جربت تقرأ في عالم الجن قبل كدا؟
اسوء ما يمكن ان يحدث لشخص أنه يدخل في عالم السحر والشعوذة ويقرا ويتعمق فيها وهو مش عارف ايه اللي ممكن يجراله من ورا التدوير في الحاجات اللي زي كدا…
وهنا بنتكلم عن كتاب “شمس المعارف” المعروف بأنه الكتاب الأكثر خطراً
مجرد ما بتشوف أو تسمع إسم الكتاب ده بتجيلك قبضة في قلبك حتي لو مش من اهتماماتك..
أسرار وراء كتابة “شمس المعارف”
خليني احكيلك الموضوع ابتدا ازاي…بعد الطوفان اللي حصل في عهد سيدنا نوح وبداية العهد الثاني للبشرية ظهرت حضارات جديدة مختلفة أحد عصورها الذهبية حكمها شخص قوي جدا كان اسمه ” النمرود ” واللي اتقال عنه أنه قابل “إبليس” نفسه وبسبب كده، بدأت ممارسة السحر الحقيقي في حضارتهم لدرجة أنهم وصلوا من طغيانهم أن الجن كان بيمشي بجانب البشر في المدينة!! بس للآسف القصة موقفتش لحد هنا…
ولما دخل الإسلام اتحرقت كل الكتب اللي كانت بتتكلم عن السحر والشعوذة لحد ما ظهر في يوم كتاب عجيب حتي من إسمه وهو “شمس المعارف” المنسوب إلي العالم الجزائري الصوفي “أحمد بن علي البوني”…
طيب قبل منتكلم عن محتوي الكتاب..هل البوني فعلًا هو اللي كتبه؟!
المعروف ان الكُتب نوعين، النوع الأول يعتبر مصدرًا موثوقًا للمعلومات، بتتاخد من مصادر أصلية أو عن طريق شهود عاشوا الأحداث الفعلية. أما النوع الثاني، من خيال المؤلف نفسه، و”شمس المعارف” بيصنف انه من النوع الأول…ويقال ان مؤلفه يا إمَّا وسيط ما بين عالم البشر والجان فقدروا ينقلوله كل المعلومات دي يا إمَّا بقى هو بيدور بشكل غير عادي عشان يجمع قصص ووثائق من كل الحضارات ويحطها في كتاب واحد!!!
محتوي شمس المعارف…
الكتاب ظهر منه ثلاثة نسخ، الأولى هي نسخة البوني الأصلية التي ظهرت في القرن الثالث عشر، وكانت تحتوي على أربعة أقسام فقط:
- جميع التعاويذ وأنواعها من قديم الزمان ولحد دلوقتي بهياكلها وطلاسمها.
- علوم الأرقام ومُماثلتها من الحروف وتشكيل الأوزان ولكل كلمة تُساوي كام حرف واستخداماتها في حاجات كتير زي التنجيم طبعًا.
- الحروف المُعجمة وهي الحروف العربية اللي بيكثر فيها النقاط بشكل غريب، وطبعًا شرح كامل لأسماء الله الحُسنى وتعبيرات تانية من الصوفية.
- المخطوطات والأشكال اللي بيتم التعبير عنها بـصور منفرة للعين وكمان كلمات مرعبة.
طبعًا الكتاب ده اتحرق من قبل العلماء المسلمين و الرهبان… لأن ناس كتير أوي أتأذت منه ومن قوته المهولة ف التحضير وعشان كده السحرة كانوا بيحاربوا عشان يوصلوله وارتفع سعره لأرقام فلكية وللآسف نجح شوية منهم في الاحتفاظ بنسخ من الكتاب وده هيدخلنا على النُسخة الثانية…
بعد ما مروقت طويل قدر عالم صوفي تاني إسمه “عبد القادر الحُسيني” أنه يجمع وريقات كتاب شمس المعارف المتناثرة ويحطها تاني في كتاب مُوحد مش بس كده ده قدر يقسم الفصول ويضيف عليها عشان يوصل عددها لـ ما يُقارب الثلاثين فصل ومنهم فصل خاص كامل للطلاسم وكيفية استخدامها وطبعًا بعد وقت تم منعه تمامًا ومنع شرائه وبحسب الروايات تم جمع كل النُسخ وأخذهم.
النُسخة الثالثة ودي اللي على النت وهي نُسخ مُحرفة تمامًا ومتوافرة على النت بكثرة بسبب أنهم يخلوا الناس تقرأ ويعلوا المواقع بتاعتهم .
في النهاية، شمس المعارف كتاب خطر جداً بل هو الأخطر على الإطلاق وفيه سحرة لسه معاهم شوية تعاويذ من الكتاب، وكتاب شمس المعارف مستحيل يكون البوني عنده كل العلم ده بكل الطلاسم والطقوس دي وخصوصاً كونه شخص مُتعبد…
تفتكر فعلاً الجن ساهموا في كتابه شمس المعارف؟!
