الرجل من توريد: لغز الزائر من بلد مش موجودة!

في عالم مليان غموض وأساطير، أحيانًا الحقيقة بتتفوق على الخيال..

سنة 1954، في مطار طوكيو الدولي، حصلت حاجة غريبة جدًا.. 

موظفي الجمارك اليابانيين كانوا بيتعاملوا مع مسافر عادي، أو ده كان اللي ظاهر ليهم، لكنه طلع أبعد ما يكون عن العادي..

راجل شكله طبيعي، أوراقه سليمة، لكن في مشكلة واحدة بس: البلد اللي قال إنه جاي منها ما كانش ليها وجود على خريطة العالم..

اللغز ده اتعرف بعد كده باسم “حالة الرجل من توريد”، وفضل سؤاله محير العلماء، المحققين، وحتى الناس العادية: هو الراجل ده جه منين؟

في البداية..

في يوم صيفي سنة 1954، وقف راجل أنيق عند مكتب الجوازات في مطار طوكيو..

كان شكله زي أي رجل أعمال مسافر، لابس بدلة شيك، وشكله ما يديش أي إحساس بالغموض..

الراجل كان معاه جواز سفر، تأشيرة سليمة، وكل حاجة تبان طبيعية جدًا..

لما الموظفين طلبوا منه يوضح بلده الأصلية، قال بكل ثقة إنه جاي من دولة اسمها “توريد”..

لحد هنا كل حاجة عادية، لحد ما الموظفين حاولوا يدوروا على “توريد” في الخرائط.. 

المشكلة إن مفيش بلد بالاسم ده، لا على الخريطة اليابانية ولا على أي خريطة تانية.. 

الموظفين بدأوا يشكوا إنه بيهزر أو بيحاول يخبّي هويته الحقيقية، لكن لما فتحوا جواز السفر لقوا إنه مكتوب فيه اسم الدولة “توريد” بشكل رسمي، مع أختام واضحة لتأشيرات سفريات سابقة لدول معروفة زي فرنسا وإسبانيا..

الحيرة بتزيد..

الموظفين اليابانيين أخدوه لغرفة تحقيق علشان يفهموا أكتر.. 

لما سألوه عن “توريد”، الراجل قال إنها دولة موجودة في أوروبا، تحديدًا بين فرنسا وإسبانيا.. 

لكن لما وريوه الخريطة وقالوله يحدد مكانها، بدأ يتوتر.. 

حسب كلامه، “توريد” كانت موجودة في مكان إمارة أندورا، لكن كل اللي شايفه قدامه خريطة أندورا، مش بلده اللي عايش فيها طول عمره..

الراجل كان واثق جدًا إنه مش بيخرف. أكد إنه اشتغل في شركة معروفة في “توريد”، وعرض لهم عملات بلده اللي ما حدش شاف زيها قبل كده..

 حتى الأوراق البنكية ما كانتش ليها أي شبيه في العالم. الموظفين اليابانيين قرروا يحتجزوه لحد ما يقدروا يفهموا الحقيقة.

الاختفاء الغامض..

المثير في القصة إن الراجل فضل محتجز في أوضة أوتيل تحت حراسة مشددة لحد ما السلطات اليابانية تقرر تعمل إيه معاه..

الأوضة كانت مقفولة، ومفيش أي طريقة يهرب منها.. 

لكن لما دخلوا عليه تاني يوم، كانوا قدام مفاجأة: الراجل اختفى تمامًا..

لا كان فيه أثر ليه، ولا لشنطه، ولا لأي دليل يوضح هو راح فين..

حتى الحراسة اللي كانت موجودة برة الأوضة أكدت إن ما حدش دخل أو خرج طول الليل..

كأن الأرض انشقت وبلعته..

ومع اختفاء الراجل، اختفى جواز السفر والفلوس وكل الأدلة اللي كان ممكن تساعدهم في حل اللغز ده..

النظريات حول “الرجل من توريد”

مع مرور السنين، طلعت نظريات كتير تحاول تفسر القصة دي:

1. زائر من عالم موازي: في ناس بتقول إن الراجل ده جه من كون موازي، فيه دول مختلفة عن اللي عندنا، وإنه بسبب خطأ ما، وصل لعالمنا.

2. جاسوس دولي: فيه نظرية إنه كان جاسوس، وإن اسم “توريد” كان مجرد غطاء لعملياته. لكن حتى النظرية دي مش بتفسر اختفاءه الغريب.

3. حادثة اختطاف فضائي؟: بعض عشاق الخيال العلمي بيقولوا إن الكائنات الفضائية ليها علاقة بالقصة، سواء عن طريق نقله أو إخفاؤه..

رغم إن القصة عمرها أكتر من 70 سنة، لكنها لسه بتثير الفضول والأسئلة..

الحقيقة ولا الخيال؟

قصة الرجل من توريد عمرها ما خدت إجابة نهائية، وفضلت لغز مش مفهوم.. 

هل كان فعلاً من مكان مش موجود في عالمنا؟

 ولا كان بيخدع الكل؟