمَانُ وَلَٰكِنَّ الشَّيَاطِينَ كَفَرُوا يُعَلِّمُونَ النَّاسَ السِّحْرَ وَمَا أُنزِلَ عَلَى الْمَلَكَيْنِ بِبَابِلَ هَارُوتَ وَمَارُوتَ ۚ ).

و لو دخلنا على الديانات هنلاقي ان “ديانة السحر” هي الديانة اليهودية.. لأن رسولهم “سيدنا موسى” اللي انتصر على سحرة فرعون بسحره.. 

على الرغم من ان التوراة نفسها حرمت السحر..

ومع ذلك السحر كان منتشر جدًا بين بني اسرائيل لدرجة انهم كانوا بيقولوا على سيدنا سليمان انه ساحر عشان كان بيكلم الجن والحيوانات..

ولحد دلوقتي اليهود منفردين بأخطر سحر على الاطلاق.. “سحر الكابالا”.. 

اللي بيقول ان كل كلمة واية في التوراة ليها تأثير خفي محدش يعرفه غير السحرة المتخصصين.. 

ولما اتنقل اليهود في العصر الروماني لشمال أفريقيا.. 

علموا بلاد المغرب كل خبراتهم في السحر.. لحد ما التلميذ تفوق على استاذه.. 

وبقت المغرب و السحر المغربي أكبر وأقوى أنواع السحر في العالم كله.. 

و بيتمارس فيها جميع أنواع السحر على الأرض.. وعندهم “سياحة السحر”..

أنواع السحر ..

• السحر المجازي: زي بالظبط ساحر السيرك.. يعني سحر خفة اليد .. ودا السحر اللي بيستخدمه الدجالين.
• سحر التخييل : ودا سحر العيون.. اللي استخدمه سحرة فرعون لما رموا العصاية واتحولت لتعبان وهي في الحقيقة ماتحولتش.. دول سحروا أعين الناس..

 ودا السحر اللي هيستخدمه المسيخ الدجال لما هيخليك تشوف النار والمايه وتختار العكس..انما الحقيقة انه ناره ماية ومايته نار.

• السحر الأسود : 

1. السحر الترابي: الساحر اتر من المسحور وبيعمل العمل عليه ويدفنه في التراب.
2. السحر الهوائي: الساحر بيعلق العمل في شجرة و بيسيب العمل يشتغل حسب قوة الهوا. 
3. السحر الناري: الساحر بيعمل العمل على خشب أو فخار ويرميهم في النار لحد ما يبقى رماد ويطيروا في الجو.
4. السحر المائي : الساحر بيرمي العمل في النهر أو البحر وبيشتغل على حسب قوة التيار المائي. 
5. سحر الرصد: الساحر بيربط العمل بنجم أو كوكب وكل ما النجم يتحرك العمل بيشتغل.. يعني العمل شغال 24 ساعة.

• سحر الرش.
• سحر العتبات. 

وهنروح بعيد ليه ؟ ما الرسول بذات نفسه اتسحر.. 

قصة سحر الرسول ﷺ

مرض رسول الله ﷺ مرضا شديدا، فأتاه مَلَكان، فقعد أحدهما عند رأسه والآخر عند رجليه، فقال الذي عند رجليه للذي عند رأسه: ما ترى؟ قال: طُبَّ، قال: وما طُبَّ؟ قال: سُحِرَ، قال: ومَنْ سَحَره؟ قال: لَبيد بن الأعصم اليهودي، قال: أين هو؟ قال: في بئر آل فلان تحت صخرة في رَكِيَّة، فَأْتوا الرَّكِيَّة، فانزحوا ماءها، وارفعوا الصخرة، ثم خذوا الكُدْية وأحرقوها، فلما أصبح رسول الله ﷺ بعث عمار بن ياسر في نفر، فَأَتوا الرَّكِيَّةَ، فإذا ماؤها مثل ماء الحناء، فنزحوا الماء، ثم رفعوا الصخرة، وأخرجوا الكُدْيَةَ، وأحرقوها، فإذا فيها وتر فيه إحدى عشرة عقدة، وأُنزلت عليه هاتان السورتان، فَجَعل كلما قرأ آية انحلت عقدة: {قُلْ أَعُوذُ بِرَبِّ الْفَلَقِ} و{قُلْ أَعُوذُ بِرَبِّ النَّاسِ}. 

و خلونا نختم بكلام سيدنا محمد ﷺ ..

يا غلام.. إني أعلمك كلمات: احفظ الله يحفظك، احفظ الله تجده تجاهك، إذا سألت فاسأل الله، وإذا استعنت فاستعن بالله، واعلم: أن الأمة لو اجتمعت على أن ينفعوك بشيء لم ينفعوك إلا بشيء قد كتبه الله لك، وإن اجتمعوا على أن يضروك بشيء لم يضروك إلا بشيء قد كتبه الله عليك..

رفعت الأقلام وجفت الصحف..

في خريف 2024.. 

ظهر إعصار ميلتون في المحيط الأطلسي وده خلّى الناس في قلق كبير..

الإعصار ده كان من أقوى العواصف اللي شوفناها في الفترة الأخيرة، وجاب معاه رياح عنيفة وأمطار غزيرة..

 و تسببت في أضرار كبيرة جدًا في بعض المناطق..

وصل إعصار ميلتون لليابسة في ولاية فلوريدا الأمريكية بقوة تصنف “الخطر للغاية” من الفئة الثالثة على مقياس الأعاصير اللي بيتكون من خمس فئات تصاعدية..

الإعصار يضرب.. 

الإعصار بيضرب الولاية مع عاصفة مدمرة ورياح شديدة، وممكن يتسبب في فيضانات هائلة، حسب المركز الأمريكي للأعاصير..

وقال المركز في نشرة أصدرها بعد منتصف ليلة الخميس إن 

“البيانات تشير إلى أن عين الإعصار ميلتون وصلت لليابسة قريب من سييستا كي في مقاطعة ساراسوتا على الساحل الغربي لفلوريدا”.

