ماذا لو كان قوم عاد خلف أسطورة الأهرامات..؟

في زمن بعيد.. 

وسط الصحراء الواسعة..

عاشت أمة غامضة اسمها قوم عاد..

كانوا من أقوى الأمم.. اتعرفوا بشجاعتهم وعبقريتهم..

لكن سرعان ما اختفوا من على وجه الأرض.. 

وسابوا وراهم علامات استفهام كثيرة..

 إيه اللي حصل لقوم عاد؟..

 ليه انتهوا بشكل مفاجئ بعد ما كانوا في قمة المجد!!

والاهم من كل دا.. 

إيه اللي ممكن يحصل لما الإنسان يتجبر في سلطانه؟

من هم قوم عاد؟ 

اتذكر قوم عاد في القرآن الكريم حوالي 13 مرة، لكن من غير ما يتكلم عن نسبهم..

كمان، مفيش حاجة في سنة النبي محمد -صلى الله عليه وسلم- تشير لده..

المؤرخ الطبري قال إن قوم عاد كانوا قبيلة جاية من عاد بن عوص بن إرم بن سام بن نوح..

 وكانوا معروفين بعاد الأولى..

وكانوا من العرب الأصليين.. هم عبدوا 3 أصنام اسمهم صداء وصمود والهباء، وكده ذكر مؤرخين تانيين عن نسبهم..

رسول قوم عاد.. 

ربنا بعت لقوم عاد.. سيدنا هود -عليه السلام-..

كان هود -عليه السلام- إنسان رحيم بقومه..

كان دايمًا بيحاول يهديهم بأسلوب هادئ ولطيف..

أنذرهم بالعذاب اللي هيجي عليهم..

وعبّر عن خوفه عليهم، وكان خايف من العواقب الوخيمة اللي ممكن تصيبهم بسبب عصيانهم..

هو كان عايزهم ينجوا من العذاب..

لكن قوم عاد كانوا مصرين على ضلالهم وكفرهم، وردوا دعوته بعناد ورفض..

القرآن الكريم وصف موقفهم بوضوح.. فقال: 

“قَالُوا أَجِئْتَنَا لِنَعْبُدَ اللَّهَ وَحْدَهُ وَنَذَرَ مَا كَانَ يَعْبُدُ آبَاؤُنَا، فَأْتِنَا بِمَا تَعِدُنَا إِن كُنتَ مِنَ الصَّادِقِينَ”.

 ورغم كل محاولاته.. ما آمنوش بدعوته وتمسكوا بعبادة الأصنام اللي كانوا يعبدوها آبائهم..

وكمان، ما اكتفوش بكده، بل شتموا هود وسبوه، واتهموه بالجنون والكذب. القرآن يقول: 

“قَالَ الْمَلَأُ الَّذِينَ كَفَرُوا مِن قَوْمِهِ إِنَّا لَنَرَاكَ فِي سَفَاهَةٍ وَإِنَّا لَنَظُنُّكَ مِنَ الْكَاذِبِينَ”. 

كذّبوا نبيهم وافتكروا إنهم بيعبدوا حاجة تنفعهم..

استمروا في ضلالهم لحد ما تبرأ منهم هود، وعبادتهم للأصنام اللي مفيش منها فايدة..

وفي النهاية، أنذرهم مرة تانية من عذاب الله لو ما آمنوش بالله وحده.

لما استمر قوم عاد في كفرهم وعنادهم رغم دعوة هود -عليه السلام- وإنذاراته المتكررة..

قرر هود إنه يوقف وعظه ويتركهم في ضلالهم..

انتظر العذاب اللي وعدهم الله به، وكانت الآيات توضح هذا العذاب.. قال الله -تعالى-: 

“وَفِي عَادٍ إِذْ أَرْسَلْنَا عَلَيْهِمُ الرِّيحَ الْعَقِيمَ”، وهذه الريح كانت تدمّر كل شيء.”

وفي آية تانية، وصف الله عذابهم :

“فَأُهْلِكُوا بِرِيحٍ صَرْصَرٍ عَاتِيَةٍ”

استمرت الرياح سبع ليال وثمانية أيام، كانت قوية جدًا..

المطر حُبس عنهم لمدة ثلاث سنوات، ولما أرسل الله سُحب في السماء، فرحوا وافتكروا إنها رحمة..

