سمعت عن أغرب جزيرة في العالم؟…موجود عليها 887 تمثال بيوصل وزن كل واحد فيهم لـ 100 طن !! ومحدش عارف مين اللي بني التماثيل دي؟!
اكتشفها صدفة!!
فيه باحث هولندي اسمه جاكوب روجفين، اكتشف جزيرة في وسط المحيط الهادي، وده كان في سنة ١٧٢٢ م. الجزيرة دي بقي كانت منعزلة تمامًا!! والغريب في الموضوع إنه لقى الجزيرة يوم ٥ أبريل، اللي هو عيد القيامة عندهم. فحبوا يسموا الجزيرة “جزيرة القيامة” أو “جزيرة الفِصح“.
الجزيرة دي بعيدة عن عاصمة شيلي بحوالي ثلاثة آلاف كيلو متر. وبعد ما اكتشفها، الجزيرة اتشهرت جدًا بالتماثيل وبقت زي مزار للباحثين وعلماء الآثار! بس يا تري ايه حكاية التماثيل دي؟!
مواي…تماثيل عملاقة غامضة!
التماثيل دي مصنوعة من الرماد البركاني بعد ما اتكبس و اتضغط و اتصقل و اتسوّى و وزن كل تمثال حوالي 50 طن و التمثال الواحد طوله 32 متر…فيها تماثيل كاملة وفيها تماثيل نصفها بس، وبعضها ظاهر فوق سطح الأرض ونصها تحت الأرض.
طبعًا، كان في شائعات كتيرة عن التماثيل دي. فيه ناس قالت إن الفضائيين هما اللي بنوها، وفيه اللي قال إن سكان الجزيرة هم اللي بنوها ونشروها على شواطئ الجزيرة عشان يخوفوا الناس من زيارتها ويمنعوهم من الاقتراب.
سكان الجزيرة راحوا فين!!
فيه فريق بحث بريطاني زار الجزيرة و بعده زارها فريق بحث فرنساوي و الاتنين قالو إن الجزيرة كانت مأهولة بالسكان من شعب من العصر الحجري الأخير، يعني من حوالي 4500 سنة قبل الميلاد …وإن السكان دول في القرن الأول الميلادي عملوا تماثيل صغيرة وكانت في حجم الانسان العادي…لحد ما قدرو بعد كده بكذا قرن إنهم يعملوا التماثيل الكبيرة
بعد كده اتقال ان فيه كارثة فظيعة حصلت للجزيرة سنة 1680 و ساعتها الشغل اللي كان بيتعمل في التماثيل وقف فجأة والعلماء بيقولوا إن السكان سابو الجزيرة أو إختفو فجأة نتيجة الكارثة اللي حصلت…وبعدها جه شعب تاني من جزيرة تانية على بُعد 5 آلاف كم و استقرو فيها و هما دول السكان الحاليين للجزيرة دي.
الفضائيين والتماثيل!!
فيه نظرية بتقول إن اللي عمل التماثيل دي هي كائنات فضائية تاهو تقريبا ووصلوا للأرض ومعرفوش يرجعوا كوكبهم تاني، فقالو يسلّو وقت فراغهم بإنهم يعملو التماثيل دي و أصحاب النظرية دي بيأكّدو كلامهم بإن التماثيل موجودة في أماكن غريبة …و كمان موجودة في أماكن تعامد الشمس و كمان فيه رسومات و منحوتات صخرية و خشبية عليها رموز معقدّة برضه و ده إن دل على شئ، فبيدل على إن الحضارة دي كانت حضارة سابقة وقتها و إختفت بصورة غريبة!!
بس الحقيقة ان العلماء لحد دلوقتي مش قادرين يفسروا لغز التماثيل دي و ليه اتعملت و ليه هي منتشرة في كل حتة في الجزيرة و خصوصا على السواحل!!
لو بتفكر تزور الجزيرة دي لازم تعرف ان تكلفة الرحلة غالية جدًا، حتى الناس اللي في شيلي نفسها، مش هتقدر علي تكلفتها…وعلي العموم، الطريق الوحيد عشان تزور الجزيرة دي، إنك تسافر من مطار في شيلي بس.