العلماء قدروا يلقطوا صور مذهلة للإعصار من الفضاء وهو ماشي نحو فلوريدا..

رائد الفضاء “ماثيو دومينيك” من ناسا نشر فيديو من على متن المركبة الفضائية Dragon Endeavour، يوضح الحجم الكبير للإعصار..

وكمان.. طاقم من راصدي الأعاصير راحوا لمركز إعصار ميلتون، متحدين الرياح اللي سرعتها 160 ميلاً في الساعة (270 كيلومتر في الساعة) لجمع البيانات لصالح المركز الأمريكي..

وكان عضو الكونغرس عن وسط فلوريدا ماكسويل أليخاندرو فروست من بين أفراد الطاقم على متن طائرة “Miss Piggy” اللي اتوجهت لمركز الإعصار..

 و فيديو الرحلة اللي استغرقت ثماني ساعات أظهر اضطرابات جوية “شديدة للغاية”..

ونشرت شركة سن الإعلامية، اللي مقرها في لندن، صور لإعصار ميلتون وهو بيتحرك عبر خليج المكسيك.. 

اللقطات دي اتصورت باستخدام كاميرات سن بدقة 4K على محطة الفضاء الدولية..

 الصور بتظهر قوة الإعصار وتأثيره الضخم، وكمان بتعكس التكنولوجيا المتقدمة اللي بتساعدنا نتابع الأحداث الطبيعية بشكل دقيق من الفضاء..

وحذر المركز الأمريكي من أمواج مدّ وجزر متوقعة هتغمر ساحل الخليج في غرب فلوريدا، وعبر عن مخاوفه من حدوث دمار كبير واحتمال سقوط قتلى.

ومن المتوقع إن الإعصار ميلتون هيضرب المناطق الداخلية في طريقه للمحيط الأطلسي.

اعصار هيلين 

الإعصار ميلتون جاي بعد أسبوعين بس من الإعصار المدمر هيلين اللي ضرب فلوريدا وولايات تانية في جنوب شرق الولايات المتحدة.. وخلّف وراه دمار كبير وخسائر بشرية..

لحظات مرعبة بيمر بيها سكان ولاية فلوريدا في الولايات المتحدة الأمريكية، من أيام قليلة بعد ما ضرب إعصار ميلتون الولاية، وتسبب في أضرار كبيرة، وكمان نزوح ملايين من السكان..

ورغم أمنيات الناس بانتهاء الإعصار المدمر.. و فيه تخوفات من احتمال استمرار الوضع بالشكل ده.. 

عاصفة نادين في أمريكا

التقلبات الجوية اللي بتضرب فلوريدا دلوقتى ملهاش مثيل خلال الأعوام السابقة.. 

ووفقًا لموقع “daily mail”.. 

المسؤولين في المركز الوطني الأمريكي للأعاصير كشفوا عن احتمال وجود عاصفة قوية هتضرب فلوريدا خلال الساعات الجاية..

واللي هتزيد المعاناة بشكل أكبر على سكان الولاية، حيث إن “نادين” مسببة قلق كبير للجميع..

تعتبر “نادين” عاصفة استوائية في الساحل الشرقي لولاية فلوريدا..

وبتتوقع إنها تتحول لعاصفة مدارية في فترة قصيرة مع نهاية يوم الأربعاء..

المنطقة اللي مش استوائية عندها ضغط منخفض، وبتنتج دلوقتي رياح بسرعة 15 ميل في الساعة..

فيه احتمال بنسبة 20% إنها تتحول لعاصفة قوية جدًا خلال الساعات الجاية، واللي ممكن تزيد من خطورة إعصار ميلتون على السكان، لكن من المتوقع إنها تكون أقل ضررًا..

ده بسبب زيادة قوة الرياح ليلة الأربعاء، وده بيدي بريق أمل في توقف تطور الإعصار، والحد من قوة العاصفة بداية من يوم الخميس..

العاصفة رقم 14

العلماء والباحثين متمنين إن “نادين” متتحولش لعاصفة مدارية.. 

لإن ده هيزود قوة الرياح على ولاية فلوريدا..

 ولما تضرب العاصفة “نادين” الولاية، هتكون العاصفة رقم 14 خلال موسم الأعاصير..

اللي بدأ في 1 يونيو ومن المفترض يستمر لحد 30 نوفمبر.. حسب ما ذكر في موقع “USA Today”.

في النهاية، إعصار ميلتون بيكون علامة قوية لقدرة ربنا سبحانه وتعالى على التحكم في كل شيء..  

وعلى الرغم من التقدم اللي حصل في العلم، تفضل الأحداث دي بتذكرنا بمدى ضعف الإنسان أمام قدرة ربنا .. 

تفتكر نهاية الاعصار دي هتبقى ايه؟ وهل هنخسر أكتر من اللي خسرناه!!

في مصر..

السيد أحمد البدوي له إسمه ومحبينه.. وتحديدًا الطنطاوية.. 

ناس كتير مقتنعة أنه ولي من أولياء الله الصالحين.. 

وراجل ليه كرامات و قدر انه يعمل المعجزات.. 

وبيروحوا يزوروه وياخدوا بركاته في ضريحه في مسجد الأحمدي في طنطا.. 

وناس تانية على العكس بقى تمامًا.. متعرفش مين السيد البدوي دا أساسًا..

طب يا ترى ايه هي قصة اسطورة السيد البدوي؟ 

أصل السيد البدوي

أحمد بن علي بن يحيى البدوي الحسيني الفاسي (فاس 596 هـ/1199 م – طنطا 675 هـ/1276 م)..

 كان إمام صوفي سني عربي، ويعتبر ثالث أقطاب الولاية الأربعة عند المتصوفين..

 الطريقة البدوية، اللي بترتبط بيه، معروفة برايتها الحمراء..

 لقّب بالبدوي عشان كان دايمًا يغطّي وشه باللثام زي أهل البادية، وله كذا لقب، من أشهرهم شيخ العرب والسطوحي..