 لكن السحاب كان في الحقيقة ريح تدمّر كل ما أمامها..

 استمرت الريح في هلاكهم، بينما نجا هود ومن آمن معه، تاركين وراءهم قوم في خيبة وعذاب لا ينتهي..

قوم عاد بناة الأهرامات!

في الأيام الأخيرة.. 

انتشر فيديو غريب لست مش معروفة..

 بتقول إن الفراعنة مش هم اللي بنوا الأهرامات، لكن اللي بنوها هم قوم عاد.. 

طب يعني ايه الكلام دا؟ 

المفاجأة إن الست دي بتدّعي إن كلامها علمي، وبتقول إن فيه أبحاث بتثبت كلامها..

هي ذكرت إن هرم خوفو متكون من 2 مليون و 300 الف حجر.. 

وحجرة الدفن مصنوعة من حجر جرانيت واحد، وإن نقل الأحجار دي كان عن طريق العماليق، اللي هم قوم عاد..

 كمان أكدت إن التماثيل والمعابد العملاقة ترجع لقوم عاد مش للفراعنة..

وادعت إنه تم اكتشاف إصبع طوله 40 سم في المنطقة، وإن فيه خرطوش لشداد بن عاد داخل هرم خوفو.. لكن تم دفنه..

من الواضح إن الست دي ماشفتش الأهرامات في الحقيقة.. ولا دخلت هرم الملك خوفو عشان تشوف حجراته وممراته.. كل اللي بتقوله كذب ومالهوش أي أساس من الحصة.. ومعندهاش أي دليل مقبول..

والمصيبة إن فيه ناس مستعدة تصدق الكلام ده..

في الوقت اللي فيه شخص إنجليزي بيحاول يروج لنظريات خرافية عن حضارة الفراعنة..

الحقيقة كاملة 

أولاً، قوم عاد مالهمش أي وجود في مصر، وده مثبت..

 الحضارات اللي قبل الفراعنة موجودة بآلاف السنين.. ومفيش أي أثر لقوم عاد أو مباني ضخمة من الزمن ده..

 كمان مفيش هياكل لعظام العماليق اللي بتتكلم عنهم.. الصور اللي اتعرضت مع الفيديو كانت مزيفة..

قصص العماليق وقوم عاد مش جديدة..

فيه دايمًا ناس بتحب الشهرة، وبيحاولوا يروجوا أفكار غريبة.. عشان كده فيه ناس مش هتسمع غير لصوت عقله المريض..

كان في شاب مصري قاعد في السعودية..

عاوز يقابل الكاتب الكبير عزت السعدني عشان يقوله إن قوم عاد هم بناة الأهرامات..

عزت قرر يتصل بالدكتور زاهي حواس، وفعلاً اتقابلوا، وطلع الشاب ده مش سليم عقليًا..

أما بخصوص الأهرامات.. 

فهي بنيت كمقابر، لأن المصريين القدماء كانوا مؤمنين بالبعث والحياة بعد الموت..

بدأوا يبنوا المقابر من زمن بعيد، واتطورت مع الوقت حتى وصلت للأهرامات..

والأهرامات مش بس بناها قوم عاد..

بل استغرق بناءها وقت طويل مع تطور العمارة المصرية..

إذا كان قوم عاد هم بناة الأهرامات..

ليه استغرقوا كل الوقت ده؟! الأهرامات تحتوي على توابيت ومومياوات تثبت إن الفراعنة هم اللي بنوها..

كمان في بردية وادي الجرف اللي اكتشفت مؤخرًا، بتوضح تفاصيل بناء هرم الملك خوفو..

البردية بتحكي عن عمال كانوا بيشتغلوا في بناء الهرم.. وبتشير إلى مكان المحاجر والأدوات المستخدمة..

بناء الهرم كان مشروع قومى للمصريين.. 

وكان الكل بيشارك فيه عشان الملك المتوفي يتدفن فيه.. 

كمان فيه مناظر مصورة توضح احتفالات ببناء الأهرامات، ومعاهم الملك وأسرته، ومفيش أثر لعماليق أو قوم عاد..

أتمنى نتبع المنهج العلمي في بحثنا ونكون حذرين من أي معلومات غير دقيقة..

 لأن الجهل مش هيكون مرجع لأي حد عايز يتعلم.. 

وانت بقى عندك دليل ان فعلًا قوم عاد هم بناة الأهرامات؟..