مين فينا مفكرش قبل كدا يغير حياته؟
يسافرلـ دولة جديدة ويبعد عن كل حاجة، بس المشكلة بتبقي…الفلوس!
عايز أقولك أن في دول العيشة فيها رخيصة جداً ومع كده فيها كمية راحة وإستجمام غير طبيعي..هتحول حياتك من نمط ممل لـ حياة أكثر إثارة وحيوية بس يا ترى هتقدر تلاقي شغل هناك؟
تعالي أقولك علي 3 دول رخيصة تقدر تلاقي فيها شغل وتبدء فيها حياة جديدة
1- فيتنام…حلم الغلابة
خليني أقولك ان فيتنام بتعتبر وجهة سفر للناس اللي بتحب المغامرات مش زي ما منتشر عنها انها بلد حروب بس!
كمان هي من أرخص الدول اللي تقدر تعيش فيها لأن العملة فيها هي “الدونغ”
والدولار الأمريكي = حوالي 23 ألف دونغ فيتنامي.
يعني لو مسافر فيتنام ومش معاك غير 1000 دولار بس…انت كدا معاك 23 مليون دونغ فيتنامي يعني من الآخر بقيت مليونير!!!
طب هل هقدر ألاقي شغل هناك؟
الوظيفة الأكثر شعبية للأجانب في فيتنام هي تدريس اللغة الإنجليزية، ومتوسط الرواتب الشهرية للمدرسين بيكون بين 1100 لـ 1700 دولار أمريكي، وبالمناسبة هو راتب كويس جداً يكفي في فيتنام، وأعلى مما ممكن تلاقيه في بلدان تانية.
أما بالنسبة لوسائل النقل فهي رخيصة أوي، بتبدأ من 0.30 دولار، والتاكسي من 0.50 دولار!
وعشان تأجر شقة مش هيكلفك غير 250 دولار بس!
2- كوستاريكا…بلد الأدغال
لو انت بتحب المغامرة بقي وأفلام الأكشن انصحك بـ كوستاريكا
أدغال وغابات وشواطئ إستوائية…
وفرص العمل هناك مش محتاجة مؤهلات او شهادات لأنهم عايزين حد عارف اللغة الإنجليزية كويس أو عندك موهبة الدليل السياحي أو تعلم الناس رياضة الغوص
وبالنسبة بقي للعيشة هناك متقلقش خالص
انت ممكن تاكل بـ 5 دولارات!! وتأجر شقة بـ 400 دولاربس!!
3 -بلغاريا…أرخص دول أوروبا
لو بتحلم بقي تعيش في أوروبا، بس خايف من التكلفة الغالية الموجودة في بلاد أوروبية كتير زي فرنسا وإيطاليا… فأعتقد ان بلغاريا انسب حل
بلغاريا تعتبر من أرخص البلاد في أوروبا، وتكلفة المعيشة أقل مما تتخيل!
الشغل في بلغاريا هيكون يأما في تدريس اللغة الإنجليزية أو هيكون في قطاع السياحة
وبالنسبة لتكلفة المعيشة
فإيجار الشقة بيبدأ من 200 دولار بس، والوجبة في أي مطعم مش هتكلفك أكتر من 6 دولارات، وعشان تنتقل من مكان للتاني مش هتحتاج غير 1 دولار بس.