نسبه من جهة أبوّه بيرجع للحسين بن علي بن أبي طالب. اتولد البدوي في مدينة فاس المغربية.

في سنة 603 هـ/1206 م، لما كان عند أحمد البدوي سبع سنين..

 هاجرت أسرته من فاس لمكة في رحلة أخدت حوالي أربع سنين..

مروا بمصر في طريقهم وقعدوا فيها حوالي ثلاث سنين.

في بعض القصص الصوفية.. بيقولوا إن علي والد البدوي شاف في المنام صوت بيقوله: “يا علي، ارحل من البلاد دي لمكة، لأن لنا هناك شأناً.”

وبحسب المصادر الصوفية..

 البدوي بدأ يعبد الله من صغره وكان بيروح مغارة في جبل أبي قبيس قريب من مكة عشان يتعبد لوحده..

هجرته إلى العراق

 فضل كده لحد ما بقى عنده 38 سنة.. وبعدها قرر يسافر للعراق مع أخوه حسن سنة 634 هـ/1227 م.. طاف البدوي شمال العراق وجنوبه..

فيه شوية آراء عن سبب ترك البدوي مكة ورحيله للعراق.. الإمام الأكبر عبد الحليم محمود، شيخ الأزهر السابق، أكد إنه ما تصرفش لوحده زي بعض الأولياء، وأنه شاف رؤية بتقول له يروح العراق..

وناس تانية قالوا إن أحمد البدوي حس إن مكة، رغم مكانتها الكبيرة.. مش كفاية لطموحاته وآماله.. 

ففكر في الهجرة لمكان فيه إمكانيات أكبر.. وراح للعراق خصوصاً إن فيها عدد من الأولياء الصوفيين.. زي أحمد الرفاعي وعبد القادر الجيلاني..

تغير حال البدوي.. 

بعد ما قضى البدوي سنة في العراق.. رجع مكة سنة 635 هـ/1238 م..

المتصوفة بيقولوا إنه تغير جداً في سلوكه وعبادته بعد ما رجع.. بقى يكثر من الصلاة والصيام بشكل مش معتاد عليه.. وبقى طويل الصمت وبيطول النظر للسماء، و مكانش بيتكلم مع الناس إلا بالإشارات ويفضل ساكت..

أخته فاطمة بدأت تقلق عليه، وكانت تنبه أخوها حسن من نومه في الليل تشكو له من حالته..

في واحدة من الروايات، بتقول له: “ابن والدي، إن أخي أحمد قائم طول الليل، وهو شاخص ببصره إلى السماء ونهاره صائم، و انقلب سواد عينيه بحمرة تتوقد كالجمر، وله مدة أربعين يوماً ما أكل طعاماً ولا شراباً.”

الهجرة إلى مصر..

في نفس السنة اللي رجع فيها مكة، قرر البدوي يسافر لمصر، وبالتحديد “طندتا”، اللي هي طنطا دلوقتي..

وناس من الصوفية، زي عبد الوهاب الشعراني، قالوا إنه ما رجعش مكة، لكنه سافر مصر على طول بسبب حلم شافه، اللي قال له: “قم يا هُمام وسر إلى طندتا”..

والمناوي اتفق معاه بس قال إن الحلم قال له: “قُم (ثلاثاُ) وأطلب مطلع الشمس، فإذا وصلته فأطلب مغربها، وسر إلى طندتا فيها مقامك أيها الفتى”..

وذكر المناوي كمان إنه لما وصل مصر.. الظاهر بيبرس استقبله مع جيشه وكرّمه، وكان ده سنة 634 هـ..

 وده مش صحيح لأن الظاهر بيبرس ما تولى حكم مصر إلا سنة 668 هـ، وكان وقتها الملك الكامل محمد بن العادل هو اللي يحكم..

واختلفت الآراء بسبب هجرة البدوي لمصر واستقراره في طنطا..

اتقال إنه كان عنده فكرة عن موقع طنطا اللي في نص بين القاهرة والإسكندرية في دلتا النيل..

 فاستقر فيها عشان ينشر طريقته بسهولة..

 وحسب المصادر الصوفية، لما استقر البدوي في طنطا، أقام عند تاجر اسمه “ابن شحيط” أو “ركن الدين”، وكان ساكن فوق سطح داره..

ناس قالوا إنه فضل يسكن فوق السطح عشان يحب يكون وسط الطبيعة ويشوف آيات الله في السماء والأرض بسهولة..

واتقال كمان إنه كان حيّي، وما حبش يعيش جوه الدار عشان ما يحرجش صاحب الدار وأسرته..

 وكمان ممكن يكون تأثر بأهل العراق، لأنه عاش بينهم سنة، وكانوا زمان يفضلوا النوم فوق أسطح بيوتهم بسبب الحر في الصيف..

 حسب المصادر الصوفية، البدوي عاش فوق السطح حوالي اثنتي عشرة سنة، وكان يقعد أكتر من أربعين يوم من غير ما يأكل أو يشرب أو ينام.. ومن هنا جاله اللقب “السطوحي”.

كرامات السيد البدوي.. 

امتلأت كتب الصوفية بكرامات كتير منسوبة لأحمد البدوي، و بيشوف بعض الصوفية زي الإمام عبد الحليم محمود إن أكبر كرامة للبدوي هي إنه ربّى رجال وبنى أبطال مجاهدين..

في محافظة الغربية، بيظهر مئذنة وقبة مسجد أحمد البدوي داخل الترس..

ومن أشهر الكرامات المنسوبة له إنه كان ينقذ الأسرى المسلمين من إيد الصليبيين في أيام الحملات الصليبية على مصر، وكان فيه اعتقاد شائع إن البدوي كان بيستمر ينقذ الأسرى حتى بعد مماته..

وعلى النقيض تمامًا.. 

بردو في ناس بتنتقد كرامات البدوي، لأن معظمها اتسجل في الفترات الأخيرة من العصر العثماني..

