كتير مننا من كتر التخبطات والخذلان وروتين الحياة المميت وأسلوب الحياة المبني على كثرة التوقعات، بنفقد جزء من روحنا، شغفنا، اهتماماتنا كلها بتتغير، و بنحس إننا تحولنا لآت كل دورها في الحياة شغل ونوم وبس …
لو بتعاني من ضغوط الحياة النفسية، هنا هقولك على أهم 5 كتب هيفرقوا معاك جداً و هيغيروا حياتك مستحيل هتفضل زي مانت بعد ماتقراها .
أبي الذي أكره:
الكتاب ده يناقش قضية نفسية راجعة لـ أسلوب التربية الخاطئ، الأسلوب اللى بيجبر الشخص على إنه يعيش بأسلوب مش مناسب لحريته وتوجهاته، وفي الكتاب ده الكاتب بيوصف إن كل إنسان بيمر بالحاجة دي أو بشئ أخر مماثل فهو بمثابة إنسان مسجون في سجن التقييد، وفيه بيشرح للقراء إزاي يتغلبوا على السجن ده وينجو منه في نهاية الطريق..
جلسات نفسية :
في الكتاب ده الكاتب بيشرح ازاي الإنسان بيحسن التعامل مع كل شيء في حياته مِن الدراسة للعمل والعلاقات ولكن مبيعملش كده في التعامل مع نفسه، فكرة إنك تكون بتراكم جواك مشاكل نفسية كثيرة بدون ما تدور لها على حلول وتفضل تصدر على نفسك أحكام قاسية جداً تأثر عليك باقي حياتك، ده مهلكة للنفس.
وعشان كده هو بيقدملك خطة بمثابة مرشد نفسي هيساعدك إزاي تتصالح مع نفسك وازاي تتعامل معها بشكل صحيح وسليم عشان تقدر توصل للسكينة النفسية .
ممتلئ بالفراغ:
كتاب ممتلئ بالفراغ بيشرح إزاي الإنسان اللي بيهرب من مشاكله النفسية للأدمان السلوكي، سواء إدمان الشغل- العلاقات – الشرب – الشوبينج أي إدمان يقدر يلجأ له يسكن بيه وجع الروح الفارغة، وهنا الكاتب حاططلك حاجة شبة خريطة كدة تساعدك تتغلب على إدمانك وحكمك القاسي على مشاكلك وإزاي تواجها وتخرج من صمتك المكبوت وتوصل لأفضل نسخة منك .
أعرف وجهك الآخر:
الكتاب ده هيدمر لك كل معتقداتك اللي عشت طول عمرك فاكرها حقيقة وشئ لابد منه، هيفتح قلبك بجد على طريقة التعامل في العلاقات الخاصة، إزاي تحب وتتعامل وتتحب صديق حبيب أب أم وحتى الأخوات، الكتاب حقيقي هيخطف روحك لعالم تانى هتحس فيه انك اتولدت من جديد .
عقدك النفسية سجنك الأبدي:
لو كنت بهرب من نفسك وبتتجنب مواجهة ذاتك فالكتاب ده مش ليك !
دي رسالة واضحة وصريحة من الكتاب لكل القراء، وده يخلينا نتأكد إنك هتقابل نفس بجد في الكتاب ده هنتعرف على مخاوفك وخباياك النفسية اللي متأكد01 إنها هتصدمك لأنك كنت معتقد إنها من مسلمات الحياة.
في النهاية
كلنا مرضى نفسيين ولكن بدرجات متفاوتة، كلنا بحاجة ليد عون تتمد لنا وتساعدنا في حياتنا وطريقنا للنهاية، في المقالة دي أنا أديتلك خريطة نفسية هتساعدك توصل لذاتك الحقيقة، تفهمها وتتعامل معاها صح، عشان إنت تستحق إنك تعيش حياتك بشكل مريح نفسياً ..
