قبل كدة إتكلمنا عن المتلازمة وأسبابها وأعراضها، ولكن النهاردة جايين نقولك لو إنتى عدك طفل بيعاني من متلازمة توريت إزاي تتعاملي معاه بشكل سليم عشان تخففي من حدة أعراض المتلازمة ..
نصائح هامة للتعامل مع متلازمة توريت
لو عندك طفل بيعاني من متلازمة توريت، مجموعة من أطباء علم النفس والسلوكيات حددوا بعض الضوابط اللي هتساعد أهالي مرضى التوريت في التعامل معهم خلال فترة العلاج .
1- تتعرفي أكتر عن المتلازمة:
عشان تكوني قادرة تساعدي طفلك وتهوني عليه أعراض المتلازمة وفترة العلاج، فإنتي لازم تكوني مدركة تماماً أبعاد المتلازمة وأسبابها الاساسية عشان أكتشاف الأسباب هو الوقود الحقيقي للعلاج.
2- الصبر والتفهم :
الأطفال المصابين بمتلازمة توريت بيعانوا من أعراض لا يمكن السيطرة عليها خالص، وبتكون مزعجة للبعض خصوصاً في حالة اصدار الطفل لأصوات غريبة بصورة متكررة وده ممكن يسبب خوف لأصدقاه اللى في نفس عمره ويخليه يحس بالأختلاف لمجرد إنه بيعمل حاجات هما مش بيمروا بيها، فضروري تكوني صبورة جداً وتقدمي له كل أشكال الدعم والتشجيع في كل الاوقات، وتحسسيه إن إختلافه ده ميزة مش عيب.
3- التواصل مع مدرسته ومدرسيه:
ضروري تعرفي مدرسينه بكل تفاصيل المتلازمة والأعراض اللي بيمر بيها، عشان تتجنبي تعرضه للتنمر وتجنب ابتعاد أصدقاءه عنه، وهيكون لطيف جداً لو حاولتي تقربي لأصدقائه بأسلوب لطيف لشرح أبعاد المتلازمة وتخلقي لطفلك جو إجتماعي مع زملائه عشان تسيطري على انفعالاته النفسية.
4- البيئة المناسبة لطفلك:
حاولي توفري لطفلك بيئة مريحة وهادئة في المنزل، لأن ده هيساعده في تقليل الاجهاد وهتسحن من مستوى التركيز عنده ، وحاولي قدر الإمكان تجنبيه التعرض للمواقف المحرجة التي ممكن تزود من أعراض المتلازمة.
5- العلاج والدعم الأحترافي:
لازم تستشيري أطباء التأهيل والمتخصصين في النفسية والتربية الخاصة عشان يساعدوكي بمعلومات عن العلاج المناسب لطفلك زي العلاج السلوكي والنفسي والدوائي في بعض الحالات.
6- تشيجع اهتماماته وتنميه مواهبه:
تقديم الدعم النفسي والمعنوي لطفلك أمر ضروري لابد منه، وضروري تعرفي هواياته ومواهبة وتشجعيه عليها لأن ممارسة الأنشطة المختلفة هتساعده ذلك في تحسين ثقته بنفسه والتخفيف من التوتر.
في النهاية
خليكي فاكرة إنك في الرحلة دي مش لوحدك وإن في منظمات كتير بتدعم والأهل اللي عندهم أطفال بتعاني من المتلازمات النفسية، طفلك مميز مش مختلف ويستحق مننا كلنا كل الدعم والتشجيع عشان يقدر يتغلب على توتر التورتيت ..