 اللي كان معروف فيه بالجمود والتأخر وانتشار الجهل..

وقتها، بقى التصوف وسيلة لكسب العيش.. لأن أسهل الطرق هي استغلال جهل الناس والتلاعب بعقولهم ومشاعرهم..

في النهاية وعلى الأغلب أحمد البدوي كان راجل صالح و مجذوب لحب الله لأنه كان راجل سُني..

بس أتباعه هما اللي نسجوا حواليه قصص وأساطير هو نفسه مالوش دعوة بيها.. والله أعلم.. 

و خلونا نختم الحكاية بكلام الشيخ أحمد رزوق في كتابه “قواعد التصوف” لما قال: 

“كل شيخ لم يظهر بالسنة فلا يصح اتباعه لعدم تحقق حالته.. وإن صح في نفسه وظهر عليه ألف ألف كرامة من أمره.. “

يعني الخلاصة احنا مالناش غير كتاب الله وسنة رسوله.. عليه أفضل الصلاة والسلام..

انت بقى شايف ان السيد البدوي دا راجل فعلًا عنده كرامات ولا مجرد راجل متدين متصوف و خلاص؟ 

مغامرة تحت البحر 

في قلب المحيط الأطلسي.. وفي عمق الماء اللي مليان أسرار وغموض..

وبالتحديد يوم 18 يونيو 2023..

حصلت كارثة لا كانت علي البال ولا علي الخاطر.. 

الغواصة “تيتان”.. اللي استحوذت على أنظار العالم كله.. 

الغواصة، اللي كانت في رحلة لاستكشاف حطام سفينة “تيتانيك” الأسطورية..

الناس كانت متحمسة تشوف الحطام التاريخي، لكن في لحظة واحدة..

كل شيء اتقلب لما انقطع الاتصال بالغواصة، وابتدت رحلة البحث عن الأمل وسط أعماق البحر..

تفاصيل الرحلة.. 

الرحلة كانت في المياه الدولية شمال المحيط الأطلسي قدام سواحل نيوفاوندلاند، كندا..

الغواصة كانت في رحلة سياحية علشان يشوفوا حطام سفينة “آر إم إس تيتانيك” وكان على متنها خمسة أشخاص..

وفجأة الاتصال انقطع.. 

ودا بعد حوالي ساعة و 45 دقيقة من بداية الغطس لموقع الحطام..

وأبلغت السلطات لما الغواصة مطلعتش في الوقت المحدد..

فرق دولية بقيادة خفر السواحل الأمريكي والبحرية الأمريكية وخفر السواحل الكندي بدأوا عمليات بحث وإنقاذ..

وكمان شاركت طيارات من سلاح الجو الكندي والحرس الوطني الجوي الأمريكي..

 وسفينة من البحرية الكندية الملكية وسفن تجارية وبحثية ومركبات بتحكم عن بُعد في البحث..

بعد حوالي 80 ساعة من البحث..

لقت مركبة بتحكم عن بعد حطام الغواصة في قاع البحر جنب موقع تيتانيك..

واتضح إن الغواصة انفجرت بعد فترة بسيطة من بداية الغطس، وده أدى لوفاة كل الركاب فوراً..

تاريخ شركة “أوشن غيت”

شركة “أوشن غيت” دي شركة خاصة أسسها ستوكتون راش وسونلاين غيليرمو سنة 2009..

ومن سنة 2010، بدأت تنقل عملاء بيدفعوا رسوم للرحلات دي في غواصات تجارية قبالة سواحل كاليفورنيا، وخليج المكسيك، والمحيط الأطلسي..

ستوكتون راش شاف إن زيارات مواقع حطام السفن هتجذب انتباه الإعلام..

وفي 2016، الشركة بدأت تنقل عملاء لأول مرة لموقع حطام باستخدام الغواصة سايكلوبس 1، وراحوا يشوفوا حطام سفينة “إس إس أندريا دوريا”..

في 2019، راش قال في مقابلة مع مجلة “سميثسونيان”: “فيه حطام واحد بس الناس كلها عارفاه، لو طلبت من حد يسمي حاجة تحت المية، هيقولوا أسماك القرش، الحيتان، وتيتانيك.”

نرجع بالزمن لورا..

كانت السفينة “آر إم إس تيتانيك” سفينة بريطانية عابرة للمحيطات وغرقت شمال المحيط الأطلسي يوم 15 أبريل 1912 بعد ما اصطدمت بجبل جليدي..

 وفي 1985 اكتشفوا الحطام بتاعها على عمق حوالي 3,810 متر (يعني حوالي 12,500 قدم) وعلى بعد حوالي 400 ميل بحري من ساحل نيوفاوندلاند..

أما الغواصة “تيتان”، فهي غواصة بتستوعب خمسة أفراد وتديرها شركة “أوشن غيت”..

 اتصممت علشان تقدر تغوص لعمق يصل لغاية 4,000 متر (حوالي 13,000 قدم) بغرض استكشاف المواقع، وجمع البيانات، وإنتاج الأفلام، وتجربة الأجهزة والبرامج المخصصة لأعماق البحار..

الاتنين مرتبطين برحلات خطيرة إلى أعماق المحيط..

والاتنين بردو انتهوا بكارثة مأساوية..

تيتانيك غرقت في شمال المحيط الأطلسي في 1912 بعد ما اصطدمت بجبل جليدي..

وكان هدف غواصة “تيتان” في رحلتها هو الوصول إلى حطام تيتانيك لاستكشافه، لكنها واجهت انفجار مفاجئ أدى إلى وفاة الركاب الخمسة اللي كانوا على متنها..

يعني باختصار ، القدر جمعهم في نفس المكان تقريبًا تحت المحيط، وأدى مصيرهم المشترك إلى خسارة الأرواح في ظروف صعبة ومؤلمة..

القصة بتتكرر

في الوقت الحالي.. 

