أقداركم من أفواهكم..

 عارف ان في سر عظيم في الكون اسمه “قانون الجذب” تقدر من خلاله تحقق أحلامك وهو عن طريق انك لما بتتوقع حاجة سواء بتقولها بشكل مباشر أو مقتنع بيها من جواك ان هي هتحصل .. 

فبنسبة 90% بتتحقق بجد.. ودا لأنك بتبعت إشارات من عقلك الباطل للكون.. 

والكون بالفعل بيستجيب.. 

دا مش كُفر ولا إلحاد دا مذكور في كذا حضارة ولكن علماء الإسلام فسروه بشكل آخر وقالوا :

 “البلاء موكل بالمنطق” ، “خذوا أقداركم من أفواهكم”, 

وأقوال العلماء تصديق لقول الله تعالىٰ في الحديث القدسي.. 

“أنا عند ظن عبدي بي، إن ظن خيرًا فلهُ؛ وإن ظن شرًا فلهُ”

و فيه مقولة مشهورة أوي للإمام علي بن أبي طالب وهي “كل متوقعٍ آت.. فتوقع ما تتمنى”.. 

ودا معناه انك تحاول تستخدم أسلوب قانون الجذب في الناحية الإيجابية يعني تستخدمه عشان تصدق فاللي انت عايز تحققه..

ولو استخدمت قانون الجذب في الناحية السلبية للأسف هتتحقق.. 

زي اللي اتوقع أو كان دايمًا خايف يموت بشكل معين ومات بيه فعلا 

عندك مثلًا الفنان الشاب “هيثم أحمد زكي” .. دايمًا كان خايف يموت لوحده في البيت وكان بيقول كدا في لقاءات كتير.. وللأسف مات بنفس الطريقة اللي كان خايف بيها.. 

ومش بس هيثم أحمد زكي..  كمان عندنا الفنان الكبير “إسماعيل يس”.. 

اللي غنى في أحد أفلامه “صاحبة العصمة – 1956” مونولوج كامل اسمه “الفقر جميل”.. واللي كان بيقول فيه بشكل صريح “اللهم افقرني كمان” وكررها.. 

وللأسف قانون الجذب اشتغل مع الفنان بشكل سلبي جدًا وفعلًا مات “أبو ضحكة جنان” فقير مديون مش قادر حتى يصرف على نفسه.. متخيل!!

 متخيل انت ازاي بجد ممكن تستخدم قانون الجذب وانت مش واخد بالك !! 

لازم تستخدم قانون الجذب في الحاجة الإيجابية

المعنى الحقيقي لـ “قانون الجذب” هو أن الواقع اللي بترصده..

بكل تفاصيله و تكوينه الروحي والنفسي والمادي، وبكل ما فيه من أحداث وأشخاص وكائنات، يتناسب مع طبيعة تكوينك انت روحياً ونفسياً وكمان جسدياً.. ومع معتقداتك وسلوكياتك وقيمتك وتصرفاتك.. 

ودا يعني وجود تغيير كبير في الواقع الخارجي لأنه بيبدأ من المجال الداخلي للكينونة..

مش من الواقع الخارجي نفسه.. فلو كنت حاسس مثلاً أن واقعك الخارجي مافيهوش فرص، فدا يعتبر انعكاس لإحساسك باليأس الداخلي و الحسرة على اللي فات.. 

نصايح لاستخدام قانون الجذب

وهنا هنقولك شوية نصايح هتفيدك عشان قانون الجذب يشتغل معاك بشكل إيجابي: 

• التحكم في قوة العقل لحد ما تقدر تحقق اللي بتفكر فيه.
• تخيل اللي انت عاوزه يحصل.
• خلي عندك يقين من قلبك حقيقي ان تقدر تحقق اللي انت عاوزه.
• أهم حاجة انك تسعى عشان تحقق هدفك.
•  أتدرب كل يوم انك تنفذ كل اللي قلناه ده عشان تجذب قانون الجذب ليك
  
  

فلو انت عاوز تغير واقعك الخارجي وتلاقي الفرص الكونية فلازم تغير نفسك،.

و تغير نفسك دي مش متوقفة انك تسافر برا البلد وان هو دا يبقى قانون الجذب قانون الجذب!!! 

لأ دا الموضوع أوسع من كده بكتيييير .. 

دا له علاقة بمصير الذات الأبدي عبر العالمين. 

وأرجع وأقولك برده ده لا كُفر ولا إلحاد.. دا موجود في الإسلام أيضاً، لأن الله يصر على أن تؤمن أنه قادر على كل شيء..

وبالتالي لو مش هتلاقي اللي يسعدك جوال فالمشكلة فيك أنت،. دور  جواك هتلاقيها في مكان ما..