ملياردير من أوهايو اسمه لاري كونور بيخطط لرحلة جديدة لحطام تيتانيك بغواصة جديدة هتنزل لأعماق البحر..

كونور، زي ضحية غواصة تيتان هايميش هاردينغ، يعتبر عضو في مجتمع المستكشفين الأغنياء، وسبق له إنه راح لأعماق المحيط ووصل لمستويات مرتفعة في الفضاء..

لكن كونور بيأكد إن اللي حصل مع تيتان يوم 18 يونيو 2023.. واللي أدى لانفجارها ووفاة كل الركاب الخمسة في طريقهم لحطام تيتانيك، كان حالة شاذة..

 وقال لصحيفة وول ستريت جورنال و صحيفة نيويورك تايمز إن رحلته الجديدة هتكون رجوع لأساليب معروفة وموثوقة لاستكشاف أعماق البحر..

في تصريح لصحيفة التايمز الأسبوع ده، كونور قال:

 “أنا قلق إن الناس يربطوا بين الغواصات، خاصة الجديدة أو المختلفة، وبين الخطر أو المآسي..

لو مش قادرين نعمل المهمة دي، فإحنا مش ناس بتدور على الإثارة أو المخاطرة الكبيرة.”

و”إحنا” هنا بترجع  باتريك لاهي، الشريك المؤسس لشركة غواصات ترايتون، اللي كونور طلب منه تصميم غواصة جديدة بهيكل أكريليك مخصوص للرحلة..

 التقديرات بتقول إن تكلفة المركبة هتكون بعشرات الملايين من الدولارات، ومش هتكون جاهزة قبل صيف 2026..

شركة غواصات ترايتون معروفة في المجال ده، وقدرت توصل بأحد غواصاتها لعمق 10 آلاف متر، أما حطام تيتانيك بيقع على عمق حوالي 3800 متر..

تفتكر بقى ان حادثة الغواصة دي قضاء وقدر ولا اللي حصل دا مترتب له كويس أوي؟؟ 

رسولنا الكريم قال.. ان ربنا بيبعت كل 100 سنة عالم دين يجدد للمسلمين دينهم ..

زي عمر بن عبد العزيز، الامام الشافعي، الامام البخاري، وبطل الحكاية النهاردة ..

الشيخ محمد متولي الشعراوي

ازاي الشعراوي قد يوصل للمجد والعظمة دي ؟

البداية كانت في.. 15 أبريل 1911 لما اتولد محمد متولي الشعراوي.. 

في قرية دقدوس بمركز ميت غمر في الدقهلية.. من أسرة بسيطة.. 

وفي يوم ولادته خاله شاف رؤيا ان في كتكوت واقف على المنبر وبيخطب.. 

ومن اليوم دا أصر متولي الشعراوي انه محمد لازم يحقق الرؤيا دي..

وفعلاً محمد كان من أذكى الطلاب في الكُتاب.. وعلى سن 11 سنة قدر أنه يحفظ القرآن كله.. 

وعلى سن 19 سنة اتجوز محمد ودخل المرحلة الثانوية في معهد الأزهر..

ولأنه كان ثورجي و بيقود مظاهرات ضد الاحتلال.. ففي سنة 1934 الشعراوي كتب قصيدة اعتبروها إهانة للذات الملكية واتفصل من المعهد.. 

بس قدر يرجع تاني و يكمل المرحلة الثانوية..

وبعد مناوشات مع أبوه.. دخل محمد كلية اللغة العربية جامعة الأزهر..

واتخرج الشعراوي سنة 1941.. 

بداية الشعراوي

اتقدم في مسابقة التعيين وطلع الأول.. واتعين مدرس بمعهد طنطا الأزهري..

وسنة 1950 اتعرض عليه يسافر يشتغل في كلية الشريعة في مكة.. وبالفعل سافر واشتغل..

لحد ما حصل خلاف كبير جدا بين عبد الناصر والملك فيصل.. وطبعًا رجعت بعثة الأزهر والشعراوي معاها.. 

ولما رجع عينوه مدير لمكتب شيخ الأزهر ” الشيخ حسن مأمون”.. اللي بعدها أُقيل بأمر من عبد الناصر.. 

وفي نفس السنة دي طلعت بعثة من الأزهر لتعريب الجزائر.. وكان الشعراوي رئيس البعثة وقعد هناك 7 سنين.. 

بعد نكسة 67

سنة 1970 عبد الناصر عين الشعراوي أمين الفكر في الحزب الاشتراكي..

 ودا كان خبر صعب جدًا على الشعراوي عشان كان ضد الاشتراكيين بشكل عام..

وقعد الشعراوي يدعي ربنا يخلصه من المأزق ده.. 

وطبعًا ده عشان مفيش حد كان يقدر يناقش عبدالناصر في قرار..

وسبحان الله.. مات عبد الناصر قبل ما يقابل الشعراوي ويسلمه المنصب بكام يوم.. 

عهد جديد

أول ما اتولى السادات الحكم..

أمر الشعراوي انه يطلع من الجزائر على السعودية عشان يصلح العلاقات اللي باظت في عهد جمال عبد الناصر..

وبالفعل الشعراوي كان له ثقله في السعودية.. 

عشان كدا رجع العلاقات بمنتهى السهولة و رجعت بعثة الأزهر لمكة من تاني ..

وفي سنة 1973..

كان أول ظهور الشعراوي على التليفزيون في برنامج نور على نور..

وقال إنه تفسيره للقرآن هي مجرد خواطر بتيجى على قلب مؤمن.. 

وبعد اللقاء ده ازدادت شعبية الشعراوي والناس حبته جدًا.. 

وطبعًا شجعه جدًا الرئيس المتدين أنور السادات.. 

وبعدها اتعمل للشعراوي اشهر برنامج تفسير في العالم الإسلامي كله..

برنامج “خواطر إيمانية” وكان بيجي كل جمعة بعد الصلاة.. 

سنة 1976.. 

منح السادات الشيخ الشعراوي وسام الاستحقاق من الطبقة الأولى بمناسبة وصوله لسن الــ 60 عام.. 

وفي نفس السنة اتعين وزير الأوقاف..

لكن الشعراوي مارتحش نهائي للمنصب..

و قال ان دي كانت أسوأ تجربة في حياته كلها.. 

لأنه لقى نفسه بيحارب في جبهات كتير..

ومشوه في أول تعديل وزاري سنة 1978..

سنة 1980.. اتعين الشعراوي عضو في مجلس الشورى ورفض كل المناصب اللي اتعرضت عليه.. 

واتفرغ للدعوة والتفسير

ولأنه كان عنده ملكة قوية في تفسير القرآن.. استحق لقب “أمير الدعاة”.. 

عهد مبارك

وفي سنة 1981..

بعد قتل السادات.. تولى مبارك الحكم ..

والعلاقة بين مبارك والشعراوي كانت كويسة جدًا ومافيهاش مشاكل.. 

ودا بان بعد رجوع مبارك من محاولة اغتيال في إثيوبيا سنة 1995.. 

قال الشعراوي وقتها جملته الشهيرة.. 

“أنا أقف على أعتاب نهايتي.. فلن أختمها بنفاق..
إذا كنت قدرنا فليوفقك الله.. وإذا كنا قدرك فلعينك الله على أن تتحمل.” 

وفي يوم 17 يونيو 1998.. توفي الشيخ الشعراوي عن عمر يناهز 87 سنة.. 

مالحقش يفسر القران كامل ووقف عند “سورة الصف”..

بس ألف أكتر من 60 كتاب.. فتاوى وتفسير و خواطر.. 

وساب تسجيلات من أعظم ما قيل في العصر الحديث.. 

ومشي في جنازته أكتر من مليون شخص.. وادفن في قبره في قرية دقدوس.. 

انت بقى شايف ان تفسير الشعراوي للقرآن كان مجرد خواطر؟

من زمان..

الإنسان كان يعرف القرابين في ثقافات كتير حول العالم..

و في مصر، القرابين ليها تاريخ طويل، سواء في الديانات القديمة أو الحديثة..

و عرف إنه لازم يقدم حاجات غالية علشان يرضي الإله..

وكان كمان بيجهز الميت للعالم التاني..

من ضمن الحاجات اللي كانت بتتقدم القرابين الحيوانية.. سواء للميت أو لقوى أعلى..

وكان الهدف منها خصوبة الأنواع الحيوانية..

وكمان كان فيه قرابين بشرية قبل التاريخ، وغالباً كانت من النساء والأطفال..

تنوعت القرابين عبر تاريخ الإنسان باختلاف الحضارات والثقافات الدينية المنتشرة في كل مكان.. 

هي مش بس مجرد تقديم أشياء مادية، لكن كمان تعبير عن الشكر والامتنان أو حتى طلب الحماية والبركة..

بداية تطور فكرة القرابين..

من أول الأحداث اللي حصلت في العالم، حسب الرواية الدينية، كان فيه هابيل وقابيل، اللي قدموا أول قربان معروف..

هابيل كان عنده أغنام وقدم قربان من ماشية سمينة، أما قابيل فكان مزارع، وقدم حزمة من الزرع الرديء واحتفظ بالزرع الجيد لنفسه..

فأنزل الله نار فأكلت قربان هابيل كعلامة على قبوله، وفضل قربان قابيل كما هو، وبسبب كده، قابيل قتل أخوه هابيل..

الحضارات القديمة زي السومرية والبابلية والفينيقية واليونانية والرومانية وحتى المصرية القديمة، كانت تعرف القرابين..

كانوا بيقدموها لأسباب مختلفة، زي إرضاء الآلهة لتجنب غضبها، أو الوفاء بالنذور، أو الشكر على النعم، أو طلب الغفران، أو لمباركة الماشية والمزروعات والعائلة..

وتنوعت القرابين بين النباتية والحيوانية وأحيانًا بشرية..

القرابين البشرية

ويل ديورانت في كتابه “قصة الحضارة” قال إن الإنسان القديم في أوقات الحاجة وشح الطعام لجأ لأكل أخوه الإنسان واعتبر لحم البشر من أطايب الطعام..

الفكرة دي استمرت مع القبائل اللي بتاكل لحوم البشر..

بما إن القرابين كانت في أبسط أشكالها طعام للآلهة، فكانوا شايفين إن أفضل حاجة يقدموها للإله هي الإنسان نفسه، اللي يعتبر أعلى مرتبة في الأضاحي..

ولأن الطقوس الدينية بتستمر لسنين طويلة حتى بعد ما تتغير العادات، فضل مفهوم الأضحية البشرية مرتبط بالأضحية الحيوانية رغم إن البشر كفوا عن أكل بعضهم..

القرابين الحيوانية

كانت القرابين الحيوانية بتتقدم للآلهة، إما بحرقها بالكامل.. وده اللي اتسمى في اليونانية القديمة (الحرق الكامل)..

أو بحرق جزء منها مع الاحتفاظ أو التبرع بجزء من الأضحية..

حسب الباحث رضا الأبيض، القرابين الحيوانية كانت أكثر الأنواع شيوعاً، وأهم الحيوانات اللي كان الإنسان بيقرب بها للإله كانت الخراف.

و كانت القرابين الحيوانية هي الطريقة الوحيدة لنجاتهم من الموت..

لكن بعد كده توسع المفهوم، وبقى كل عمل يحتاج لقربان، سواء ولادة مولود أو الشفاء من مرض أو حتى الوفاء للآلهة، وحتى الموت كان ليه قربان..

القرابين النباتية

في العصور القديمة، كان الإنسان يعتقد إن الآلهة هي اللي تمتلك الأرض والحقول.. ولما يقدّموا لها قرابين نباتية، كانوا بيؤدوا واجب ديني..

في بلاد ما بين النهرين، كان الساميون بيقدّموا أنواع مختلفة من الأطعمة زي الخضروات والفواكه. والعرب كمان كانوا يقدموا قرابين نباتية لألهتهم..

 وكانت تتمثل في بواكير المحاصيل والنخيل.

وبحسب نفس الدراسة، كان بعض العرب، خصوصاً أهل المدر والحرث، لما يحرثوا الأرض أو يغرسوا غرس، يخطوا خط في النص ويقولوا إن الجزء اللي تحت الخط للآلهة..

التماثيل أو الدمى

مع مرور الوقت.. بدأ الناس يستغنوا عن تقديم القرابين، وصارت الدمى بديلة عن القرابين البشرية والحيوانية. السومريون والساميون في بلاد ما بين النهرين عرفوا الظاهرة دي، المعروفة بظاهرة البدل.. فمثلاً تموز الإله، كان بديل عن صعود الخصب بعد موته، شرط إنه يتم إرسال تموز ليمثلها..

 العرب كمان كانوا يستخدموا التماثيل كقرابين، وإذا كان القربان بشري كان التمثال بشكل إنسان، وإذا حيواني كان بشكل حيوان..

عودة نوستا الأميرة ..

تم إعادة مومياء عمرها 500 سنة لفتاة إنكا إلى بوليفيا بعد حوالي 129 سنة من ما تبرعت بيها لمتحف جامعة ولاية ميشيجان. وذكر مسئول إنها المرة الأولى اللي تتعاد فيها بقايا بشرية ذات أهمية أثرية لجبال الأنديز.

المومياء المعروفة باسم “نوستا”، اللي معناها “الأميرة” بلغة الكيشوا، أذهلت الكثيرين بسبب حالتها الممتازة، حيث جدائلها السوداء لسه محافظة على رونقها، حسبما قالت صحيفة ديلي ميل البريطانية.

الخبراء بيقولوا إن المومياء جات من منطقة في مرتفعات الأنديز قرب لاباز خلال السنوات الأخيرة من حضارة الإنكا.

 القرابين ليها مكانة كبيرة في ثقافاتنا وعاداتنا..

 هي مش بس طقوس، لكن كمان رمز للتواصل مع الروحانيات والمعتقدات..

كل واحد بيقدم قرابين حسب إيمانه ورؤيته..

عشان فالنهاية الأمر كله بيرجع لإيماننا وحبنا للمشاركة والعطاء..

انت بقى قولنا ايه فكرتك عن موضوع القرابين دا.. وهل متفق معاه دينيًا واجتماعيًا ولا لأ؟

“ابن القدر” كما لقب نفسه.. عبد الحليم حافظ..

عاش حياة كلها صعوبات ومآسي ولكن ما غناش غير كل الأغاني اللي بتعبر عن الدفا والحب والحنين..

ودا كان بالنسبة للناس غريب جدا..

 ازاي عارف يعبر عن مشاعرهم.. رغم أنه ماشفش دا ف حياته ولا عاشه!! 

بداية الرحلة..

العندليب اتولد في يوم 21 يونيو 1929.. في قرية الحلوات في الشرقية.. 

كان الأصغر بين أربعة إخوة..

وأمه توفيت بعد ولادته بكام يوم.. 

وبعدها أبوهم كمان توفى قبل ما يكمل عامه الأول، فعاش يتيم..

عاش مع خاله الحاج متولي ولعب مع أولاد عمه..

لكن جاله مرض البلهارسيا اللي أثر على حياته بشكل كبير..

قال عن نفسه مرة إنه “ابن القدر”، لأنه عمل 61 عملية في حياته.. وكان بيستغرب ازاي قدر يخرج منهم.. 

أخوه الكبير إسماعيل كان مطرب ومدرس موسيقى..

و بعدين، حليم دخل كُتاب الشيخ أحمد، ومن أول ما بدأ المدرسة حب الموسيقى بقى واضح..

لدرجة إنه بقى رئيس فرقة الأناشيد في مدرسته، ومن ساعتها وهو عاوز يدخل عالم الغناء..

الفترة دي بدأت بعد إجازته في الإذاعة عام 1951..

لما قدم قصيدة “لقاء” من كلمات الشاعر صلاح عبد الصبور وألحان كمال الطويل..

واستمرت لحد ما بدأ تصوير أول أفلامه “لحن الوفاء” عام 1955، وكان وقتها مرض البلهارسيا مش مأثر عليه قوي..

فترة ازدهار العندليب..

في الفترة دي..

 لاحظنا إنه في عدد كبير من الأغاني فيها نبرة تفاؤل زي: “ذلك عيد الندى”، “أقبل الصباح”، “مركب الأحلام”، “في سكون الليل”، “فرحتنا يا هنانا”، “العيون بتناجيك”، “غني.. غني”، “الليل أنوار وسمر”، “نسيم الفجرية”، و”ريح دمعك”، وكمان “اصحى وقوم”، “الدنيا كلها”..

بعض الأغاني كانت تتكلم عن جمال الطبيعة، زي: “الأصيل الذهبي”، “هل الربيع؟”، و”الأصيل”..

وفي أغاني عاطفية كانت تذكر الطبيعة كجزء من عشق الإنسان لكل ما هو جميل زي “ربما”، “في سكون الليل”، “القرنفل”، “حبيبي في عينيه”، “صحبة الورد”، “ربيع شاعر”، “الجدول”، “إنتِ إلهام جديد”، “هنا روض غرامنا”، و”فات الربيع”..

لكن لما زادت أعراض مرض البلهارسيا عنده بدءاً من عام 1956، بدأنا نلاحظ إن نبرة التفاؤل اختفت تدريجياً من أغانيه، وحلت محلها نبرة الحزن..

عبد الحليم حافظ اشتغل مع الملحن العبقري محمد الموجي وكمال الطويل وبليغ حمدي..

 وكمان عنده أغاني شهيرة من ألحان موسيقار الأجيال محمد عبد الوهاب زي: “أهواك”، “نبتدي منين الحكاية”، و”فاتت جنبنا”.. الثنائي حليم وبليغ قدما مع الشاعر المعروف محمد حمزة مجموعة من أجمل الأغاني العربية، منها: “زي الهوا”، “سواح”، “حاول تفتكرني”، “أي دمعة حزن لا”، و”موعود” وغيرها.

غنى كمان للشاعر الكبير نزار قباني أغنيتين مميزتين، هما “قارئة الفنجان” و”رسالة من تحت الماء”، واللي لحنهم محمد الموجي.

بعد حرب 1967..

غنى في حفلة تاريخية أمام 8 آلاف شخص في قاعة ألبرت هول في لندن لدعم المجهود الحربي لإزالة آثار العدوان..

 في الحفلة دي.. قدم أغنية “المسيح” من كلمات عبد الرحمن الأبنودي وألحان بليغ حمدي، وكمان غنى “عدى النهار”، وهي واحدة من أشهر أغانيه..

كان عبد الحليم صديق للزعيم الحبيب بورقيبة، والحسن الثاني، والملك حسين..

كان عنده حلم إنه يقدم قصة “لا” للكاتب الكبير مصطفى أمين على شاشة السينما ورشح نجلاء فتحي لبطولتها، لكن القدر ماساعدوش..

كمان قدم 3 برامج غنائية، هي: “فتاة النيل” للشاعر أحمد مخيمر وألحان محمد الموجي وإخراج كامل يوسف، و”معروف الاسكافي” للشاعر إبراهيم رجب وألحان عبد الحليم نفسه وإخراج عثمان أباظة..

و”وفاء” للشاعر مصطفى عبد الرحمن وألحان حسين جنيد وإخراج إسماعيل عبد المجيد..

الحب الحقيقي والوحيد في حياة العندليب.. 

حب الفنان عبد الحليم حافظ الحقيقي كان مع “ديدي”.. سيدة مطلقة، وبدأت قصة حبهم على شاطئ سيدي بشر في الإسكندرية..

 لكن عبد الحليم ماتجوزهاش..

كان ناوي يطلب إيدها من جدها، لكن الجد رفض وقال إنه عايز يرجعها لزوجها..

ديدي كانت تعبانة في زواجها، وقالت إنها عايزة تفصل وتعيش مع عبد الحليم..

بعد كده.. جدها اتصل بالعندليب وقال له إن ديدي تعبت جداً وجالها مرض نادر، وبدأ سمعها ونظرها يقل..

عبد الحليم سافر لها لندن على طول..

 وهي طلبت منه إنه يتجوز في حياتها علشان تطمن عليه وتشوفه سعيد.. 

عبد الحليم طمّنها وقال لها: “إن شاء الله هتقومي وإن شاء الله هنتجوز”، لكن للأسف، توفيت بعدها.

مرض العندليب.. 

أصيب العندليب الأسمر بتليف في الكبد بسبب مرض البلهارسيا، وكان التليف ده سبب وفاته عام 1977..

 أول مرة عرف فيها العندليب بالمرض كان عام 1956.. لما كان عنده 26 سنة..

 لما حصل له أول نزيف في المعدة وهو مدعو على الإفطار عند صديقه مصطفى العريف في رمضان..

الأطباء اللي عالجوه خلال رحلته مع المرض..

 كانوا: الدكتور مصطفى قناوي، الدكتور ياسين عبد الغفار، الدكتور زكي سويدان، الدكتور هشام عيسى، الدكتور شاكر سرور، ومن إنجلترا الدكتور تانر، و الدكتورة شيلا شارلوك، و الدكتور دوجر ويليامز، ود. رونالد ماكبث، ومن فرنسا د. سارازان..

كان عنده سكرتيرة خاصة اسمها الآنسة سهير محمد علي، واشتغلت معاه من 1972 وكانت معاه في كل المستشفيات اللي قعد فيها..

المستشفيات اللي رقد فيها برة كانت: مستشفى ابن سينا في الرباط (المغرب)..

وفي إنجلترا: مستشفى سان جيمس هيرست، ولندن كلينك، فيرسنج هوم، ومستشفى كنجز كولدج (اللي شهد وفاته)، وكمان “سالبتريد” في باريس..

وفاة العندليب.. 

وفي يوم الأربعاء 30 مارس 1977 تفاجئ الجمهور بوفاة العندليب الأسمر.. 

والسبب الرئيسي لوفاته كان الدم الملوث اللي نقل له وسبب له التهاب كبدي فيروسي (فيروس سي)..

ومعاه كمان تليف في الكبد نتيجة إصابته بداء البلهارسيا من وهو صغير.. زي ما وضح الفحص في لندن..

وقتها ما كانش فيه علاج للمرض ده..

 بعض الآراء قالت إن السبب المباشر في وفاته كان خدش المنظار اللي دخل لأمعائه وسبب نزيف..

 الأطباء حاولوا يوقفوا النزيف على قد ما يقدروا بس للأسف معرفهوش وتوفي عبد الحليم في لندن عن عمر 47 سنة..

الجمهور حِزن حُزن شديد.. 

لدرجة إن بعض البنات في مصر انتحروا بعد ما سمعوا الخبر..

وتم تشييع جثمانه في جنازة كبييرة جدًا .. لم تشهد مصر مثلها غير جنازة الرئيس جمال عبد الناصر والفنانة أم كلثوم..

 عدد الحضور في الجنازة كان أكثر من 2.5 مليون شخص، وكانت انفعالات الناس صادقة جداً وقت التشييع..

في ختام رحلتنا في حياة عبد الحليم حافظ..

بنشوف إزاي الفنان ده قدر يخلد اسمه في تاريخ الموسيقى العربية بفضل موهبته المختلفة وإرادته القوية.. 

ورغم أن حياته كلها كانت مليانه مآسي.. عبد الحليم هيظل رمز للحنين والفن الحقيقي..

وهتفضل اغانيه بتعبر عن مشاعرنا للأبد..

قولنا انت اغنية بتحبها لعبد الحليم وبتعبر عنك؟؟